އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ, މެދުއިރުމަތި ގެންދަނީ ބޮޑު ހަނގުރާމައަކާ ދިމާއަށް ކަމަށާއި ނަތަންޔާހޫގެ ބޭނުމަކީ ޣައްޒާގައި ހަމާސްގެ އަތްދަށުން އިސްރާއީލު ސިފައިންނަށް ލިބެމުންދާ ނާކާމިޔާބީތައް ފޮރުވުމަށްޓަކައި އީރާނާ ދެކޮޅަށް އެމެރިކާ ލައްވައި ހަނގުރާމައެއް ފަށައި އީރާނުގެ ނިއުކްލިޔާ ރިއެކްޓަރުތައް ހަލާކުކޮށްލުންކަމަށް އެމެރިކާގެ މަޝްހޫރު ނޫސްވެރިޔާ އަދި މުޙައްލިލު ތޯމަސް ފްރައިޑްމަން ވިދާޅުވެއްޖެއެވެ.
އެމެރިކާގެ "ނިޔުޔޯކް ޓައިމްސް" ގައި އޭނާ ލިޔުއްވާފައިވާ އާޓިކަލް އެއްގައިވާގޮތުން ނަތަންޔާހޫގެ ބޭނުމަކީ މުޅި ސަރަހައްދުގައި ހުޅުޖެހުމެވެ. އަދި އޭނާގެ ހަގީގީ ލަނޑުދަނޑިއަކީ އެމެރިކާ ލައްވައި އީރާނުގެ ނިއުކްލިޔާ މަރުކަޒުތަކަށް ބޮންއަޅައި އީރާނުގެ ނިއުކްލިޔާ ބާރުތައް އެއްކޮށް ފުނޑާލުމެވެ.
އީރާނުގެ ހަގިގީ ބާރަަކީ އެގައުުމުން ތަރައްގީކޮށްފައިވާ ނިއުކްލިޔާ ޓެކްނޮލޮޖީކަމަށާއި އީރާން އޮތީ ނިއުކްލިޔާ ބޮން ހަދާފައިވާކަން ނުވަތަ ނޫންކަން ސާފުނުވާ ހާލަތުގައިކަމަށް އޭނާ ދެކެވަޑައިގަންނަވައެވެ. އީރާނަކީ ބޭނުންވެއްޖެނަމަ ހަފުތާއެއް ނޫނީ ދެ ހަފުތާ ތެރޭގައި ނިއުކްލިޔާ ބޮން އުފެއްދުމުގެ ގާބިލްކަން މިހާރު ލިބިފަައިވާ ގައުމެއްކަމަށް ދާދިފަހުން އެމެރިކާގެ ޚާރިޖީ ވަޒީރު އެންޓަނީ ބްލިންކެން ވަނީ ވިދާޅުވެފައެވެ.
ބްލިންކެން ވިދާޅުވެފައިވާގޮތުގައި ޓްރަމްޕްގެ ވެރިކަމުގައި އީރާނުގެ ނިއުކްލިޔާ އެއްބަސްވުން އުވާލުމުގެ ކުރިން އީރާން އޮތީ ނިއުކްލިޔާ ޓެކްނޮލޮޖީގައި މިއަށްވުރެ މާ ފަހަތުގައެވެ. އޭރު އީރާން އޮތީ ބޭނުންވެއްޖެނަމަ ދެމަހާއި ތިން މަސްތެރޭގައި ނިއުކްލިޔާ ބޮން އުފެއްދޭ ހާލަތުގައި ކަމަށާއި އީރާނުން ނިއުކްލިޔާ ބޮމާ ދިމާއަށް އަވަސް ފިޔަަވަޅުތަކެއް އެޅި ޓްރަމްޕްގެ ދުވަސްވަރު އީރާނާ ދެކޮޅަށް އެމެރިކާ ހަނގުރާމައެއް ފަށާފާނެކަމުގެ ބިރަށްކަމަށް ރިޕޯޓްތައް ބުނެއެވެ.
ތޯމަސް ފްރައިޑްމަން އަކީ އިސްރާއީލަށް ތާއީދު ކުރައްވާ އަދި އެމެރިކާއަށް ބާރާއި ނުފޫޒު ފޯރުވާފައިވާ ޔަހޫދީ ލޮބީއަށް ނިސްބަތްވާ ލިޔުންތެރިއެކެވެ. ނަމަވެސް ފްރައިޑްމަން އަކީ ނަތަންޔާހޫގެ ހަރުކަށި ސިޔާސަތަށް ފާޑުވިދާޅުވާ ބޭފުޅެކެވެ. އިސްރާއީލަށް އަމާންކަން ލިބޭނީ ފަލަސްތީނަށްވެސް ދައުލަތެއް އުފައްދައިގެންކަމަށް ގަބޫލުކުރައްވާ ބޭފުޅެކެވެ.
