އަޑިގުޑަން މަގުތައް އެއްވަރުކޮށް، ބޮޑެތި ޚަރަދުކޮށްގެން ސަރުކާރުން މަގުތައް ހަދަނީ އުޅަނދު ދުއްވާ މީހުންނަށް ފަސޭހަ ކުރުމަށް ކަމަށާއި، އެއްގޮތަކަށް ވެސް އެ މަގުތަކުގައި ރޭސް ޖަހާކަށް ނޫން ކަމަށް ފުލުހުންގެ ކޮމިޝަނަރު (ސީޕީ) އަލީ ޝުޖާއު މިއަދު ވިދާޅުވެއްޖެއެވެ.
ސްކޫލް ޓްރެފިކް މޮނިޓަރުންގެ 100ވަނަ ބެޗުގެ ނިމުން ފާހަގަ ކުރުމަށް ފުވައްމުލަކު ސްކޫލުގައި މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ސީޕީ ވިދާޅުވީ ބާރު ސްޕީޑުގައި ދުއްވާ ދުއްވުން ހުއްޓިގެން މެނުވީ، މަގުތައް ބޭނުންކުރާ އެއްވެސް މީހަކަށް ރައްކާތެރިކަމެއް ނެތް ކަމަށެވެ.
ސީޕީގެ ވާހަކައިގައިވަނީ ފުވައްމުލައް ސިޓީގައި ވެސް ޓްރެފިކް އެކްސިޑެންޓުތައް ހިނގާ މިންވަރު އިތުރުވަމުން އަންނަކަން ފާހަގަކުރައްވައިފައެވެ.
ސީޕީ ވިދާޅުވީ ގޮތުގައި 2022ވަނަ އަހަރުގެ ޖުލައި އެކަކުން މި އަހަރުގެ ޖުލައި މަހުގެ ނިޔަލަށް ފުވައްމުލައް ސިޓީގައި 163 އެކްސިޑެންޓެއް ހިނގައި ދެ މީހަކު ނިޔާވިއިރު، އަށް މީހެއް ޒަޚަމްވެ، ދިގު މުއްދަތަށް ވަނީ ބޭސްކުރަން ޖެހިފައެވެ.
ޝުޖާއު ވިދާޅުވި ގޮތުގައި މިދިޔަ އަހަރު އެ ސިޓީގައި ހިނގި އެކްސިޑެންޓްތައް ވަނީ ބޮޑު ތަނުން އިތުރުވެފައެވެ. އެކްސިޑެންޓުތައް މަދުކުރެވޭނީ ހެދިފައިވާ ޓްރެފިކް ގަވާއިދުތަކަށް އަމަލުކޮށްގެންކަން ފާހަގަކުރައްވައި ސީޕީ ވިދާޅުވީ ހިނގާ މީހާއަށް ވެސް ރައްކާތެރިކަން އޮތީ ދުއްވާފައި އަންނަ މީހާ ވެސް ޓްރެފިކް ގަވާއިދާ އެއްގޮތަށް އަމަލުކުރުމުން ކަމަށެވެ.
"ގަވާއިދާ ޚިލާފަށް ދުއްވާ މީހުންނަށް ފިޔަވަޅު ވެސް އެޅޭ. އުޅަނދުތައް ޓޯ ވެސް ކުރެވޭ. އަދި އެކްސިޑެންޓުވާ އުޅަނދުތަކުގެ މައްސަލަތައް ބަލައި، އެ އުޅަނދުތަކަށް ލިބޭ ގެއްލުމުގެ ބަދަލު ވެސް ހޯދައިދެވޭ. ނަމަވެސް އެކްސިޑެންޓުތަކުގައި މަރުވާ މީހާ އަނބުރާ ގެނެވޭނެ ގޮތެއް ނޯވޭ. އަދި ބޮޑެތި އަނިޔާތައްވާ މީހުން ނުކުޅެދުންތެރިކަމާ އެކު އުމުރުގެ ބާކީބައި ހޭދަކުރަންޖެހިފައިވާއިރު، އެ ފަރާތްތަކުގެ އާއިލާތައް ތަހައްމަލު ކުރަމުންދާ ވޭނަކަށް ލުއިކަމެއް ހޯދައެއް ނުދެވޭ،" ސީޕީ ވިދާޅުވިއެވެ.
އޭނާ އިތުރަށް ވިދާޅުވީ ޓްރެފިކް ލައިޓްތައް ހަރުކުރިޔަސް އޭގެން ދިއްލޭ ކުލަތަކަށް ނުބަލާ ނަމަ، ލިބޭނެ ރައްކާތެރިކަމެއް ނޯންނާނެ ކަމަށެވެ.
ސްކޫލްތަކުގެ ދަރިވަރުންނަށް ޓްރެފިކް މޮނިޓާސް ޕްރޮގްރާމެއް ހިންގުމުގެ އެންމެ ބޮޑު މަގްސަދަކީ ޓްރެފިކު ގަވާއިދުތަކަށް ބޯލަނބާ ޖީލެއް އުފެއްދުންކަމަށް ފުލުހުން ބުންޏެވެ.
އަދި އޭގެ ނަތީޖާއަކީ ޓްރެފިކް އެކްސިޑެންޓުތައް މަދުވެ، އެކްސިޑެންޓުތަކުގައި ނިޔާވާ މީހުން ވަރަށް ބޮޑުތަނުން މަދުވެގެން ދިއުންކަމަށް ފުލުހުން ބުނެއެވެ.
ފުލުހުންގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް 1،750 ޓްރެފިކް އެކްސިޑެންޓު ފުލުހުންނަށް ރިޕޯޓުކޮށްފައިވެއެވެ.