ރާއްޖެ އާއި ގަތަރުގެ ޓީމުތައް ވާދަކުރާ ރޮކެޓް ލީގު މުބާރާތް, އުރީދޫ ނޭޝަން ގްލޯބަލް ފޭސްއޮފްގެ ފުރަތަމަ މުބާރާތުގެ ނިންމުން ފާާހަގަކޮށް އިނާމުތައް ފިއެވެ.
އުރީދޫ އން ވަނީ އެ ކުންފުނީގެ 19ވަނަ އަހަރީ ދުވަހުގެ މުނާސަބަތުގައި ބޭއްވި މި މުބާރާތުގައި ޗެމްޕިއަން ޓީމަށް 960 ޑޮލަރު ހަވާލުކޮށްފައެވެ. މުބާރާތް ކުރިއަށް ދިޔައީ 1،919 ޑޮލަރުގެ އިނާމު ޕޫލަކާއެކުގައެވެ.
މިރޭގެ ރަސްމިއްޔާތުގައި ވާހާކަދައްކަވުމުން އުރީދޫގެ ސީއީއޯ ޚާލިދު އަލް ޚަމާދީ ވިދާޅުވީ، ބައިވެރިވި އެންމެންނަށް ވެސް މިއީ މަޖާ ތަޖުރިބާއަކަށް ވާނެ ކަމަށް އުންމީދު ކުރާ ކަމަށެވެ.
އުރީދޫގެ ސީއީއޯ ޚާލިދު އަލް ޚަމާދީ-- ސަން ފޮޓޯ: ނާއިޝް ނާހިދު
އަދި ކުރިއަށް އޮތްތަނުގައި ވެސް މިފަދަ ބައިނަލްއަގްވާމީ ގޮތުން ރާއްޖެ ތަމްސީލުކުރާ މުބާރާތްތައް ބާއްވާނެކަމަށް އޭނާ ވިދާޅުވިއެވެ.
ޚާލިދު ވިދާޅުވީ ފުރަތަމަ ބައިނަލްއަގްވާމީ އީސްޕޯޓްސް މުބާރާތް ކަމަށްވާ އުރީދޫ ނޭޝަން ގްލޯބަލް ފޭސްއޮފް ރާއްޖެ އަދި ގަތަރުގެ ޓީމުތަކުގެ ދެމެދުގައި ބޭއްވުމުން އުރީދޫއިން ފަޚުރުވެރިވާ ކަމަށެވެ.
މި އިވެންޓަކީ އުރީދޫ ނޭޝަންގެ ފުރަތަމަ ބައިނަލްއަޤްވާމީ މުބާރާތެވެ. އުރީދޫން ބުނެފައިވާ ގޮތުގައި މި މުބާރާތަކީ އީސްޕޯޓްސް ކޮމިއުނިޓީ ކުރިއަރުވައި، ގޭމްކުޅޭ ފަރާތްތަކަށް ދުނިޔޭގެ މައިދާނުގައި ވާދަކުރެވޭނެ ޕްލެޓްފޯމެއް ފަހިކޮށްދިނުމުގެ ބޭނުމުގައި ބޭއްވި ހަރަކާތެކެވެ.
އުރީދޫ ނޭޝަން ގްލޯބަލް ފޭސްއޮފްގައި ބައިވެރިވާ ޓީމުތަކުގެ ހުނަރުވެރިކަމާއި ޑެޑިކޭޝަން މި މުބާރާތުގެ ތެރެއިން ވަނީ ފެނިފައިވާކަމަށް އުރީދޫއިން ބުންޏެވެ.
އެކި ސަރަޙައްދުތަކުގެ ކުޅުންތެރިންނާއި ސަޕޯޓަރުން އެއްތަނަކަށް ގެނެސް، އުރީދޫއިން އަންނަނީ އީސްޕޯޓްސްގެ ދުނިޔޭގައި މުޖުތަމައުގެ ބައިވެރިވުން އިތުރު ކުރުމަށް ގިނަ މަސައްކަތްތަކެއް ކުރަމުންނެވެ.