ފްރައިޑްމަން ދެކެވަޑައިގަންނަވާ ގޮތުގައި ހަމާސް ބަލިނުކުރެވުމުން އެކަން ފޮރުވުމަށްޓަކައި ޣައްޒާގެ ހޮސްޕިޓަލްތަކާއި ސްކޫލްތަކާއި އާންމުންގެ ގެދޮރަށް ބޮންއަޅައި އެތަންތަން ހަލާކުކޮށް ޣައްޒާގެ އާންމުންގެ ނަސްލު ނައްތާލުމާއި ހަނގުރާމައިގެ ޖަރީމާ ހިންގުމުގެ ސިޔާސަތެއް ނަތަންޔާހޫ ގެންގުޅުމަކީ ދުނިޔޭގައި އެމެރިކާއާއި އިސްރާއީލުގެ އަގުވެއްޓި އިސްރާއީލާ އަދި ޔަހޫދީންނާމެދު މުޅި ދުނިޔޭގައި ނުރުހުމާއި ނަފްރަތު އުފެދިގެންދިޔަ ކަމެކެވެ.
ނަތަންޔާހޫގެ އަނިޔާވެރިކަމުން މުޅި ދުނިޔޭގައިވެސް އެމެރިކާއާއި އިސްރާއީލަށް ނަފްރަތު ކުރުމުގެ ރޫހެއް އުފެދިފައިވާކަމަށާއި ދެވަނަ ބޮޑު ހަނގުރާމައިގައި ޖަރުމަނުގެ ނާޒީ ލީޑަރު އެޑޮލްފް ހިޓްލަރު ޔަހޫދީންނާ ދެކޮޅަށް ހިންގި ހޮލޮކޯސްޓްގެ ޖަރީމާތަކާ ގުޅިގެން މިއޮތް ހުރިހާ ދުވަހު ޔަހޫދީންނަށް ދުނިޔޭގައި ލިބިފައިވާ ހަމްދަރުދީ ނަތަންޔާހޫގެ އަނިޔާވެރިކަމާއި ޣައްޒާގެ އާންމުންނާ ދެކޮޅަށް އިސްރާއީލު ހިންގަމުން ގެންދާ ގަތުލުއާންމުތަކުގެ ސަބަބުން މިހާރު ގެއްލިފައިވާ ކަމަށް ފްރައިޑްމަން ވަނީ ވިދާޅުވެފައެވެ.
"ނިޔުޔޯކް ޓައިމްސް"ގައި ފްރައިޑްމަން ލިޔުއްވާފައިވާ އާޓިކަލްގައިވާ ގޮތުން މީގެ ދެތިން މަސްކުރިން އިސްރާއީލުން ސޫރިޔާގައިވާ އީރާނުގެ ކޮންސިއުލޭޓަށް ހަމަލާދީ އީރާނުގެ ހަތް މީހަކު މަރާލީވެސް ސަރަހައްދީ ހަނގުރާމައަކަށް އީރާން ވެއްދުމުގެ ރޭވުމުގެ ދަށުންނެވެ. އެހަމަލާއަށް ބަދަލު ނުހިފައިފިނަމަ އީރާނުގެ އަގު ވެއްޓޭނެތީ ބަދަލުހިފަން އީރާނަށް މަޖުބޫރުވާނެކަމަށް ބަލައިގެންނެވެ.
ބަދަލު ހިފުމަށްޓަކައި އީރާނުން އިސްރާއީލަށް ދޭ ހަމަލާތަކާއެކު ސަރަހައްދީ ހަނގުރާމައެއްގެ ހުޅަގަނޑު ރޯވެ އެހަނގުރާމައިގެ ތެރެއަށް އެމެރިކާ ވެއްދުމަށް ނަތަންޔާހޫ އާއި އޭނާގެ ވަށައިގެން އެނބުރޭ އިސްރާއީލުގެ ހަރުކަށި ވޯ ކެބިނެޓުން ރޭވިކަމަށާއި ނަމަވެސް ރޭވިގޮތަށް އެކަން ނުދިޔައީކަމަށް ފްރައިޑްމަން ފާހަގަ ކުރައްވައެވެ.
