ގައިންގަޔަށް އަރާ ނުރައްކާތެރި ބައްޔެއް ކަމަށްވާ މަކުނުވިދުރި ފެތުރޭ ގައުމުތަކުން އަންނަ މީހަކު ޕޮޒިޓިވް ވެއްޖެ ހާލަތެއްގައި އެއާޕޯޓުގައި ސްކްރީން ކުރެވޭނެ ތައްޔާރީތައް ވަމުން އަންނަ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.
އެޗްޕީއޭގެ ޕަބްލިކް ހެލްތު ޑިރެކްޓަރު ސަނާ ސަލީމް އެފަދައިން ވިދާޅުވީ، ދުނިޔޭގެ އެކި ގައުމުތަކުގައި މިހާރު ފެތުރެމުން އަންނަ މަކުނުވިދުރިއާ ގުޅޭ ގޮތުން ދައުލަތުގެ މީޑިއާ ޕީއެސްއެމްގެ 'ރާއްޖެ މިއަދު' ޕްރޮގްރާމުގައެވެ. އެ ޕްރޮގްރާމުގައި ވާހަކަދައްކަވަމުން ސަނާ ވިދާޅުވީ، ދަތުރުފަތުރުގެ ޒަރިއްޔާއިން މި ބަލި ޖެހުމުގެ ފުރުސަތު ވަރަށް ބޮޑަށް އެބަ އޮތް ކަމަށެވެ.
އެހެންވެ، މަކުނުވިދުރި ފެތުރޭ ގައުމަކަށް ދަތުރުކުރެވިފައި ހުރިތޯއާއި އެ ފަދަ ސުވާލުތައް އިމުގަ ފޯމުގައި ހިމެނުމަށް މަސައްކަތް ކުރަމުން އަންނަ ކަމަށް ސަނާ ވިދާޅުވިއެވެ.
ވެލާނާ އިންޓަނޭޝަނަލް އެއާޕޯޓް: މަކުނުވިދުރި ފެތުރޭ ގައުމުތަކުން އަންނަ މީހުން އެއާޕޯޓުގައި ސްކްރީން ކުރެވޭނެ ތައްޔާރީތައް ވަމުން އަންނަ ކަމަށް އެޗްޕީއޭއިން ބުނި --- ސަން ފޮޓޯ/ ފަޔާޒު މޫސާ
ބަލި ފެތުރޭ ގައުމަކުން ނުވަތަ ބައްޔަށް ޕޮޒިޓިވް ކޭހެއް ރާއްޖެއަށް އެތެރެވާ ހާލަތެއްގައި އެއާޕޯޓުގައި ސްކްރީނިން ހެދޭކަހަލަ ތައްޔާރީތައް ވަމުން އަންނަކަން އޭނާ ފާހަގަކުރެއްވިއެވެ.
އަދި ޑަބްލިއުއެޗްއޯއަކުން ރެކަމެންޑެއް ނުކުރޭ ޓްރެވަލް ރިލޭޓެޑް އެއްވެސް ރެސްޓްރިކްޝަނެއް ނުވަތަ އަންނަ ބަޔަކު ސްކްރީން ކުރުމަށް އެކަހަލަ ރެކަމެންޑޭޝަނެއް އަޅުގަނޑުމެނަށް ލިބިފައެއް ނެތް. އެކަމަކު ލިބިއްޖިއްޔާ އެކަހަލަ ހާލަތަކަށް އަޅުގަނޑުމެން މިހާރު މިދަނީ ތައްޔަރުވަމުންޕަބްލިކް ހެލްތުގެ ޑިރެކްޓާ ސަނާ ސަލީމް
މި ބައްޔާ ގުޅުވައި އިތުރަށް ހެލްތު މިނިސްޓްރީގެ ޑިރެކްޓާ ޖެނެރަލް އޮފް ހެލްތު ޑރ. އަޙުމަދު އަޝްރަފް ވިދާޅުވީ، މި ބަލީގެ ކޭހެއް ފެނިއްޖެ ނަމަ އެކަން ބެލުމަށް ނިޒާމެއް ތައްޔާރު ކުރަމުން އަންނަ ކަމަށާއި ހެލްތު އެމަޖެންސީ ކޮމިޓީއާއި ޓެކްނިކަލް އެޑްވައިޒަރީ ގުރޫޕް ވެސް އެކުލަވާލެވިފައިވާ ކަމަށެވެ.
