ރައީސް ޑރ. މުޙައްމަދު މުއިއްޒުގެ ވެރިކަމުގެ މި ފަސް އަހަރު ނިމުމުގެ ކުރިން ރިސޯޓު މުވައްޒަފުންނަށް ބޯހިޔާވަހިކަން ފޯރުކޮށްދޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
މިނިސްޓަރު ފައިސަލް މިފަދައިން ވިދާޅުވީ ދައުލަތުގެ މީޑިއާ ޕީއެސްއެމްގެ 'ރާއްޖެ މިއަދު' ޕްރޮގްރާމުގައެވެ.
އެ ޕްރޮގްރާމުގައި ވާހަކަދައްވަމުން މިނިސްޓަރު ފައިސަލް ވިދާޅުވީ، ރައީސް މުއިއްޒު ރިސޯޓު މުވައްޒަފުންނަށް ވެވަޑައިގެން އެންމެ މުހިންމު އެއް ވައުދުފުޅަކީ ބޯހިޔާވަހިކަމުގެ ވައުދު ކަމަށެވެ.
އެގޮތުން، އެ ވައުދު ފުއްދުމަށް ޓަކައި ރައީސް ޑރ. މުއިއްޒު ވަރަށް ބޮޑަށް މަސައްކަތް ކުރައްވަމުން އަންނަ ކަމަށާއި އެކަމުގެ މަސައްކަތްތައް ކުރިއަށްދާ ގޮތް އެމަނިކުފާނު އަމިއްލަފުޅަށް ވެސް ބައްލަވާ ކަމަށެވެ.
އިރާދަކުރެއްވިއްޔާ ރައީސް ޑރ. މުޙައްމަދު މުއިއްޒުގެ މި 5 އަހަރު ނިމޭއިރު އެ މަނިކުފާނު ރިސޯޓުތަކުގެ މުވައްޒަފުންނަށް މަސައްކަތްތެރިންނަށް ބޯހިޔާވަހިކަމުގެ ދާއިރާއިން އެ ކޮށްދޭން ބުނި ވައުދު ފުއްދަވާނެ ޓޫރިޒަމް މިނިސްޓަރު އިބްރާހީމް ފައިސަލް
މީގެއިތުރުން، އެ މަސައްކަތް ކުރިއަށްދާ ގޮތް މިނިސްޓަރު އަމިއްލަފުޅަށް ވެސް ބައްލަވާ ކަމަށް ވިދާޅުވިއެވެ.
ފަތުރުވެރިކަމުގެ ދާއިރާގައި އެތައް އަހަރެއް މަސައްކަތްކޮށްފައި ތިބި ވަރަށް ގިނަ ފަރާތްތައް ތިބި ނަމަވެސް މިހާރު ލިބެނީ އެ ފަރާތްތަކަށް ހައްގުވާ މިންވަރު ނޫންކަމަށް ފައިސަލް ވިދާޅުވިއެވެ.
އެހެންވެ، ރިސޯޓު މުވައްޒަފުންނަށް ބޯހިޔާވަހިކަން ފޮރުކޮށްދެވިއްޖެނަމަ، އެއީ ދިވެހި ސަރުކާރަކަށް އެ ފަރާތްތަކަށް ކޮށްދެވޭނެ އެންމެ މުހިންމު އެއް ކަންތައް ކަމަށް މިނިސްޓަރު ވިދާޅުވިއެވެ.