ކައިވެންޏާއި އާއިލީ ގުޅުންތަކަށް ރައްޔިތުން ހޭލުންތެރިކުރުމަށް "މަވައްދަތު"ގެ ނަމުގައި ސިލްސިލާ ފޯރަމްތަކެއް އިސްލާމީ ކަންތައްތަކާބެހޭ ވުޒާރާއިން ބޭއްވުމަށް ނިންމައިފިއެވެ.
މިކަމާ ގުޅިގެން އެ ވުޒާރާއިން ކޮށްފައިވާ ޕޯސްޓެއްގައި ވަނީ ފެމިލީ ކޯޓާ ގުޅިގެން ކުރިއަށްގެންދާ މިފޯރަމް ފެށުމަށް ހަމަޖެހިފައި ވަނީ އަންނަ ހުކުރުދުވަހުގެ ރޭ ކަމަށެވެ.
އެގޮތުން، މި ފޯރަމްތައް ބޭއްވުމަށް ހަމަޖެހިފައި ވަނީ އިސްލާމީ މަރުކަޒުގެ ޖަލްސާކުރާ މާލަމުގައެވެ. މިފޯރަމްގެ ފުރަތަމަ ސެޝަން މާދަމާރޭ ކުރިއަށްދާނީ 20:30އިން 22:00 އަށެވެ.
ފޯރަމްގައި "ކައިވެނީގެ ކުރިން" މި މައުލޫއަށް މައުލޫމާތު ދެއްވާނީ މަޝްހޫރު ދީނީ އިލްމުވެރިޔާ އަދި އިސްލާމިކް ޔުނިވާސިޓީގެ ވައިސް ޗާންސެލާ ޑރ. އަލީ ޒާހިރު ބިން ސައީދު ގާސިމެވެ.
މި ފޯރަމްގައި ބައިވެރިވެވޭނީ އިސްލާމިކް މިނިސްޓްރީގެ ވެބްސައިޓުގައި ވާ ފޯމެއް މެދުވެރިކޮށެވެ.
އާންމު ދިރިއުޅުމުގައި ދިމާވާ މައްސަލަތަކާ ދީނީ ކަންކަމަށް ރައްޔިތުން ހޭލުންތެރިކުރުމަށް އެ ވުޒާރާއިން އަންނަނީ މިފަދަ ގިނަ ފޯރަމްތަކެއް ރާވާ ހިންގަމުންނެވެ.