އެކަން އެގޮތަށް ނުދިޔައީ ސަރަހައްދީ ހަނގުރާމައެއް ފެށުމަކީ އީރާނަށްވެސް އަދި އެމެރިކާއަށްވެސް މަސްލަހަތު ހުރި ކަމަކަށް ނުވާތީއާއި މިއީ އެމެރިކާގެ ރިޔާސީ އިންތިޚާބުގެ ދުވަސްވަރުކަމުންކަން ފްރައިޑްމަންގެ އާޓިކަލްގައި ފާހަގަ ކުރައްވާފައިވެއެވެ. އަދި ސަރަހައްދީ ހަނގުރާމައެއް ފެށިއްޖެނަމަ އެކަމުގެ ޖިއޮޕޮލިޓިކަލް ފައިދާ ރަޝިއާއާއި ޗައިނާ ނަގާނެކަން އެމެރިކާއަށް އެނގޭތީއެވެ.
އެމެރިކާގެ ސްޓްރެޖިސްޓުން ދެކޭގޮތުގައި ޗައިނާ އަސްކަރީ ގޮތުންނާއި އިގްތިސާދީގޮތުން އެމެރިކާއާ ވާދަކުރާ ފެންވަރަށް ދެމިގަތީ ޓެރަރިޒަމާ ދެކޮޅަށް ހަނގުރާމަ ކުރުމުގެ ނަމުގައި 2001 ން 2022 އަށް ކުރި ދިގުލީ ހަނގުރާމައާ ގުޅުގެންނާ އަދި އިރާގަށް އަރައިގަތުމުގެ ނަތީޖާއެއްގެ ގޮތުން އިރާގުގައި އުފެދުނު އައިއެސް ޖަމާއަތާ ދެކޮޅަށް ކުރި ދިގުލީ ހަނގުރާމަތަކުގައި އެމެރިކާގެ ދެއަތް ބަނދެވިފައި އޮތުމުގެ ނަތީޖާއެއްގެ ގޮތުންނެވެ.
ހަމާސްގެ ލީޑަރު އީރާނުގައި ހުންނަވަނިކޮށް އަވަހާރަކޮށްލުމަކީ ސަރަހައްދީ ހަނގުރާމައެއް ފެށުމަށް ނަތަންޔާހޫ ރޭވި ދެވަނަ ރޭވުންކަމަށް ފްރައިޑްމަން ދެކެވަޑައިގަންނަވައެވެ.
ހަމާސްގެ ލީޑަރު އިސްމާއީލް ހަނިއްޔާ ތެހެރާންގައި އަވަހާރަކޮށްލުމަކީ އެއްގާގަނޑުން ދެ ދޫނި މަރާލުންފަދަ ކަމެއްކަމަށާއި މިއީ މިކަމަށް އިސްރާއީލަށް ރައްދު ނުދީ އީރާނަށް ނޯވެވޭ ވަރުގެ އީރާނުގެ ޝަރަފާއި ކަރާމާތާ ގުޅުންހުރި ކަމެއްކަން ނަތަންޔާހޫއަށް އެނގޭކަމަށް ފްރައިޑްމަން ސިފަކުރައްވާފައިވެއެވެ. އަދި ރައްދު ނުދީފިނަމަ އިސްރާއީލުގެ ނުރައްކާ އީރާނަށް އިންތިހާއަށް ބޮޑުވެ ދެން އިސްރާއީލު ފާޅުގައި ދިމާކުރާނީ އީރާނުގެ ލީޑަރުންނާކަން އީރާނަށް އެނގޭކަމަށް ފްރައިޑްމަން ދެކެވަޑައިގަންނަވައެވެ.
އީރާންވަނީ ހަމާސްގެ ލީޑަރު އިސްމާއީލް ހަނިއްޔާ އަވަހާރަކޮށްލުމަށް ޓެރަރިސްޓް ހަމަލާދިނީ އިސްރާއީލުކަމާއި އެއީ އެމެރިކާއަށް އެނގިގެން އެމެރިކާ ފަހަތުގައި އޮވެގެން ހިންގި ޖަރީމާއެއްކަމަށް ބުނެ އިސްރާއީލާ ދެކޮޅަށް ބަދަލުހިފުމުގެ ވަރުގަދަ ހަމަލާތަކެއް ދޭނެކަމުގެ އިންޒާރު ދީފައެވެ.
ފްރައިޑްމަން އޭނާގެ އާޓިކަލްގައި ވިދާޅުވެފައިވާ ގޮތުގައި ނަތަންޔާހޫ އުންމީދުކޮށްގެން ހުންނަނީ އީރާނުން އިސްރާއީލަށް ދޭ ރައްދު ހަމަލާތަކާއެކު އެމެރިކާ ސަރަހައްދީ ހަނގުރާމައެއްގެ ތެރެއަށް ވެއްދޭވަރުވާނެ ކަމަށެވެ.
