މަޝްހޫރު ކެރެކްޓާ 'ޑެޑްޕޫލް' ކޮސްޓިއުމްގައި ވެލާނާ އިންޓަނޭޝަނަލް އެއާޕޯޓުގައި ހުރި މީހަކާ ފުލުހުން ސުވާލުކޮށްފިއެވެ.
އެއާޕޯޓުގައި 'ޑެޑްޕޫލް' ކޮސްޓިއުމްގައި ހުރި މީހަކާ ފުލުހުން ވާހަކަ ދައްކާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ. އެ މީހާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް އެ ވީޑިއޯގައިވެއެވެ.
އެ ހާދިސާއާ ގުޅޭ ގޮތުން ފުލުހުން މީޑިއާތަކާ ހިއްސާކުރި މެސެޖެއްގައި ބުނީ އެއާޕޯޓުގައި ޑެޑްޕޫލް ކޮސްޓިއުމުގައި ހުރި ދިވެހި ފިރިހެނަކާ ރޭ ފުލުހުން ސުވާލުކޮށްފައިވާ ކަމަށެވެ. އެ މީހާއަކީ މީހަކު ބަލައި އެއާޕޯޓަށް ގޮސް ހުރި މީހެއް ކަމަށް ވެސް ފުލުހުން ބުންޏެވެ.
އެ މީހާއާ ސުވާލުކުރި ސަބަބެއް ފުލުހުން ނުބުނެއެވެ. އޭނާ ހައްޔަރުނުކުރާ ކަމަށް ވެސް ފުލުހުން ބުންޏެވެ.
'ޑެޑްޕޫލް އެންޑް ވުލްވެރިން' ފިލްމު ދާދި ފަހުން ނެރެފައިވާއިރު، އެ ފިލްމު ވަނީ ދިވެހި ޒުވާނުންގެ މެދުގައި ވެސް ވަރަށް މަގުބޫލުވެފައެވެ.