ގިނަ ބައެއްގެ އަތުން ފައިސާ އަތުލައި އެއަށް ޚިޔާނާތްތެރިވީކަމުގެ ތުހުމަތުގައި ރައްޔިތުންގެ މަޖިލީހުގެ ކުރީގެ މެންބަރު އަލްހާން ފަހުމީއާއި އޭނާގެ ދެ ކޮއްކޮއިން ކަމަށްވާ މީޑިއާ ކައުންސިލްގެ ކުރީގެ ރައީސް ޝަހުބާން ފަހުމީއާއި، ޝަޒުބާން ފަހުމީގެ މައްޗަށް އުފުލާފައިވާ ދައުވާތަކަށް ޖަވާބުދާރީވާން އިތުރު 15 ދުވަސް މިއަދު ކްރިމިނަލް ކޯޓުން ދީފިއެވެ.
އެ މީހުންގެ މައްޗަށް ކޯޓުގައި ޝަރީއަތް ފެށީ މި އަހަރުގެ މެއި މަހުގެ ތެރޭގައެވެ. އެންމެ ފުރަތަަމަ އަޑުއެހުން ނިންމައިލީ ވަކީލަކު ހަމަޖައްސަން 15 ދުވަސް ދިނުމަށް ފަހުގައެވެ.
މިއަދު ކޯޓުގައި އޮތީ ދައުވާތަކަށް ޖަވަބުދާރީވުމުގެ އަޑުއެހުމެކެވެ.
ނަމަވެސް، ޖަވާބުދާރީވާން ލިބުނު ފުރުސަތުގައި އެ މީހުންގެ ވަކީލު އަލީ ސައީދު ވިދާޅުވީ، އޭނާ ވަކީލެއްގެ ގޮތުގައި ހަމަޖެހުނީ މިއަދު ހެނދުނު ކަމަށާއި އެހެންވެ ދައުވާތަކާއި މައްސަލަ ސާފުނުވާ ކަމަށެވެ.
އެއާއެކު މިއަދު އޮތް އަޑުއެހުމުގައި މައްސަލަ ބައްލަވާ ގާޒީ އިސްމާއިލް ޝަފީއު ވަނީ އިތުރު 15 ދުވަސް ދެއްވަން ނިންމަވައިފައެވެ.
ޕްރޮސެކިއުޓާ ޖެނެރަލްގެ އޮފީހުން މީގެ ކުރިން ބުނީ، އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ތަޢާރަފުކޮށް، އިންވެސްޓަރުންނަށް މަންފާ ލިބޭނެކަމަށް ދައްކައިގެން، މަކަރާއި ޙީލަތުން ގިނަ ބައެއްގެ އަތުން ފައިސާ ހޯދައި އެ ފައިސާ ލޯންޑާކޮށްފައިވާ މައްސަލައިގައި ތިން މީހެއްގެ މައްޗަށް ދައުވާކުރަން ފޮނުވާފައިވާ ކަމަށެވެ. އެއީ:
- އަލްހާން ފަހުމީގެ މައްޗަށް ޓެކުމުގެ 13 ދައުވާއެއް
- ޞަހުބާން ފަހުމީގެ މައްޗަށް ޓެކުމުގެ 13 ދައުވާއެއް
- ޝަޒްބާން ފަހުމީގެ މައްޗަށް ޓެކުމުގެ 13 ދައުވާއެއް
މި ދަޢުވާތައް ކޮށްފައިވާ ސަބަބަކީ، އަލްހާނު ފަހުމީއާއި، ޞަޙުބާން ފަހުމީއާއި، ޝަޒްބާން ފަހުމީގެ އާއިލީ ކުންފުންޏެއް ކަމަށްވާ ކިންގްސް ކެޕިޓަލްއިން 2021 އަދި 2022 ވަނަ އަހަރު ތެރޭގައި އާންމުންނަށް ހުޅުވާލައިގެން ކުރިއަށް ގެންދިޔަ ކިންގްސް ފޮރެކްސް ޓްރޭޑިންގެ އިންވެސްޓްމަންޓްގެ އެކި ޕެކޭޖްތަކުން މާލީ މަންފާއެއް ހޯދައިދޭނެކަމަށް ދެއްކުމުންނެވެ.
އަދި، އެ ކަމަށް އާންމު އެކި މީހުން އަތުން އެކި ޢަދަދުތަކުން ފައިސާ ނެގުމަށް ފަހު، އެ ފައިސާއިން ކޮށްދޭން އެއްބަސްވި ކަންތައް ކޮށްނުދީ ފައިސާ ޓަކައިގެންފައިވާތީ ކަމަށް ދައުލަތުން ވަނީ ބުނެފައެވެ.
އެ ސްކީމަށް އެކި މީހުން 98 މިލިއަނަށް ވުރެ ގިނަ ދިވެހި ރުފިޔާ އިންވެސްޓްކޮށްފައިވެއެވެ. މި މައްސަލައިގައި ދަޢުވާކޮށްފައިވަނީ އޭގެ ތެރެއިން 13 މީހުންގެ ބައިގައެވެ.
މި ސްކީމްއާ ގުޅިގެން އިތުރު ބައިތައް ދިވެހި ފުލުހުންގެ ޚިދުމަތުން ގެންދަނީ ތަޙުޤީޤުކުރަމުންނެވެ.