ބޯޓެއްގައި ހުރި، 50،000 ރުފިޔާގެ އަގުހުރި ރިހާކުރު ޓައްޕުތަކެއް ވަގަށް ނަގައި ވިއްކާލި މައްސަލައެއް ފުލުހުން ބަލަން ފަށައިފިއެވެ.
މިކަމާ ގުޅިގެން ފުލުހުން ހިއްސާކޮށްފައިވާ މެސެޖެއްގައި ވަނީ ނޯތު ހާބަރުގައި އޮތް ބޯޓަކުން ރިހާކުރު ޓައްޕުތަކެއް ވަގަށް ނަގާފައިވާ މައްސަލައެއް މިދިޔަ ހުކުރު ދުވަހު ފުލުހުންނަށް ރިޕޯޓުކޮށްފައިވާ ކަމަށެވެ.
މިކަ މާ ގުޅިގެން އެ ތަކެތި ހޯދުމަށް ސީސީޓީވީ ފޫޓޭޖް ބަލައި ދެނެގަނެ ފުލުހުން ކުރި މަސައްކަތުން މިހާރު ރިހާކުރު ޓައްޕުތައް ހޯދާފައިވާ ކަމަށް ވެސް ފުލުހުން ވަނީ ބުނެފައެވެ. އަދި، މި ތަކެތި ހޯދާފައި ވަނީ މީހަކަށް ވިއްކާލާ ގެއެއްގެ ތެރޭގައި ފޮރުވާފައި ހުއްޓައި ކަމަށް ވެސް ފުލުހުން ވަނީ ބުނެފައެވެ.
ރިހާކުރު ޓައްޕުތަކުގެ ވެރިމީހައާ ހަވާލާދީ ފުލުހުން ބުނީ، މި ރިހާކުރު ޓައްޕުތަކުގެ އަގު 50،000 ރުފިޔާއަށް އަރާނެ ކަމަށެވެ.
ފުލުހުން ބުނީ، މި މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައިނުވާ ކަމަށެވެ. ނަމަވެސް، މި މައްސަލަ ތަހުގީގު ކުރަމުން ދާކަމަށް ފުލުހުން ވަނީ ބުނެފައެވެ.