މިކަމަށްޓަކައި އީރާނުގެ ރައްދު ހަމަލާއަށްފަހު އީރާނަށާއި އީރާނުގެ މަދަދުލިބޭ ހިޒްބުﷲ އާއި ހޫޘީންނާ އަދި އިރާގުގެ އިސްލާމީ މުގާވަމާ ޖަމާއަތްތަކަށް އިސްރާއީލުން ވަރުގަދަ ހަމަލާތަކެއް ދޭނެކަމަށާއި އެހަމަލާތަކަށް އީރާނާއި އީރާނުގެ ބައިވެރިން އަނެއްކާ ރައްދުދޭންފެށުމުން އިސްރާއީލުގެ ހިމާޔަތުގައި އެމެރިކާ ހަނގުރާމައިގެ ތެރެއަށް ވަންނާނެކަމަށް ނަތަންޔާހޫ އުންމީދުކޮށްގެން ހުރިކަމަށް ފްރައިޑްމަން ދެކެވަޑައިގަންނަވައެވެ.
އެެމެރިކާ ހަނގުރާމައިގެ ތެރެއަށް ވައްްދާނީ އީރާނާއި ހިޒްބުﷲ އާއި ހޫޘީންނާ އަދި ހަމާސްގެ ހަމަލާތައް ދިގިދެމިގެން ގޮސްފިނަ އިސްރާއީލު އަމިއްލައަށް ދިފާއު ނުކުރެެވޭނެތީ އިސްރާއީލުގެ ހިމާޔަތުގައި ކަަމަށްވެސް ފްރައިޑްމަން ދެކެވަޑައިގަންނަވައެވެ.
އެމެރިކާއާއި އީރާން އާ ދެމެދު ހަނގުރާމައެއް ފެށިއްޖެނަމަ އެކަން ނިމޭނީ އީރާނުގެ ހުރިހާ ނިއުކްލިޔާ މަރުކަޒުތަކެއް ފުނޑާލައި އީރާން މުޅިން އިނދަޖެހިގެންކަމަށާއި ނިއުކްލިޔާ ބާރުތައް ގެއްލިއްޖެނަމަ ސަރަހައްދުގައި އީރާނަށް ލިބިފައިވާ ބާރާއި ހައިބަތު ގެއްލުނީ ކަމަށް ނަތަންޔާހޫ ދެކޭކަމަށް ފްރައިޑްމަން ވިދާޅުވެފައިވެއެވެ.
އިސްރާއީލަކީ ސަރަހައްދުގައި އޮންނަ ހަމައެކަނި ނިއުކްލިޔާ ބާރުކަމަށްވާން އެމެރިކާވެސް އަދި އިސްރާއީލުވެސް ބޭނުންވެއެވެ. އިރާގާއި ސޫރިޔާގެ ނިއުކްލިޔާ ރިއެކްޓަރުތަކަށް ބޮންއަޅައި އިސްރާއީލުން އެތަންތަން ހަލާކުރީ އެމެރިކާ އަޑީގައި އޮވެގެންކަމަށްވަނީ ބެލެވިފައެވެ.
ލީބިޔާގެ ނިއުކްލިޔާ ރިއެކްޓަރު ރޫޅާލައި ނިއުކްލިޔާ ޓެކްނޮލޮޖީ ނެތްގައުމަކަށް ލީބިޔާ ހެދީ ގައްޒާފީގެ ބޮލަށް ވަދެެގެން އެމެރިކާއިން ލީބިޔާއާ ގުޅުންތައް ރަނގަނޅުކުރާނެކަމުގެ ދަޅަތައް އޭނާއަށް ދައްކައިގެންނެވެ. ނަމަވެސް ލީބިޔާގެ ނިއުކްލިޔާ ބާރުތައް ރޫޅާލިތާ ގިނަ އަހަރުތަކެއްނުވެ ގައްޒާފީ ވަނީ އަވަހާރަކޮށްލާފައެވެ.
އަރަބި ރަބީއުގެ އޮއިވަރުގައި ލީބިޔާގެ ރައްޔިތުން ގައްޒާފީގެ ދިގުލީ ވެރިކަމާ ދެކޮޅަށް ތެދުވިނަމަވެސް ގައްޒާފީ ބަލިކޮށް އޭނާގެ ވެރިކަން ނިމުމަކަށް ގެނައީ ލީބިޔާގެ ދާޚިލީ މައްސަލައިގެ ތެރެއަށް ނޭޓޯ އަސްކަރީ ގޮތުން ވަދެގެނެގެންނެވެ.
އަރަބި ގައުމުތަކަކީ އެމެރިކާއާއި އިސްރާއީލު ދެކެ ބިރަށް ނިއުކްލިޔާ ޓެކްނޮލޮޖީ ތަރައްގީ ކުރަން ކެރޭ ލީޑަރުން މިހާރު ތިބި ގައުމުތަކެއް ނޫނެވެ.