ވިޔަފާރިތަކަށް ޚާއްސަކޮށްގެން، ސޭލްސް ޕްރޮޑަކްޓިވިޓީ އިތުރުކުރުމަށްޓަކައި އޮޓޮނޮމަސް އޭއައި އޭޖެންޓުން އުފައްދާ ސްޓާޓްއަޕް ކުންފުންޏެއް ކަމަށްވާ "ރޮކްސް އޭއައި" އަށް އައު ފަންޑިން ރައުންޑެއް ލިބުމާއެކު، އެ ކުންފުނީގެ އަގު 1.2 ބިލިއަން އެމެރިކާ ޑޮލަރަށް އަރައިފިކަމަށް ރިޕޯޓުތައް ބުނެފިއެވެ.
މައުލޫމާތު އެނގޭ ފަރާތްތަކާ ހަވާލާދީ ނޫސްތަކުގައި ބުނެފައިވާ ގޮތުން، މި ފަންޑިން ރައުންޑް ލީޑުކޮށްފައި ވަނީ ކުރިންވެސް އެ ކުންފުންޏަށް އިންވެސްޓުކޮށްފައިވާ 'ޖެނެރަލް ކެޓަލިސްޓް' އިންނެވެ. މިދިޔަ އަހަރު ނިންމާލި މި ފަންޑް ރެއިޒް އާއެކު، 2025 ވަނަ އަހަރު ނިމޭއިރު ކުންފުނީގެ އަހަރީ އާމްދަނީ އަށް މިލިއަން ޑޮލަރަށް އަރާނެކަމަށް ލަފާކުރެވެއެވެ.
ދެހާސް ސައުވީސް ވަނަ އަހަރު ރޮކްސް އުފެއްދެވީ 'ނިއު ރެލިކް' ގެ ކުރީގެ ޗީފް ގްރޯތް އޮފިސަރު އިޝާން މުކަރްޖީއެވެ. ނޮވެމްބަރު 2024 ގައި ރޮކްސްއިން ވަނީ ސީކުއިއާ، ޖެނެރަލް ކެޓަލިސްޓް އަދި ޖީވީގެ އެހީގައި ޖުމްލަ 50 މިލިއަން ޑޮލަރުގެ ފަންޑިން ހޯދާފައިވާކަން އިއުލާނުކޮށްފައެވެ.
މި ސްޓާޓް އަޕްއިން މަސައްކަތްކުރަނީ ކުންފުނިތަކުން މިހާރު ބޭނުންކުރާ ސޭލްސްފޯސް އަދި ޒެންޑެސްކް ފަދަ ސޮފްޓްވެއާތަކާ ގުޅިގެން މަސައްކަތްކުރާނެ އޭއައި އޭޖެންޓުންތަކެއް އުފެއްދުމަށެވެ.
މި އޭއައި އޭޖެންޓުން ކަސްޓަމަރުންގެ އެކައުންޓުތައް މޮނިޓާކުރުމާއި، މައުލޫމާތު ހޯދުމުގެ އިތުރުން ސީއާރްއެމް ސޮފްޓްވެއާތައް އަމިއްލައަށް އަޕްޑޭޓްކުރާނެއެވެ. މީގެ ބޭނުމަކީ ސޭލްސް ޓީމުތަކުން ބޭނުންކުރާ އެކިކަހަލަ ވަކިވަކި ސޮފްޓްވެއާތަކުގެ ބަދަލުގައި އެއް ނިޒާމަކުން ހުރިހާ ކަމެއް ފަސޭހަކަމާއެކު ކުރެވޭނެ މަގު ތަނަވަސްކޮށްދިނުމެވެ.
ރޮކްސްއަށް ސީރީޒް އޭ ފަންޑިން ދިންއިރު، ޖީވީ ގެ އިންވެސްޓަރު ޑޭވް މުނިޗިއެލޯ ލިޔުއްވާފައިވާ ގޮތުގައި، ރޮކްސްގެ އޭއައި އޭޖެންޓުން ކަސްޓަމަރުންގެ ހަރަކާތްތައް ދެނެގަނެ، ލިބިދާނެ ގެއްލުމަކުން ސަލާމަތްވުމަށް ނުވަތަ ފައިދާހުރި ފުރުސަތުތަކުގެ ބޭނުން ހިފުމަށް އަޅަންޖެހޭ ފިޔަވަޅުތައް އަމިއްލައަށް ލަފާދޭނެއެވެ.
ރޮކްސް އާއި ވާދަކުރާ ކުންފުނިތަކުގެ ތެރޭގައި ގޮންގް އަދި ކްލާރީ ފަދަ ކުންފުނިތަކުގެ އިތުރުން އޭއައި ސޭލްސް ޕްލެޓްފޯމްތައް ކަމަށްވާ 11އެކްސް އަދި އާޓިސަން ހިމެނެއެވެ.
ރޮކްސްގެ ވެބްސައިޓުގައިވާ ގޮތުން އެ ކުންފުނީގެ މިހާރުގެ ކަސްޓަމަރުންގެ ތެރޭގައި ރޭމްޕް، މޮންގޯޑީބީ އަދި ނިއު ރެލިކް ފަދަ މަޝްހޫރު ކުންފުނިތައް ހިމެނެއެވެ.