ލ. ގަމުން ގެއެއް ބަލައި ފާސްކުރަނިކޮށް، އެ ގެއިން މަސްތުވާތަކެތި ފެނުނު މައްސަލައެއްގައާއި ބޮގަރު ކެއްކުމުގެ މައްސަލައެއްގައި ދިވެހި ދެ ފިރިހެނަކު ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، އިއްޔެ، ލ. ގަން، ތުނޑި ވިލެޖުގެ ބަލައި ފާސްކުރި ކަމަށެވެ. އަދި އެ ގެ ބަލައި ފާސްކުރީ މަސްތުވާތަކެތި ގެންގުޅެ، އޭގެ ވިޔަފާރި ކުރާކަމުގެ އިތުރުން ބޮގަރު ކައްކައި އޭގެ ވިޔަފާރިކުރާ ކަމަށް އިންޓެލިޖެންސަށް ލިބިފައިވާ މައުލޫމާތަކާ ގުޅިގެން ކޯޓު އަމުރެއްގެ ދަށުން ކަމަށް ފުލުހުން ބުންޏެވެ.
އެ ގެ ބަލައި ފާސްކުރުމުން 24.42 ގްރާމްގެ ހެރޮއިން ކަމަށް ޝައްކު ކުރެވޭ މަސްތުވާ އެއްޗެއް ފެނިފައިވާ ކަމަށް ފުލުހުން ބުންޏެވެ. އަދި ބޮގަރު ކަމަށް ޝައްކުކުރެވޭ ދެ ރުނބައާއި ފަސް ލީޓަރު ފުޅިއެއްގެ އިތުރުން ބޮގަރު ކައްކަން ބޭނުންކުރާ ސާމާނު ފެނިފައިވާ ކަމަށް ވެސް ފުލުހުން ބުންޏެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކުރީ 42 އަދި 57 އަހަރުގެ ދިވެހި ދެ ފިރިހެނުން ކަމަށެވެ. އަދި އެ މައްސަލަ ތަހުގީގުކުރަމުންދާ ކަމަށް ވެސް ފުލުހުން ބުންޏެވެ.
މަސްތުވާތަކެތީގެ މައްސަލަތަކުގައި މީހުން ހިފައި ހައްޔަރުކުރާ އަދަދު މިހާރު ވަރަށް ގިނައެވެ.