މޯލްޑިވްސް މިއުޒިކް އެންޑް އާޓްސް ސެންޓާ (އެމްއެމްއޭސީ)އިން ބާއްވާ މަދަހަ މުބާރާތް، "މަދަހަ ރަންއަޑު" ސީޒަން ފަހެއް މުޝާތު މުސްތާޤު ކާމިޔާބު ކޮށްފިއެވެ.
މި މުބާރާތުގެ ވަނަތައް އިއުލާނުކުރުމަށް މިރޭ ވަނީ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ހައުސިން މިނިސްޓަރު ޑރ. އަލީ ހައިދަރެވެ.
މި ރަސްމިއްޔާތުގައި ވަނީ މުބާރާތުގެ އެއްވަނައަށް ރައީސުލްޖުމްހޫރިއްޔާ ދެއްވާ އިނާމަކާއި، ދަ ޓްރެވަލާ ހައްޖު އެންޑް އުމްރާ ގްރޫޕުން ދޭ އުމްރާ ޕެކޭޖު، މުބާރާތުގެ އެއްވަނަ ކާމިޔާބުކުރި މުޝާތުއާ ހަވާލުކޮށްފައެވެ.
މުޅި މުބާރާތުގެ ދެވަނަ، މުޙައްމަދު ރައުޝް ބިން ސިރާޖު ހާސިލްކޮށްފައިވާއިރު، ތިންވަނަ ހޯދާފައިވަނީ ފާތިމަތު އަލީޝާ ޝިޔާމެވެ.
މިއަހަރުގެ "މަދަހަ ރަންއަޑު" މުބާރާތުގައި ޖުމުލަ 139 ހުށަހެޅުމެއް ފެނިގެން ދިޔައެވެ. އެގޮތުން މުބާރާތުގެ ވަނަތައް ވެސް ދީފައިވަނީ ތަފާތު ގިނަ ކެޓަގަރީތަކަކުންނެވެ.
އޭގެ ތެރޭގައި އެންމެ މޮޅު އަމިއްލަ ރާގާއި، އެންމެ މޮޅު ޅެމާއި، އެންމެ މޮޅު ވާޗުއަލް މަދަހައިގެ އިތުރުން ރަށު ފެންވަރާއި އަތޮޅު ފެންވަރުން އެންމެ މަގުބޫލު މަދަހަތައް އަދި މުޅި މުބާރާތުން އެންމެ މޮޅު މަދަހަތައް ހިމެނެއެވެ.
މި މުބާރާތުގައި ވާޗުއަލް ނުވަތަ އޮންލައިން ކެޓަގަރީން އެއްވަނަ ހޯދީ ރ. މަޑުއްވަރި، އިބްރާހީމް ނާތިގުއެވެ. މަގުބޫލް ކެޓަގަރީން، އަލާނާ އަލީ ދާވޫދު އެއްވަނަ ހޯދިއިރު، މި ކެޓަގަރީގައި އަތޮޅު ފެންވަރުން އެއްވަނަ ހޯދީ އަލާޔާ އަޒްމިޔާ ލަތީފެވެ.
މި މުބާރާތުގެ ހުށަހެޅުންތަކުގެ ތެރެއިން އެންމެ މޮޅު އަމިއްލަ ރާގު ހައްދަވައިފައިވަނީ މުޙައްމަދު އަބްދުލް ޣަނީ (ތޭރަވާ)އެވެ. އަދި އެންމެ މޮޅު ޅެމަކަށް ހޮވުނީ ދިވެހިބަހާއި ތަރިކައާބެހޭ ވަޒީރު އާދަމް ނަސީރު އިބްރާހީމްގެ ޅެމެކެވެ.
މަދަހަ ރަންއަޑު ސީޒަން ފަހެއްގެ ނަތީޖާ ފާޅުކުރުމުގެ ރަސްމިއްޔާތް ޝަރަފުކޮށްދެއްވައި ދެއްކެވި ވާހަކަފުޅުގައި ހައުސިން މިނިސްޓަރު، ޑރ. އަލީ ހައިދަރު ވަނީ މަދަހަ ސަނާއަކީ ދީނީ ގޮތުން ޝުއޫރުތައް ފާޅުކުރުމަށް ލިބޭ ވަރަށް ބޮޑު ފުރުސަތެއްކަން ފާހަގަ ކުރައްވައިފައެވެ.
މިނިސްޓަރު ވިދާޅުވި ގޮތުގައި ހުރިހާ ފަންނީ ދާއިރާތަކުން ފުރުސަތު ފަހިކޮށްދިނުމަކީ މި ސަރުކާރުން ވަރަށް ބޮޑު އިސްކަމެއް ދޭ ކަމެކެވެ. އަދި މިފަދަ މުބާރާތްތަކުގައި ބައިވެރިވާ ކުދީންގެ ފެންވަރު ރަނގަޅުވަމުން އަންނާތީ، އެކަމާ އުފާ ކުރައްވާ ކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަކަ ނިންމަވައިލެއްވީ މުބާރާތުގެ ބައިވެރިންނަށާއި، ބެލެނިވެރިންގެ އިތުރުން ބައިވެރިން ތަމްރީނު ކުރުމުގައި އުޅުއްވި ހުރިހާ ފަރާތްތަކަށް ވެސް ޝުކުރު އަދާ ކުރައްވައި، ހިތްވަރު ދެއްވަމުންނެވެ.
މަދަހަ ރަންއަޑު ސީޒަން ފަހެއްގެ ނަތީޖާ ފާޅު ކުރުމުގެ ރަސްމިއްޔާތު މިރޭ ބޭއްވިއިރު، މުބާރާތުގެ ސީޒަން ހައެއް މިރޭ އިއުލާނުކުރިއެވެ.
އެމްއެމްއޭސީން ކުރިޔަށް ގެންދާ މަދަރަ ރަންއަޑު މުބާރާތަކީ އެސްއެސްޓީވީއާ ގުޅިގެން ކުރިޔަށް ގެންދާ މުބާރާތެކެވެ. ނަމަވެސް، މި މުބާރާތުގެ ސީޒަން ހައެއް ކުރިއަށް ގެންދާނީ ވުޒާރާތަކާ ވެސް ގުޅިގެންކަން މިރޭ ވަނީ އިއުލާނުކޮށްފައެވެ.