ޕްރޮސެކިއުޓާ ޖެނެރަލް (ޕީޖީ) އޮފީހުގެ މުވައްޒަފުން މިރޭ މަގާމުން ވަކިކުރި ޕީޖީ ހުސައިން ޝަމީމަށް ރަތް ދޫލައިގެ ވަދާއުއެއް ކިޔައިފިއެވެ.
ޕީޖީ އޮފީހުގެ މުވައްޒަފުން ރަތް ދޫލައިގެ ވަދާއުއެއް ޕީޖީ ޝަމީމަށް ކިޔާފައި ވަނީ ޝުކުރު އަދާކުރުމުގެ ގޮތުންނެވެ.
ޕީޖީ ޝަމީމް މަގާމުން ވަކިކުރަން ހުށަހެޅީ ހުޅުދޫ ދާއިރާގެ މެންބަރު މުޙައްމަދު ޝާހިދެވެ.
އެ މައްސަލަ ދިރާސާކުރީ ޖުޑިޝަރީ ކޮމިޓީންނެވެ. އެ ކޮމިޓީއަށް މިއަދު ޝަމީމް ހާޒިރުކުރިއެވެ. އެކަމަކު، ކޮމިޓީގައި ތިއްބެވި ސަރުކާރު ހިންގާ ޕީއެންސީގެ މެންބަރުންގެ ހުށަހެޅުއްވުމަށް އެ ކޮމިޓީ ވަނީ ސިއްރުކޮށްފައެވެ.
ޝަމީމް ވަކިކުރަން މިރޭ ރައްޔިތުންގެ މަޖިލީހުގައި ޖަލްސާ ފެށިތަނާހެން ޝަމީމް އިސްތިއުފާ ދެއްވި ނަމަވެސް އިސްތިއުފާގެ ސިޓީ ރައީސް އޮފީހަށް ނުލިބޭތީކަމަށް ބުނެ ވޯޓަށް އަހައި ޝަމީމް އެ މަގާމުން ވަނީ ވަކިކޮށްފައެވެ.
ޕީޖީ ޝަމީމް މިރޭ ޕީޖީ އޮފީހުން ނުކުމެވަޑައިގަންނަވާއިރު މުވައްޒަފުން ރަތްދޫލައިގެ ވަދާއު ކިޔަނީ -----
ޕީޖީގެ މަގާމުން ވަކިކުރަން އުޅެނީ އެއްވެސް އަސާސެއް ނެތް ޖަވާބުދީ، ބާވެފައި އޮތް ތުހުމަތުތަކެއް ދައްކާފައި ކަމަށާއި އެކަން ކުރަން އުޅެނީ ނާޖާއިޒު ނުފޫޒު ނުފޯރުވޭނެ އިދާރާއެއް އުފެއްދުމުން ކަމަށް ޝަމީމް ވަނީ ކުރިން ވިދާޅުވެފައެވެ.
އިދިކޮޅުގައި އޮތްއިރު ޕީއެންސީގެ އިސް ބޭފުޅުން އެންމެ ބޮޑަށް ފާޑުވިދާޅުވި އެއް ބޭފުޅަކީ ވެސް ޝަމީމެވެ.
ޕްރޮސެކިއުޓާ ޖެނެރަލްގެ މަގާމަށް ޝަމީމް އައްޔަންކުރެއްވީ މިދިޔަ ސަރުކާރުގައި ޑިސެމްބަރު 8، 2019 ގައެވެ.