ދިގު އިންތިޒާރަކަށް ފަހު ބޮލީވުޑްގެ އެކްޓަރު ވިކީ ކޯޝަލް ލީޑް ރޯލް ކުޅޭ ތާރީޚީ ފިލްމު 'ޗާވާ'ގެ ޕޯސްޓަރާ އެކު ފިލްމުގެ ޓީޒާ ބެލުންތެރިންނަށް ދައްކާލައިފިއެވެ.
ވަރުގަދަ އެކްޝަން ސީންތަކުން ފުރިގެންވާ ޓީޒާއެއް ބެލުންތެރިންނަށް ދޫކޮށްލާފައިވާއިރު މި ފިލްމުގައި ވިކީ ފެންނާނީ 1681 އިން 1689ވަނަ އަހަރާ ހައަމަށް އިންޑިއާގައި ރަސްކަންކުރި ރަސްކަލެއް ކަމަށްވާ ޗަތުރަޕަތީ ސަމްބާޖީ މަހާރާޖާގެ ރޯލުންނެވެ. ފިލްމުގައި ވިކީ ފެންނާނީ ހަށިގަނޑަށް ވަރަށް ބޮޑު ބަދަލެއް ގެނެސްފައި ވަނިކޮށެވެ. ވިކީ ވަނީ ހަށިގަނޑަށް ބޮޑު ބަދަލެއް ގެނެސް ފިޒިކަލް ޓްރާންސްފޯމްއެއް ގެންނަން އެކަމަށް ޚާއްސަ ތަމުރީނުތަކެއް ވެސް ހަދައިފައެވެ.
މިއީ ދިނޭޝް ވީޖަން ޕްރޮޑިއުސްކޮށް ލަކްޝްމަން އުޓޭކަރު ޑައިރެކްޓްކޮށްފައިވާ ފިލްމެކެވެ. ލަކްޝްމަން އުޓޭކަރަކީ ކާމިޔާބު ފިލްމުތައް ކަމަށްވާ "މިމީ"، "ލުއްކާ ޗުއްޕީ" އަދި ވިކީގެ ފިލްމު "ޒަރަ ހަޓްކޭ، ޒަރަ ބަޗްކޭ"ގެ ވެސް ޑައިރެކްޓަރެވެ.
ފިލްމީ ތަރި ވިކީ ކޯޝަލް--ފޮޓޯ/ކޮއިމޮއި
މިހާރު ވެސް ކާމިޔާބު ގިނަ ފިލްމުތަކެއް ސިނަމާއަށް ގެނެސްދީފައިވާ މެޑްޑޮކްސް ފިލްމު ކުންފުނީގެ މި ފިލްމުގައި ވިކީއާ އެކު ލީޑު ރޯލުން ފެންނާނެ އިތުރު ތަރިންގެ ތެރޭ ސައުތު ބަތަލާ ރަޝްމިކާ މަންދަންނާ، އަކްޝަޔޭ ކަންނާ، އަޝުތޯޝް ރަނާ، ނީލަމް ބޫޕަލަމް އަދި ދިވިޔާ ދައްތާ ހިމެނެއެވެ.
މި އަހަރު ރިލީޒްކުރާ އެންމެ އުއްމީދު ފިލްމުތަކުގެ ތެރޭ ހިމެނޭ "ޗާވާ"ގެ ފުރަތަމަ ފެނިލުމާ އެކު ބެލުންތެރިން އެދިފައިވަނީ ވީހާ ވެސް އަވަހަކަށް ބަތަލާ ރަޝްމިކާ ފިލްމުގައި ފެންނަ ކެރެކްޓާ ވެސް ދައްކާލަދިނުމަށެވެ. މި ފިލްމު ސިނަމާތަކަށް ގެންނަން ނިންމާފައިވަނީ މި އަހަރުގެ ޑިސެމްބަރު މަހުގެ ހަވަނަ ދުވަހުއެވެ.
ބޮލީވުޑްގައި އުޖާލާ ކުރިމަގެއް އޮތް ވިކީ އެންމެ ފަހުން ބެލުންތެރިންނަށް ފެނިފައިވަނީ ދަރުމާ ކުންފުނިން ގެނެސްދިން ފިލްމު "ބޭޑް ނިއުސް"އިންނެވެ.