ވިނަރެސް ފްލެޓަށް އެދި ހުށަހެޅުމުގެ ފުރުސަތު ރާއްޖޭގެ ކޮންމެ ރައްޔިތަކަށް ވެސް ހުޅުވާލާފައި ވާކަމަށް ބުނެ ދައުރު ކުރާ މެސެޖަކީ ފޭކު މެސެޖެއް ކަމަށް ފުލުހުން މިއަދު ބުނެފިއެވެ.
ފުލުހުން ބުނީ މި މެސެޖު ދައުރުކުރަނީ ވިނަރެސް ފްލެޓަށް އެދި ހުށަހެޅުމުގެ ފުރުސަތު ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ)ން ހުޅުވާލައިފައިވާ ކަމަށްބުނެ، ލިންކެއް ހިމެނޭ ގޮތަށް ކަމަށެވެ.
އަދި މި ލިންކު މެދުވެރިކޮށް ފޭސްބުކް އަދި އިންސްޓަގްރާމް ހެކުކޮށް، ފްރެންޑް ލިސްޓުގައިވާ ފަރާތްތަކުގެ އަތުން ފައިސާ ހޯދަމުންދާކަން ފާހަގަ ކުރެވިފައި ވާކަމަށް ފުލުހުން ވަނީ ބުނެފައެވެ.
މިފަދަ ލިންކުތަކަށް ސަމާލުވުމަށް ފުލުހުން ވަނީ އިލްތިމާސްކޮށްފައެވެ.
ސަރުކާރުގެ އެކި ކުންފުނިތަކުގެ ނަމުގައި ވެސް ދަނީ ސްކޭމް މެސެޖުތައް ދައުރުކުރަމުންނެވެ.
މަކަރާއި ހީލަތުން ފައިސާ ހޯދުން ރާއްޖޭގައި އާންމުވެފައިވާއިރު، އެކި ދުވަސްވަރު އެކި އުކުޅުތައް ބޭނުންކޮށްގެން ދަނީ މި ފަދަ ކަންކަން ހިންގަމުންނެވެ.
އެގޮތުން އެންމެ އާންމު އުކުޅުތަކެއްގެ ގޮތުގައި ފާހަގަވަނީ، ބޭންކުގެ ނަމުގައި ސްކޭމް ކުރުމާއި ސޯޝަލް މީޑިއާ އެކައުންޓުތައް މެދުވެރިކޮށް ސްކޭމް ކުރުމެވެ.
ވައިބާ ހެކްކޮށްގެން ސްކޭމް ކުރުމުގެ މައްސަލައެއް ވެސް މިފަހުން ފެންމަތިވިއެވެ.
މިދިޔަ އަހަރު އޮޅުވާލައިގެން ފައިސާ ހޯދުމުގެ 1،661 މައްސަލައެއް ފުލުހަށް ރިޕޯޓުކޮށްފައިވާއިރު، އެ ސްކޭމްތަކުން 20 މިލިއަން ރުފިޔާ ގެއްލިފައި ވާކަމަށް ފުލުހުން ވަނީ މީގެ ކުރިން ބުނެފައެވެ.