ލިޔުންތެރިޔާ އަޙްމަދު ޝިޔާމްގެ ފޮތް ހަރުގަނޑުން 700 ފޮތް ގައުމީ ކުތުބުޚާނާއަށް މިއަދު ހަދިޔާކޮށްފިއެވެ.
މި ކަމަށްޓަކައި ގައުމީ ކުތުބުޚާނާގައި ބޭއްވި ޙަފްލާއަށްފަހު އެސްއެސްޓީވީއަށް ދެއްވި އިންޓަވިއުއެއްގައި ޝިޔާމް ވިދާޅުވީ މިއަދު އޭނާ ހަދިޔާކުރެއްވި ފޮތްތަކުގެ 95 އިންސައްތައަކީ ދިވެހި ފޮތްކަމަށެވެ. މީގެ ތެރޭގައި ވާހަކަ ފޮތްތަކާއި މަޖައްލާތަކުގެ އިތުރުން ދީނީ، ތަޢުލީމީ އަދި ތާރީޚީ ފޮތްތައް ވެސް ހިމެނެއެވެ. އަދި އިނގިރޭސިބަހުން ލިޔެފައިވާ ކެއްކުމާއި ގުޅޭ ބައެއް ފޮތްތައް ވެސް ހިމެނޭ ކަމަށް އޭނާ ވިދާޅުވިއެވެ.
ލިޔުންތެރިޔާ އަޙްމަދު ޝިޔާމްގެ ފޮތް އަލަމާރިން 700 ފޮތް ގައުމީ ކުތުބުޚާނާއަށް ހަދިޔާކުރެއްވުން -- ސަން ފޮޓޯ/ ނާއިޝް ނާހިދު
ޝިޔާމް ވިދާޅުވި ގޮތުގައި އޭނާގެ ފޮތް ހަރުގަނޑުން ހަދިޔާކުރި އެންމެ ގިނަ ދުވަސްވީ ފޮތަކަށް އޮތީ، ރާއްޖެއަށް މިނިވަންކަން ލިބުނުތާ އެއް އަހަރުތެރޭ، 1966ވަނަ އަހަރު ނެރުނު "ރޫހު" ނަމަކަށް ކިޔާ މަޖައްލާއެކެވެ. އޭނާ ވިދާޅުވި ގޮތުގައި މިއަދު އެ ހަދިޔާކުރެއްވި ފޮތްތަކުގެ ތެރޭގައި އާންމުކޮށް މީސްމީހުން އަތުގައި ނުހުންނަ ވަރަށް ގިނަ ފޮތްތައް ހިމެނޭނެއެވެ.
އޭގެ ތެރޭގައި އިހުގައި ރާއްޖޭގައި ބޭއްވުނު ބައެއް ފުޓުބޯޅަ މުބާރާތްތަކާ ގުޅޭ ފޮތްތަކުގެ އިތުރުން މަޖީދިއްޔާ ސްކޫލަށް 50 އަހަރު ފުރުމާ ގުޅިގެން ނެރުނު ފޮތެއް ވެސް ހިމެނެއެވެ.
ލިޔުންތެރިޔާ އަޙްމަދު ޝިޔާމްގެ ފޮތް އަލަމާރިން 700 ފޮތް ގައުމީ ކުތުބުޚާނާއަށް ހަދިޔާކުރެއްވުން -- ސަން ފޮޓޯ/ ނާއިޝް ނާހިދު
"އަދި އަޅުގަނޑަށްވުރެ ފޮތުގެ ގޮތުން މާ މުއްސަނދި ބޭފުޅުން އެބަތިބި ރާއްޖޭގައި. އަޅުގަނޑު އެދެނީ ކޮންމެ ބޭފުޅަކު ވެސް މަރުވުމުގެ ކުރިން އެ ފޮތް އަވަހަށް ހަދިޔާ ކުރައްވާށޭ ފޮތް އަލަމާރިން. ހިފަހައްޓައިގެން ތިބޭނެ ކަމެއް ނެތޭ" ޝިޔާމް ވިދާޅުވިއެވެ.
އޭނާ ވިދާޅުވި ގޮތުގައި ރަށްރަށުގައި ތިއްބަވާ ބޭފުޅުން ވެސް ލައިބްރަރީތަކަށް ފޮތް ހަދިޔާ ކުރުމަކީ ވަރަށް މުހިންމު ކަމެކެވެ. ކޮންމެ ފޮތަކީ ވެސް ވަރަށް ބޮޑު ޢިލްމެއްކަން ފާހަގަ ކުރައްވައި ޝިޔާމް ވިދާޅުވީ ފޮތަކުން އެ މީހަކު ބޭނުންވާ ޢިލްމެއް އުނގެނުމަށް ފަހު، އެހެން މީހުންނަށް ވެސް އެ ޢިލްމެއް ހިއްސާކުރަން ޖެހޭނެ ކަމަށެވެ.
ލިޔުންތެރިޔާ އަޙްމަދު ޝިޔާމްގެ ފޮތް އަލަމާރިން 700 ފޮތް ގައުމީ ކުތުބުޚާނާއަށް ހަދިޔާކުރެއްވުން -- ސަން ފޮޓޯ/ ނާއިޝް ނާހިދު
ޝިޔާމް ލިޔުންތެރިކަމުގެތެރެއަށް ވަނީ 1980ގެ މެދު ތެރޭގައެވެ. އޭނާ ލިޔުންތެރިކަމުގެ ދާއިރާގައި އުޅުއްވާތާ 36 އަހަރަށްވުރެ ގިނަ ދުވަސްވީއިރު، އެންމެ ފުރަތަމަ ކުރެއްވީ ނޫސްވެރިކަމެވެ.
އެގޮތުން ހަވީރު ނޫހާއި އާފަތިސް ނޫހުގެ އިތުރުން ފުރަދާނަ ނޫހަށް އޭނާ ލިޔުއްވިއެވެ. މީގެ އިތުރުން ފިޔެސް މަޖައްލާގެ އެޑިޓަަރު ކަމާއި މަސްއޫލުވެރިކަން ކުރައްވާފައިވެއެވެ.
ޝިޔާމް ލިޔުއްވި ބައެއް ފޮތްތަކުގެ ތެރޭގައި އޭނާގެ އެންމެ ފުރަތަމަ ވާހަކަފޮތް، "އިބްރާހީމްގެ ހުވަފެން" އަދި ސިނަމާލެ ބްރިޖާ ބެހޭ ގޮތުން ލިޔުއްވި ފޮތާއި "އެމްޓީސީސީގެ ކާމިޔާބު 40 އަހަރު" ފޮތް ފާހަގަކޮށްލެވެއެވެ.
މީގެ އިތުރުން، 2022ވަނަ އަހަރުގެ ރޯދަމަހާ ދިމާކޮށް، 30 ކުރުވާހަކަ ވެސް އޭނާ ނެރުއްވިއެވެ.