ވ. ބޮޑުމޮހޮރާއިން ބަނގުރާ ފުޅިތަކަކާ އެކު ތިން މީހަކު މިއަދު ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ތިން މީހުން ހައްޔަރު ކުރީ ބޮޑުމޮހޮރާގައި ބަންގުރާ ގެންގުޅޭ ކަމަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓާއި އިންޓެލިޖެންސްގެ އިތުރުން ވ. އަތޮޅުގެ ފުލުހުން ގުޅިގެން ހިންގި އޮޕަރޭޝަނެއްގައި ކަމަށެވެ.
ފުލުހުން ހާމަކުރި މައުލޫމާތުގައިވާ ގޮތުން އެ މައްސަލާގައި ހައްޔަރުކޮށްފައި ވަނީ:
- އަހްމަދު އަޝްރަފް، ކ. މާލެ. މ. ލަކްސް ގާޑެން (43 އ)
- އަމްޖަދު މުޙައްމަދު، ގދ. ތިނަދޫ، ބްލޫހެވަންއާގެ (50 އ)
- ނަލިން އިންޑިކާ ކޮޑިކާރަ، ސްރީލަންކާ (53 އ)
މި މައްސަލައާ ގުޅިގެން ބޮޑުމޮހޮރާ ބަލައި ފާސްކުރި އިރު 24 ފުޅި ބަންގުރާ ފެނިފައިވާ ކަމަށް ފުލުހުން ބުނެފައިވެއެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ބޮޑުމޮހޮރާއަކީ ރިޒޯޓެއް ތަރައްގީ ކުރުމަށް ދޫކޮށްފައި އޮތް ރަށެކެވެ.
މަސްތުވާތަކެތީގެ މައްސަލަތަކުގައި ހައްޔަރު ކުރާ މީހުންގެ އަދަދު ވަނީ އިންތިހާއަށް އިތުރުވެފައެވެ. މި ފަދަ މައްސަލަތައް މަދު ކުރުމަށް މި ފަހުން ފުލުހުން ވަނީ ހައްޔަރު ކުރާ މީހުންގެ ވަނަވަރު ހާމަކުރަން ފަށާފައެވެ.