މާލޭ އިމާރާތެއްގެ މަތިން މިއަދު ހަވީރު ވެއްޓުނު މީހާ މަރުވެއްޖެއެވެ.
އެ ހާދިސާއާ ގުޅިގެން ފުލުހުންގެ ޚިދުމަތުން ދެންމެ އެކްސްގައި ކުރި ޕޯސްޓެއްގައި ވަނީ މިއަދު މާލޭގެ ގެއެއްގެ މަތިން ވެއްޓުނު މީހާ މަރުވެފައިވާކަމަށް ބުނެފައެވެ.
އެ މައްސަލަ ތަހުގީގުކުރަމުން އަންނަކަމަށް ވެސް ފުލުހުން ބުންޏެވެ.
ހަމައެއާއެެކު ފުލުހުންވަނީ އެ މީހާ މަރުވެފައިވާތީ މި ދަނޑިވަޅުގައި، އޭނާގެ އާއިލާގެ އިހުސާސްތަކަށް އިހުތިރާމުކޮށް މަރުވި މީހާގެ ފޮޓޯއާއި ހާދިސާގެ މަންޒަރުތައް މީސްމީޑިއާގެ ވަސީލަތްތަކުގައި ދައުރު ނުކުރުމަށް އިލްތިމާސްކޮށްފައެވެ.
އޭނާ ވެއްޓުނީ މާފަންނު ކަސްޓަމްސް އިމާރާތް ކައިރީ ހުންނަ އިމާރާތަކުންނެވެ.
މިކަމާ ގުޅޭ އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.
ނަމަވެސް، ސޯޝަލް މީޑިއާގައި ވަނީ މިކަމާ ގުޅޭ ބައެއް ވީޑިއޯތައް ދައުރުވެފައެވެ. ވީޑިއޯގައި ފެންނަނީ ވެއްޓުނު މީހާ ލޮރީއަކަށް އަރުވައިގެން ހޮސްޕިޓަލަށް ގެންދާ މަންޒަރެވެ.
ވެއްޓިފައިވަނީ އަންހެނެއްކަމެއް ނުވަތަ ފިރިހެނެއްކަން ފުލުހުން ކަށަވަރު ކޮށްދީފައެއް ނުވެއެވެ. އަދި އޭނާއާ ގުޅޭ އިތުރު މައުލޫމާތެއް ހިއްސާ ނުކުރެއެވެ.