ނާސާގެ ދެ އެސްޓްރޮނޯޓުން ބިމަށް ނާދެވި ދިގުމުއްތަކަށް ޖައްވުގައި މަޑުކުރަން ޖެހިދާނެ ކަމަށް ނާސާއިން ބުނެފިއެވެ.
ނާސާއިން ބުނީ, ރައްކާތެރިކަމާ އެކު ބިމަށް ނާދެވި އިންޓަނޭޝަނަލް ސްޕޭސް ސްޓޭޝަން (އައިއެސްއެސް) ގައި މަޑުކުރަން ޖެހިފައިވަނީ އެމެރިކާގެ ދެ މީހުން ކަމަށާއި، އެ ދެ މީހުން ޖައްވުގައި އަށް މަސް ދުވަސް ވަންދެން މަޑުކުރަން ޖެހިދާނެ ކަމަށެވެ.
ސުނިތާ ވިލިއަމްސްއާއި ބެރީ ބަޗް ވިލްމޯ ޖައްވަށް ދަތުރުކުރީ މިދިޔަ ޖޫން މަހުގެ ފަސްވަނަ ދުވަހުއެވެ. އެ ދަތުރަކީ އަށް ދުވަހުގެ ދަތުރެއް ކަމަށްވީ ނަމަވެސް، މިހާރު އެ މީހުން ޖައްވުގައި ތިބޭތާ ދެ މަސް ދުވަހަށްވުރެ ގިނަ ދުވަސް ވަނީ ވެފައެވެ.
ނާސާއިން ބުނީ، އެ ދެ މީހުން ޖައްވަށް ގެންދިޔަ އުޅަނދު ކަމުގައިވާ ބޯއިންގެ ސްޓާލައިނަރަށް ދިމާވެފައިވާ ޓެކްނިކަލް މައްސަލަތަކެއްގެ ސަބަބުން އެ ދެ މީހުން ބިމަށް ގެނައުން ލަސްވެފައިވަނީ ކަމުގައެވެ.
ނާސާގެ އޮފިޝަލުން ބުނެފައިވާ ގޮތުގައި، ސްޓާލައިނަރުގައި އެ މީހުނަށް އެނބުރި ބިމަށް ނާދެވިއްޖެނަމަ، ގާތްގަޑަކަށް އަށެއްކަ މަސް ދުވަހު ޖައްވުގައި ތިބެންޖެހިދާނެއެވެ. ނަމަވެސް، ސްޓާލައިނަރަކީ އަދިވެސް އެ ދެ މީހުން ބިމަށް ގެނައުމަށް ބޭނުންކުރެވިދާނެ ބެކަޕް އުޅަނދު ކަމަށް އުންމީދުކުރާކަމަށް ނާސާގެ އޮފިޝަލުން ބުނެފައިވެއެވެ.
މީގެ އިތުރުން، ސްޕޭސްއެކްސްގެ ޑްރެގަން އުޅަނދުގައި ވެސް އެ ދެ މީހުން ބިމަށް ގެނެވިދާނެ ކަމަށް ބުނެފައިވެއެވެ. ނަމަވެސް، އެގޮތަށް ބިމަށް ގެނައުމުގައި އެހެން ބާވަތެއްގެ ނުރައްކާތަކެއް ހުރެދާނެކަމަށް ނާސާއިން ބުނެފައިވެއެވެ.
މި ހާދިސާއާ ގުޅިގެން ނާސާގެ އޮފިޝަލުންނާއި ސައިންޓިސްޓުން ދަނީ އެކި ގޮތްގޮތް ބަލައި، އެ ދެ އެސްޓްރޮނޯޓުން ވީހާ ވެސް އަވަހަކަށް އަދި ރައްކާތެރިކަމާ އެކު ބިމަށް ގެނައުމަށް މަސައްކަތްކުރަމުންނެވެ.