ދިވެހި ކުންފުންޏަކުން އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލައެއްގައި ގެއްލުން ލިބުނު މީހުން ހޯދަން ފުލުހުން އިއުލާންކޮށްފިއެވެ.
ފުލުހުން ކުރި އިއުލާނެއްގައި ބުނީ އެ މައްސަލައިގެ ތުހުމަތު ކުރެވެނީ ކިންގްސްޓަން ހޯލްޑިންގްސް މޯލްޑިވްސް ޕްރައިވެޓް ލިމިޓެޑް ކިޔާ ކުންފުންޏަކަށް ކަމަށެވެ.
އެހެންވެ، ކިންގްސްޓަންއިން ސައިކަލު ގަތުމުގައި މަކަރާއި ހީލަތުގެ އަމަލެއްގެ ޝިކާރައަކަށް ވެފައިވާ އިތުރު އެއްވެސް މީހަކު ހުރި ނަމަ، ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅައި އެ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.
ކިންގްސްޓަންއިން ސައިކަލު ގަންނަން ފައިސާ ދެއްކުމުން ސައިކަލު ނުލިބޭތީ ބަޔަކު އެއްވެސް ނުރުހުން ފާޅުކުރަނީ: ފުލުހުން އަންނަނީ އެ މައްސަލަ ތަހުގީގު ކުރަމުން -- ސަން ފޮޓޯ
ބިޒްނަސް ޕޯޓަލްއިން ދައްކާ ގޮތުގައި އެ ކުންފުނީގެ މެނޭޖިން ޑިރެކްޓަރަކީ އަހުމަދު އާތިފް ހަސަން ކިޔާ މީހެކެވެ. އަދި ޑިރެކްޓަރުންގެ ބޯޑުގައި އޭނާގެ އިތުރުން ހަސަން ހުސައިން ކިޔާ މީހަކު ހިމެނޭއިރު، އެ ކުންފުނީގެ ދަށުން އެކި ނަން ނަމުގައި ވިޔަފާރިތައް ހިންގާ ކަމަށް ދައްކައެވެ.
އޭގެ ތެރޭގައި ޗެކްއައުޓް މޯލްޑިވްސް، ކިންގްސްޓަން ޝޯރޫމް، ކިންގްސްޓަން ސާވިސް ސެންޓަރު، ކިންގްސްޓަން ޓެކްނޮލޮޖީސް އަދި ޕެޓް ކިންގްސް ހިމެނެެއެވެ.
ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.
"ސަން" އާ ވާހަކަ ދެއްކި ބައެއް މީހުން ބުނިގޮތުގައި ސައިކަލް ގަތުމަށް ކިންގްސްޓަންއަށް އެ މީހުން ފައިސާ ދެއްކިތާ ގިނަ މަސްތަކެއް ވެފައިވީ ނަމަވެސް ސައިކަލް ހަވާލުކޮށްފައެއް ނުވެއެވެ. އަދި ސައިކަލް ދޭނެ ކަމަށް ބުނެ އެކި ތާރީހުތައްދީ އޮޅުވާލާފައިވާ ކަމަށް ބައެއް މީހުން ބުންޏެވެ.
މި މައްސަލަ ބޮޑުވެ ގިނަ ބަޔަކު ކިންސްޓަންގެ ފިހާރަތައް ކުރިމަތީ އެއްވެ ނުރުހުން ފާޅުކުރާތާ ވެސް ދުވަސްތަކެއް މިވަނީ ވެފައެވެ.