ރާއްޖޭގެ ބޮޑު ފިލްމު ޕްރޮޑަކްޝަން ކުންފުނި "ޑާކްރެއިން އެންޓަޓެއިންމެންޓް"ގެ އާ ޕްރޮޖެކްޓު "ބިބީ"ގެ ކާސްޓުންނާއެކު ރަސްމީ ޕޯސްޓަރު އާންމުކޮށްފިއެވެ.
މި އަހަރު އެންމެ ވަރުގަދައަށް ޑާކްރެއިންއިން މިހާރު ދައްކަމުން ދަނީ ބިބީގެ ވާހަކައެވެ. މިއީ ޑާކްރެއިންއިން މި އަހަރު ނެރުމަށް ތައްޔާރުވާ ބިރުވެރި ކޮމެޑީ ފިލްމެކެވެ.
ފިލްމުގެ ގިނަ މަސައްކަތްތަކެއް މި އަހަރުގެ ކުރީކޮޅުގައި ކޮށްފައިވާއިރު ދާދިފަހުން ޕްރޮޑަކްޝަނުން ވަނީ ފިލްމުގެ ރަސްމީ ޕޯސްޓަރެއް އާންމުކޮށްފައެވެ. މުޅި ފިލްމުގެ މައިގަނޑު ކާސްޓު މި ޕޯސްޓަރުން ފެނިގެންދެއެވެ.
މި ފިލްމުގެ ލީޑުގެ ގޮތުގައި ހިމެނެނީ ޝަރަފު އަބްދުﷲ އެވެ. ޝަރަފަކީ މި ވަގުތު ފިލްމު އިންޑަސްްޓްރީގައި އެންމެ ޑިމާންޑު ބޮޑު އެއް ތަރިއެވެ. ޑާކްރެއިންއިން އެންމެ ފަހުން ދައްކާފައިވާ ފިލްމު "ފުރޭތަ"ގެ ލީޑު ރޯލުން ވެސް ފެނިގެން ގޮސްފައިވަނީ އޭނާއެވެ. ޝަރަފުގެ އިތުރުން މި ފިލްމުން ފެންނާނީ މަރިޔަމް މަޖުދާއާއި އަބްދުﷲ ޝާފިއު (ފުބޫ) އަދި ޝީލާ ނަޖީބެވެ.
އަލަށް އާންމުކުރި ޕޯސްޓަރުން މި އެކްޓަރުންތައް އެކީގައި ފެނެއެވެ. ޕޯސްޓަރުން އިޝާރާތް ކުރާގޮތުގައި ފިލްމުގައި ޖިންނިއެއް ނުވަތަ ބިރުވެރި ރޯލެއް ކުޅޭނީ މަޖުދާއެވެ.
ފިލްމުގެ ޓެގްލައިންއަކަށް ބުނަނީ "އަ ކޮމެޑީ އޮފް ހޮރޯސް"އެވެ. އެއާއެކު ޑާކްރެއިންއިން ވަނީ ފިލްމު ރިލީޒްކުރާ ތާރީޚު ވެސް އިއުލާނުކޮށްފައެވެ. ޑާކްރެއިންއިން ބުނެފައިވަނީ މި ފިލްމު ދައްކަން ފަށާނީ އޮކްޓޫބަރު މަހުގެ ހަތްވަނަ ދުވަހުން ފެށިގެންނެވެ. މި ފިލްމު އެންމެ ފުރަތަމަ އަޅުވާނީ އޮލިމްޕަހުގައެވެ.
ބިބީގެ ޕްރޮޑިއުސަރުންގެ ގޮތުގައި ހިމެނެނީ މުހައްމަދު އަލީ (މޮގާ) އާއި އާއިޝަތު ފުވާދެވެ. މި ފިލްމުގެ ޑައިރެކްޓަރަކީ ޝަހުދާ މަމްދޫހެވެ. މިއީ އޭނާ ޑައިރެކްޓު ކުރާ ފުރަތަމަ ފީޗާ ފިލްމެވެ.