ވީޑިއޯ ސްޓްރީމިން ޚިދުމަތްތަކުގެ ތެރެއިން އެންމެ މަޤްބޫލު އެއް ޕްލެޓްފޯމް ކަމަށްވާ ޔޫޓިއުބުން އެ ޕްލެޓްފޯމުގެ ޕްރީމިއަމް މެމްބަރުންނަށް އަމާޒުކޮށް އައު ފީޗާއެއް ޓެސްޓު ކުރަން ފަށައިފިއެވެ.
"ސްލީޕް ޓައިމަރު"ގެ ނަމުގައި ތަޢާރަފުކުރި މި ފީޗާއަކީ ވީޑިއޯ ބަލަމުން ނިދިއްޖެ ހާލަތެއްގައި ވީޑިއޯ އަމިއްލައަށް ހުއްޓުވައިދޭ ފީޗާއެކެވެ.
ޔޫޓިއުބުގެ ވެބްސައިޓުގައި ޝާއިޢުކޮށްފައިވާ ޕޯސްޓެއްގައި މި ފީޗާއާ ބެހޭ ގޮތުން މަޢުލޫމާތު ދެމުން ބުނެފައިވަނީ، ސްލީޕް ޓައިމަރުގެ ޒަރީއާއިން ވަކި ވަގުތެއް ޚިޔާރުކުރުމުން، އެ ވަގުތު ހަމަވުމުން ވީޑިއޯ އަމިއްލައަށް ހުއްޓޭނެ ކަމަށެވެ.
މި ފީޗާ ބޭނުންކުރުމަށް ޔޫޓިއުބު އެޕް ނުވަތަ ވެބްސައިޓުގައި ވީޑިއޯ ޕްލޭކުރަމުންދާއިރު ސެޓިންގްސް މެނޫއަށް ވަދެ ސްލީޕް ޓައިމަރު އޮޕްޝަން ނެގުމަށްފަހު ވަގުތު ކަނޑައެޅިދާނެއެވެ.
މި ގޮތުން 10 މިނެޓު، 15 މިނެޓު، 20 މިނެޓު، 30 މިނެޓު، 45 މިނެޓު އަދި 60 މިނެޓުގެ އޮޕްޝަންތައް ހުންނާނެއެވެ. އަދި ވީޑިއޯ ނިމުމުން އޮޓޯ ޕްލޭބެކް ހުއްޓުވުމުގެ އޮޕްޝަނެއްވެސް ހިމަނައިފައިވެއެވެ.
މި ވަގުތު މި ފީޗާ ލިބެން ހުންނާނީ ހަމައެކަނި ޔޫޓިއުބު ޕްރީމިއަމް މެމްބަރުންނަށް ކަމަށް ޔޫޓިއުބުން ބުނެފައިވެއެވެ. އަދި މި ފީޗާއަށް ލިބޭ ތަރުހީބަށް ބަލައި ކުރިއަށް އޮތްތަނުގައި އެންމެންނަށް ފޯރުކޮށްދިނުމަށް ވިސްނާފައިވާ ކަމަށްވެސް ބުނެފައިވެއެވެ.