ޣައްޒާގެ މެދުތެރޭގެ އަޒް ޒަވައިދާ ސަރަހައްދުގައި ގެދޮރު ގެއްލިފައިވާ ފަލަސްތީނުގެ ރައްޔިތުން ހިޔާކޮށްފައިވާ ގުދަނަކަށް އިސްރާއީލުގެ އަސްކަރިއްޔާއިން ބޮން އަޅައި އެއް އާއިލާގެ 15 މީހުން މަރައިލައިފިއެވެ.
އޭގެ ތެރޭގައި ނުވަ ކުޑަކުދިން ވެސް ހިމެނެއެވެ. އެ ހަމަލާގައި ޒަޚަމްވި މީހުންނަށް އަލް އަޤްޞާ ހޮސްޕިޓަލުގައި ފަރުވާދެމުންދާ ކަމަށް ރިޕޯޓުތައް ބުނެއެވެ.
ޣައްޒާގައި ހުންނަ ސިވިލް ޑިފެންސްގެ ތަރުޖަމާނު މަހްމޫދު ބަސާލް ހޮނިހިރު ދުވަހު ވިދާޅުވީ ރޭގަ ދިން އެ ހަމަލާގައި މަރުވި 15 މީހުންނަކީ އަލް އިޖްލާ އާއިލާގެ މީހުން ކަމަށާއި މަރުވި މީހުންގެ ތެރޭގައި ތިން އަންހެނުން ހިމެނޭ ކަމަށެވެ. މި ހަމަލާގައި މަރުވި މީހުންގެ ޖުމްލަ އަދަދަކީ 16 މީހުންނެވެ.
މެދުތެރޭގެ ޣައްޒާގެ ދީރް އަލް ބަލާހުން ރިޕޯޓް ކުރަމުން އަލްޖަޒީރާގެ ނޫސްވެރިޔާ ތާރިގް އަބޫ އަޒޫމް ވިދާޅުވީ އިސްރާއީލުގެ ތިން މިސައިލެއް އަމާޒުވި އެ ގުދަން ހުންނަނީ ނޫސެއިރާތު ރެފިއުޖީ ކޭމްޕާ ކައިރީގައި ކަމަށެވެ.
"ބޮޑު އަލިފާނުގެ ހާދިސާއެއް ހިނގައި، ގުދަނުގައި ހުރި ހުރިހާ އެއްޗެއް އަނދާ ހުލިވެގެން ދިޔައީ ކުޑަކުދިން ރޯ އަޑު އިވުނު. ސަލާމަތީ މަސައްކަތްތައް އަދިވެސް ކުރިއަށް ގެންދާއިރު، އިތުރު ހަށިގަނޑުތައް ހޯދުމަށް މަސައްކަތް އަންނަނީ ކުރަމުން," އޭނާ ބުންޏެވެ.
ރިޕޯޓްތަކުން ބުނާ ގޮތުގައި އެ އާއިލާ އެ ގުދަނަށް ބަދަލުވެފައިވަނީ އެ ތަނަކީ އެއީ ރައްކާތެރިވާނެ ތަނެއް ކަމަށް އިސްރާއީލް ސިފައިން ހާމަ ކުރުމުންނެވެ.
އެ ހަމަލާ ދީފައިވަނީ ގަތަރުގެ ވެރިރަށް ދޯހާގައި ބުރާސްފަތި ދުވަހުންގެ ފެށިގެން ކުރިއަށް ގެންދިޔަ ހަނގުރާމަ ހުއްޓައިލުމުގެ މަޝްވަރާތައް މެދުކަނޑައިލައިފައިވާ ދަނޑިވަޅެއްގައެވެ. މަޝްވަރާތައް ކުރިއަށް ގެންދަނީ ގަތަރާއި، މިސްރު އަދި އެމެރިކާ މެދުވެރިވެގެންނެވެ.
އަލްޖަޒީރާގެ އަބޫ އަޒޫމް ރިޕޯޓްކޮށްފައިވާ ގޮތުގައި ފަހަކަށް އައިސް އިސްރާއީލުން މައިގަނޑު ގޮތެއްގައި ހަމަލާތައް ދެނީ އާންމުން ދިރިއުޅޭ ދިރިއުޅޭ ގެތަކަށް އަމާޒުކޮށެވެ.
އެގޮތުން ނުސައިރަތު ރެފިއުޖީ ކޭމްޕްގެ ހުޅަނގުގައި ދިރިއުޅޭ އާއިލާއަކަށް އަމާޒުކޮށް ވެސް ހަމަލާ ދީފައިވާއިރު، އެ އާއިލާގެ ހަތް މީހަކު ވަނީ އެ ހަމަލާގައި ޝަހީދުވެފައިކަމަށް އަޒޫމް ބުންޏެވެ.
އޮކްޓޫބަރު ހަތް ވަނަ ދުވަހުން ފެށިގެން އިސްރާއީލުގެ ފައުޖުތަކުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 40،074 މީހުން ވަނީ ޝަހީދުކޮށްލައިފައެވެ. ހަމަލާތަކުގައި ޒަޚަމްވި މީހުންގެ އަދަދު ވަނީ 92،537 އަށް އުފުލިފައެވެ.