ރާއްޖެއަށް މިހާރު ކުރަމުންދާ ވިއްސާރައާ ގުޅިގެން، ރައްޔިތުންގެ ރައްކާތެރިކަން ކަށަވަރުކޮށް ރައްޔިތުންނަށް އެހީތެރިކަން ފޯރުކޮށްދިނުމަށް ދިވެހި ފުލުހުންގެ ޚިދުމަތުގެ އޮޕަރޭޝަނަލް ލެވެލް ތިނަކަށް ބަދަލުކޮށްފައި ވާކަމަށް އެ ޚިދުމަތުން ބުނެފިއެވެ.
ރައްޔިތުންނަށް އެހީތެރިކަން ފޯރުކޮށްދިނުމަށް ރާއްޖޭގެ އެކި ހިސާބުތަކުގައި ފުލުހުން ކުރަމުންދާ މަސައްކަތުގެ ތަފުސީލު އެ އިދާރާއިން ވަނީ ހިއްސާކޮށްފައެވެ.
އެގޮތުން، މާލެއާއި ހުލުމާލޭގެ ގިނަ ސަރަހައްދުތަކުގައި ވެލި ބަސްތާ ޖެހުމަށް ފުލުހުން ވަނީ ހަރަކާތްތެރި ވެފައެވެ. އަދި ނެއިބަހުޑް އޮފިސަރުން ގޭބިސީތަކަށް ޒިޔާރަތްކޮށް ރައްކާތެރިވުމަށް މައުލޫމާތު ހިއްސާކުރުމުގެ މަސައްކަތް ވެސް ކުރަމުން ދާކަމަށް ފުލުހުން ވަނީ ބުނެފައެވެ.
އަތޮޅު ތެރޭގެ ރަށްރަށުގައި ފުލުހުން ކުރަމުންދާ މަސައްކަތްތަކަށް ބަލާއިރު، ހދ. އަދި ހދ. އަތޮޅުގެ ބައެއް ގޭގެއަށް ފެންވަދެފައިވާތީ އާއި މަގުތަކުގައި ފެންބޮޑުވެފައިވާތީ ފުލުހުން ވަނީ އެހީތެރިކަން ފޯރުކޮށްދީފައެވެ.
އޭގެ އިތުރުން، އިހަވަންދޫގެ 40ގެ އާއި ކެލާގެ 22ގޭގެ އިތުރުން ބާރަށު 55ގެއަކަށް ފެނުގެ އަސަރުކޮށްގެން އެހީތެރިކަން ފޯރުކޮށްދީފައި ވާކަމަށް ފުލުހުން ވަނީ ބުނެފައެވެ.
މީގެ އިތުރުން، ނޯތު ޕޮލިސް ރީޖަނާއި ސައުތު ސެންޓްރަލް ޕޮލިހުން ވެސް ވަނީ ގޭބިސީތަކާއި ސަރުކާރުގެ އިދާރާތައް ހިމާޔަތްކުރުމުގެ މަސައްކަތުގައި ހަރަކާތްތެރި ވެފައެވެ.
މީގެ އިތުރުން ވެސް ރާއްޖޭގެ ހުރިހާ ހިސާބެއްގައި ވެސް ރައްޔިތުންނަށް އެހީތެރިކަން ފޯރުކޮށް ދިނުމުގައި ފުލުހުން ހަރަކާތްތެރިވަމުން ދާކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ.