ޝިއޯމީގެ ދެވަނަ ކުއާޓާގެ އާމްދަނީ އަންދާޒާ ކުރިވަރަށްވުރެ މަތިވެއްޖެކަމަށް އެކުންފުނިން ހާމަކޮށްފިއެވެ.
ޗައިނާގެ ޓެކްނޮލޮޖީ އެންމެބޮޑު އެއްކުންފުނި ޝިއޯމީ ކޯޕަރޭޝަނުން މިއަދު ހާމަކުރި ގޮތުގައި، މިއަހަރުގެ ދެވަނަ ކުއާޓަރުގައި އެ ކުންފުނީގެ އާމްދަނީ އަންދާޒާކުރެވުނު ވަރަށްވުރެ މަތިވެފައިވެއެވެ. އަދި ފުރަތަމަ ފަހަރަށް ކުންފުނީގެ އޮޓޯ ބިޒްނަސް ޔުނިޓުން ލިބުނު 6.2 ބިލިއަން ޔުއާން (869.2 މިލިއަން ޑޮލަރު) ގެ އާމްދަނީވެސް އެ ކުންފުނިން ހާމަކޮށްފައިވެއެވެ.
ޖޫން މަހުގެ ނިޔަލަށް ނިމުނު ތިން މަސްދުވަހުގެ ތެރޭގައި ޝިއޯމީގެ އާމްދަނީ 32 ޕަސަންޓު އިތުރުވެ 88.9 ބިލިއަން ޔުއާނަށް އަރާފައިވެއެވެ. މިއީ އެލްއެސްއީޖީގެ އަންދާޒާތަކާ އެއްގޮތަށް އެނަލިސްޓުން ލަފާކުރި 85.8 ބިލިއަން ޔުއާނަށްވުރެ މަތީ އަދަދެކެވެ.
ޝިއޯމީން 2021ވަނަ އަހަރު އިލެކްޓްރިކް ވެހިކަލް ވިޔަފާރިއަށް ވަނުމަށް ނިންމާފައިވަނީ، ކުންފުނީގެ މައިގަނޑު ވިޔަފާރިކަމުގައިވާ ސްމާޓްފޯނު އުފެއްދުމުގެ އިތުރުން އެހެން ދާއިރާތަކަށް ވިޔަފާރި ފުޅާކުރުމުގެ ގޮތުންނެވެ. އެ ކުންފުނިން އޭޕްރީލް މަހުގެ ކުރީކޮޅު އެސްޔޫ7 އިލެކްޓްރިކް ވެހިކަލްތައް ވިއްކަން ފަށާފައިވަނީ، ޓެސްލާގެ އަގުތަކާ ވާދަކުރެވޭ ގޮތަށް އަގު ކަނޑައެޅުމަށްފަހުގައެވެ.
ދެވަނަ ކުއާޓަރުގައި ޝިއޯމީން 27،307 އިލެކްޓްރިކް ވެހިކަލް ވިއްކާފައިވާއިރު، މިއިން 6.2 ބިލިއަން ޔުއާންގެ އާމްދަނީ ލިބިފައިވެއެވެ. މިއީ ކުންފުނީގެ އޮޓޯ ބިޒްނަސް ސެގްމަންޓުގެ ތަފްސީލު ހިމެނޭ ފުރަތަމަ މާލީ ރިޕޯޓެވެ.
ނަމަވެސް ޝިއޯއޯމީގެ އޮޓޯ ބިޒްނަސް އަދިވެސް ގެއްލުމުގައި ހިންގަމުންދާކަން ފާހަގަކުރެވެއެވެ. މި ޔުނިޓުން މި ކުއާޓަރގައި 1.8 ބިލިއަން ޔުއާންގެ ގެއްލުން ވެފައިވާއިރު، ޖުމްލަ ފައިދާގެ މާޖިން ހުރީ 15.4 އިންސައްތައިގައެވެ.
ޝިއޯއޯމީގެ ޕްރެޒިޑެންޓް ލޫ ވެއިބިން ވިދާޅުވެފައިވަނީ، މިއަހަރުގެ ނިޔަލަށް 120،000 އިލެކްޓްރިކް ވެހިކަލް ވިއްކުމުގެ އަމާޒަށް ވާސިލުވެވޭނެކަމުގެ "ޔަޤީންކަން" އޮތް ކަމަށެވެ.
މި އަމާޒަށް ވާސިލުވުމަށްޓަކައި، ޖޫން މަހުން ފެށިގެން ޝިއޯމީން ވަނީ ދެ ޝިފްޓަށް މަސައްކަތްކުރުމުގެ އުސޫލު ތަޢާރަފުކޮށް، މަހަކު 10،000 އަށްވުރެ ގިނަ ވެހިކަލް ޑެލިވާކުރެވޭނެކަން ކަށަވަރުކޮށްފައެވެ.
ލޫ އިތުރަށް ވިދާޅުވެފައިވަނީ، ވެހިކަލްތައް ޑެލިވާކުރުން އިތުރުވަމުންދާ ވަރަކަށް، މި ޔުނިޓުގެ ވިޔަފާރި ރަނގަޅުވެ ފައިދާ އިތުރުވާނެ ކަމަށް އުންމީދުކުރެވޭ ކަމަށެވެ.
ސިނާއީ ދިރާސާކުރާ ކުންފުންޏެއް ކަމަށްވާ އައިޑީސީގެ މައުލޫމާތު ދައްކާގޮތުން، ޝިއޯއޯމީގެ ދުނިޔޭގެ ސްމާޓްފޯނު ވިޔަފާރި ވެސް ދެވަނަ ކުއާޓަރުގައި 27.4 ޕަސަންޓު އިތުރުވެ ވިއްކި ޔުނިޓްތައް 42.3 މިލިއަން ޔުނިޓަށް އަރާފައިވެއެވެ. މިކަމުގެ ސަބަބުން ކުންފުންޏަށް 14.8 ޕަސަންޓު މާކެޓް ހިއްސާއެއް ލިބި، މުޅި މާކެޓްގެ ތިންވަނަ މަގާމް ހޯދައިދީފައިވެއެވެ.
ޝިއޯމީގެ ސްމާޓްފޯނު ވިޔަފާރީގެ އެންމެ ބޮޑު މާކެޓް ކަމުގައިވާ ޗައިނާގައި، ވިއްކުންތައް 16.5 ޕަސަންޓު އިތުރުވެފައިވާކަމަށް އައިޑީސީއިން ބުނެއެވެ.
މި އާމްދަނީތަކާއެކު އެޖަސްޓްކުރެވިފައިވާ ސާފު އާމްދަނީ 6.18 ބިލިއަން ޔުއާނަށް އަރާފައިވެއެވެ. މިއީ ތަހުލީލުކުރާ ފަރާތްތަކުން އަންދާޒާކުރި 4.8 ބިލިއަން ޔުއާނަށްވުރެ މަތީ އަދަދެކެވެ.