ބަންގްލަދޭޝްގައި އެކުލަވައިލި ވަގުތީ ސަރުކާރާ ހަވާލުވެވަޑައިގެންނެވި މުހައްމަދު ޔޫނުސަށް، ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ.
ބަންގްލަދޭޝްގައި ވަގުތީ ސަރުކާރެއް އެކުލަވާލާފައި ވަނީ މިދިޔަ ހޯމަ ދުވަހު އެ ގައުމުގެ ބޮޑު ވަޒީރު ޝެއިޚް ހަސީނާ އިސްތިއުފާ ދެއްވުމާ ގުޅިގެންނެވެ.
ހަސީނާ އިސްތިއުފާ ދެއްވާފައި ވަނީ ބަންގްލަދޭޝްގެ ސަރުކާރު ވަޒީފާތަކަށް މީހުން އިޚްތިޔާރު ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށް މިދިޔަ މަހު ފެށި މުޒާހަރާތައް ހޫނުވުމާ ގުޅިގެންނެވެ.
އެއާއެކު އިއްޔެ ވަނީ އެ ގައުމުގައި އެކުލަވައިލި އާ ސަރުކާރުގެ ވެރިއަކަށް ޔޫނުސް އައްޔަނުކުރައްވާފައެވެ.
އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ވަގުތީ ސަރުކާރުގެ އިސް މުޝީރުގެ ގޮތުގައި ހުވާ ކުރެއްވުމުން ޔޫނުސަށް މަރުހަބާ ވިދާޅުވާ ކަމަށެވެ.
ރާއްޖެއާއި ބަންގްލަދޭޝްއަކީ ދުވަސްވީ ގާތް ރަހުމަތްތެރި ދެގައުމުކަން ރައީސް ފާހަގަކުރައްވާފަ ވެއެވެ. އަދި ރާއްޖެއިން ބަންގްލަދޭޝަށް އަބަދުވެސް އެދެނީ ފާގަތިކަމާއި ސުލްހައާއި ކާމިޔާބީއަށް ކަމަށް އެމަނިކުފާނު ވަނީ ވިދާޅުވެފައެވެ.
އެ ގައުމުގެ މުޒާހަރާތަކުގައި ހަސީނާ ވަނީ އެ ގައުމުގެ އަސްކަރިއްޔާގެ އެހީތެރިކަމާއެކު ހެލިކޮޕްޓަރެއްގެ އެހީގައި އިންޑިއާއަށް ވަޑައިގެންފައެވެ. އެއީ ބަންގްލަދޭޝްގެ ވެރިރަށް ޑާކާގައި ހުންނަ ބޮޑުވަޒީރުގެ ގަނޑުވަރަށް މުޒާހަރާގެ ބައިވެރިން ވަނުމަށް މަސައްކަތްކުރުމުންނެވެ.
ޢުމުރުން 84 އަހަރުގެ ޔޫނުސަށް ވަގުތީ ސަރުކާރު ހަވާލުކޮށްފައި މިވަނީ މުޒާހަރާކުރި ދަރިވަރުން އެގޮތަށް އެދެމުން ދިޔަ ދަނޑިވަޅެއްގައެވެ.
ޔޫނުސްއަކީ ބަންގްލަދޭޝްގެ ފަގީރު އާއިލާތަކަށް އެހީތެރިކަން ފޯރުކޮށްދޭން ހަރުދަނާ މަސައްކަތްތަކެއް ކުރައްވާފައިވާ ބޭފުޅެކެވެ. ޔޫނުސްއަކީ މީގެ ކުރިން، ހަސީނާ ވަރަށް ބޮޑަށް ފާޑު ވިދާޅުވެފައިވާ ބޭފުޅެއް ވެސްމެއެވެ.