މިފަދަ ހާލަތެއްގައި އެހީތެރިކަން ފޯރުކޮށްދެވޭނީ ހުރިހާ ޖަމިއްޔާތަކުން ގުޅިގެން ކަމަށްވާތީ މި ބައްޔަށް ތައްޔާރުވުމުގެ މަސައްކަތްތައް ކުރަނީ އިދާރާތައް ގުޅިގެން ކަމަށް ޑރ. އަޝްރަފް ވިދާޅުވިއެވެ.
ހޮސްޕިޓަލްތަކުގައި ވެސް އެފަދަ ކޭސްއެއް އަތުވެއްޖެނަމަ އެމީހަކު ގެންދެވެން ޖެހޭ ތަނަކަށް ގެންދެވެންދެން އެ ހޮސްޕިޓަލެއްގައި އައިސޮލޭޓް ކުރެވޭނެ އިންތިޒާމްވެސް މިހާރު ވަނީ ރާވާފައިހެލްތު ސާވިސަސްގެ ޑިރެކްޓާ ޖެނެރަލް ޑރ. އަޙުމަދު އަޝްރަފް
ފާހަގަކޮށްލެވޭ ގޮތުގައި، އެޗްޕީއޭއިން ބުނީ މި ބައްޔަށް ޚާއްސަ ފަރުވާއެއް ހޯދިފައި ނެތް ނަމަވެސް ބަލި ޖެހިފައިވާ މީހާގެ ކިބައިން ފެންނަ އަލާމާތްތަކަށް ފަރުވާ ފޯރުކޮށްދެވޭނެ ކަމަށެވެ.
އައިޖީއެމްއެޗް ހޮސްޕިޓަލް: މަކުނުވިދުރި ފެނިއްޖެ ހާލަތަކަށް ހޮސްޕިޓަލްތައް ވެސް ތައްޔާރުވަމުން އަންނަ ކަމަށް ހެލްތު މިނިސްޓްރީން ބުނި -- ސަން ފޮޓޯ/ ފަޔާޒު މޫސާ
ދުނިޔޭގެ ގައުމުތަކުގައި މި ބަލި ފެތުރެމުންދާތީ އެޗްޕީއޭއިން ދަނީ ބަލީގެ ހާލަތު މޮނިޓާކޮށް މި ބައްޔާ ގުޅިގެން ވާންޖެހޭ ތައްޔާރީތައް ވަމުންނެވެ. އަދި، ރާއްޖެއަށް ބަލި އައުމުގެ ފުރުސަތު އޮތް މިންވަރު ބަލައި ބަލި ފެތުރުން ކޮންޓްރޯލް ކުރުމާއި ބައްޔަށް ޓެސްޓުކުރުމާއި އެކަމާގުޅިގެން ވާންޖެހޭ ތައްޔާރީތައް ވަމުން ދާކަމަށް އެޗްޕީެއޭއިން ވަނީ ބުނެފައެވެ.
މަކުނުވިދުރީގެ މިހާރު ފެތުރެމުންދާ ސްޓްރެއިން އާންމު ގޮތެއްގައި ފެތުރެނީ ޖިންސީ ގުޅުމުން ކަމުގައި ވީނަމަވެސް އެހެން ގޮތްގޮތުން ވެސް ބަލި ފެތުރުމުގެ ފުރުސަތު އެބައޮތް ކަމަށް އެޗްޕީއޭއިން ވަނީ ބުނެފައެވެ.
އެގޮތުން، ބަލި ޖެހިފައި ހުންނަ މީހާގެ ހަމުގައި ހުންނަ ބިހިތަކުން ނުވަތަ އެއިން ނުކުންނަ ދިޔައިގައި ޖެހުމުން ބަލި މީހާ ބޭނުންކުރާ ހެދުން، ތުވާލި އަދި ބެޑްޝީޓުފަދަ ތަކެތީގައި ޖެހުމުން ބަލި ފެތުރެއެވެ. އަދި، ނޭވާލާ ނިޒާމުގެ ޒަރީއާއިންނާއި ބަލި ޖެހިފައިވާ ޖަނަވާރަކާ ކޮންޓެކްޓްވުމުން ބަލި ފެތުރުމުގެ ފުރުސަތު ބޮޑު ކަމަށް އެޗްޕީއޭއިން ވަނީ ބުނެފައެވެ.