ސައިބާ ސެކިއުރިޓީ ދާއިރާއިން އެއްބާރުލުން އިތުރުކުރުމާ ގުޅޭ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި އެކުވެރި އަރަބި އިމާރާތް (ޔޫއޭއީ) ސަރުކާރުގެ ސައިބާ ސެކިއުރިޓީގެ އިސްވެރިޔާ ޑރ. މުޙައްމަދު އަލް ކުވައިތީ މަޝްވަރާ ކުރައްވައިފިއެވެ.
ރައީސް މުއިއްޒުގެ އަރިހަށް ޑރ. މުޙައްމަދު އަލް ކުވައިތީވަނީ މިއަދު އިހްތިރާމުގެ ޒިޔާރަތެއް ކުރައްވައިފައެވެ.
ރައީސް އޮފީހުގައި އޮތް މި ބައްދަލު ކުރެއްވުމުގައި އެ މަނިކުފާނުވަނީ ޔޫއޭއީގެ ސައިބާ ސެކިއުރިޓީގެ އިސްވެރިޔާއަށް މަރުހަބާ ވިދާޅުވެފައެވެ.
ރައީސް މުޢިއްޒުގެ އަރިހަށް ޑރ. މުޙައްމަދު އަލް ކުވައިތީ ކުރެއްވި އިޙްތިރާމުގެ ޒިޔާރަތުގެ ތެރެއިން -- ފޮޓޯ/ ރައީސް އޮފީސް
މިބައްދަލުވުމުގައި ރައީސް މުއިއްޒާއި ޑރ. މުޙައްމަދު އަލް ކުވައިތީ ވަނީ ޑާޓާ ޕްރޮޓެކްޝަނާއި ސައިބާ ސެކިއުރިޓީއާއި މިސްއިންފޮމޭޝަން އަދި ޑިސްއިންފޮމޭޝަން މަދުކުރުމުގައި އެއްބާރުލުން އިތުރުކުރުމަށް މަޝްވަރާ ކުރައްވާފައެވެ. އަދި ޓެކްނޮލޮޖީއަށް އަންނަ ބަދަލުތަކަށް ކަމާގުޅޭ އޮފިޝަލުން އަހުލުވެރިކުރުވުމަށް ތަމްރީނުގެ ފުރުސަތުތައް އިތުރުކުރުމުގެ މުހިންމުކަން ވެސް ފާހަގަ ކުރައްވާފައެވެ.
ރައީސް ވަނީ ދެ ގައުމުގެ ދެމެދުގައި އޮތް ގާތް ރަހުމަތްތެރި ގުޅުމާ ގުޅޭގޮތުން ވާހަކަފުޅު ދައްކަވާފައެވެ. އަދި ވޭތުވެ ދިޔަ އަހަރުތަކުގައި ޔޫއޭއީ ސަރުކާރުން ރާއްޖެއަށް ވެދެއްވި އެހީތެރިކަމާއި ފަހިކޮށްދެއްވަމުން ދިޔަ ފުރުސަތުތައް ފާހަގަކުރައްވައިފައެވެ. އެއީ ދެ ގައުމުގެ ދެމެދުގައި އޮންނަ އަޚްވަންތަކަމުގެ ގުޅުމުގެ ހެއްކެއް ކަމަށް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ރާއްޖޭގެ ގާނޫނު ތަންފީޒުކުރުމުގެ ދާއިރާގެ ގާބިލުކަން އިތުރުކުރުމަށް އެހީތެރިކަން ފޯރުކޮށްދިނުމުގެ ގޮތުން ޔޫއޭއީން މިހާރު ކުރިޔަށްގެންދަވާ މަޝްރޫޢު ފާހަގަކުރެއްވިއެވެ. އަދި އެ ކަމަށް ޓަކައި އެކުވެރި ޢަރަބި އިމާރާތުގެ ރައީސް، ޝައިޚް މުޙައްމަދު ބިން ޒާއިދު އަލް ނަޙްޔާންގެ ދުރުވިސްނުންފުޅާއި ލިޑަޝިޕް އަދި ދެޤައުމުގެ ދެމެދު އިސްތިރާޖީގޮތުން ގުޅުން ބަދަހިކުރެއްވުމަށް ކުރައްވާ މަސައްކަތްތަކަށް ތައުރީފުކުރެއްވިއެވެ.
ރައީސް ޑރ. މުޢިއްޒާއި ޑރ. މުޙައްމަދު އަލް ކުވައިތީގެ މި ބައްދަލުކުރެއްވުން ނިންމަވާލައްވާފައި ވަނީ ދެ ޤައުމަށް ވެސް ފައިދާހުރި މުހިންމު ދާއިރާތަކުން ދެޤައުމުގެ ދެމެދުގައި އިތުރަށް ގުޅުން ބަދަހިކުރެއްވުމަށް މަސައްކަތް ކުރައްވާނެ ކަމުގައި ވިދާޅުވަމުންނެވެ.