ތެހެރާން (1 އޮގަސްޓް 2024): އިސްރާއީލުގެ ޓެރަރިސްޓް ހަމަލާއެއްގައި ޝަހީދުވި ހަމާސް ޖަމާއަތުގެ ވެރިޔާ އަދި ފަލަސްތީނުގެ ކުރީގެ ބޮޑުވަޒީރު އިސްމާއީލް ހަނިއްޔާގެ ޖަނާޒާގެ އެއްބައި އީރާނުގެ ވެރިރަށް ތެހެރާނުގައި ބޭއްވުމަށްފަހު އޭނާގެ ހަށިކޮޅު ގަތަރުގެ ވެރިރަށް ދައުހާއަށް ގެންގޮސްފިއެވެ. ހަށިކޮޅު ގެންދިޔައީ ގަތަރު އެއާވޭސްގެ ޚާއްސަ މަތިންދާބޯޓެއްގައެވެ.
ހަނިއްޔާގެ ހަށިކޮޅު ހިނަވައި ކަފުންކޮށް ސަންދޯކުގައި އެޅުމަށްފަހު އޭނާގެ ހަށިކޮޅުގެންދިޔައީ ތެހެރާންގެ މަސްޖިދު ޖާމިއުއަށެވެ. އެމިސްކިތުގައި ހަނިއްޔާގެ މައްޗަށް އިމާމުވެ ކަށުނަމާދު ކުރެއްވީ އީރާނުގެ ރޫޙީ ލީޑަރު އަދި އެގައުމުގެ ދީނީ މުރުޝިދު އާޔަތުﷲ އަލީ ޚަމަނާއި އެވެ. އީރާނުގެ ހެޑް އޮފް ސްޓޭޓް އަކީވެސް ޚަމަނާއި އެވެ.
ހަނިއްޔާގެ މައްޗަށް ކުރި ކަށުނަމާދުގައި އެތައް ހާސް ބަޔަކު ބައިވެރިވިއެވެ. މީގެތެރޭގައި އީރާނުގެ ރައީސް ޑރ. މަސްއޫދު ބަޒިޝްކިޔާންގެ އިތުރުން ޕާލަމެންޓްގެ ރައީސް މުހައްމަދު ބާގިރު އާއި އުއްތަމަ ފަނޑިޔާރު ނުވަތަ ޗީފް ޖަސްޓިސް ޣުލާމް ޙުސައިން އާއި އީރާނުގެ އަސްކަރީ އަދި މަދަނީ އިސްވެރިން ބައިވެރިވެވަޑައިގެންނެވިއެވެ. މީގެއިތުރުން ގިނަ އަދަދެއްގެ އާންމުންވެސް ކަށުނަމާދުގައި ބައިވެރިވިއެވެ.
ތެހެރާންގެ މަސްޖިދު ޖާމިއުގައި ހަނިއްޔާގެ މައްޗަށް ކަށުނަމާދު ކުރުމަށްފަހު އޭނާގެ ހަށިކޮޅު ގެންދިޔައީ އީރާނުގެ މަޝްހޫރު އާޒާދު ޓަވަރު ހުންނަ އާޒާދު މައިދާނަށެވެ. މިރަސްމިއްޔާތުގައިވެސް އެތައް ހާސްބަޔަކު ބައިވެރިވެ އިސްރާއީލުގެ އަނިޔާވެރިކަމާ ދެކޮޅަށް އަޑުއުފުލިއެވެ. އަދި މިރަސްމިއްޔާތުގައި ހަމާސްގެ ބައެއް މަސްއޫލުވެރިންނާއި އީރާނުގެ ބައެއް މަސްއޫލުވެރިން ތަގްރީރު ކުރެއްވިއެވެ.
އާޒާދު މައިދާނަށް ގެންދިޔުމަށްފަހު ދެން ހަނިއްޔާގެ ހަށިކޮޅު ގެންދިޔައީ ތެހެރާން އިންޓަނޭޝަނަލް އެއާޕޯޓްއަށެވެ. އެއީ ގަތަރަށް ގެންދިޔުމަށްޓަކައެވެ. ގަތަރަށް ގެންދިޔުމަށްފަހު ހަނިއްޔާގެ ހަށިކޮޅު ގެންދިޔައީ ގަތަރުގެ އެންމެ ބޮޑު މިސްކިތްކަމަށްވާ އިމާމު މުހައްމަދު ބިން އަބްދުލްވައްހާބު މިސްކަތަށެވެ. އެމިސްކިތުގައި މާދަމާކުރާ ހުކުރު ނަމާދަށްފަހު ވެސް ހަނިއްޔާގެ މައްޗަށް ކަށުނަމާދު ކުރާނެއެވެ. އެއަށްފަހު ވަޅުލުމަށް ހަމަޖެހިފައިވަނީ ގަތަރުގެ އަލްވަސީލު ގަބުރުސްތާނުގައި ކަމަށް އަލްޖަޒީރާ ބުނެއެވެ.
އީރާނާއި ގަތަރުގެ އިތުރުން ދުނިޔޭގެ އެތައް ގައުމެއްގައި ވެސް ހަނިއްޔާގެ މައްޗަށް ޣައިބުގައި ކަށުނަމާދު ކުރާގޮތަށްވަނީ ހަމަޖެހިފައެވެ. ބައެއް ގައުމުތަކުގައި މިހާރުވެސް ވަނީ ހަނިއްޔާގެ މައްޗަށް ކަށުނަމާދުކޮށްފައެވެ.
އީރާނުގެ އިސް އެތައް މަސްއޫލުވެރިއަކުވަނީ ހަނިއްޔާގެ މަރަށް ބަދަލުހިފުމުގެ ގޮތުން ޔަހޫދީ ޒަޔަނިސްޓް އިސްރާއީލަށް ވަރުގަދަ ރައްދެއް ދޭނެކަމުގެ އިންޒާރު ދެއްވާފައެވެ. އިންޒާރު ދެއްވި ބޭފުޅުންގެ ތެރޭގައި އީރާނުގެ ދީނީ މުރުޝިދާއި ރައީސްގެ އިތުރުން ޕާލަމެންޓްގެ ރައީސް އާއި އީރާނުގެ ސިފައިންގެ ވެރިޔާ އާއި އީރާނުގެ އެލީޓް ފޯސްކަމަށްވާ އިންގިލާބީ ލަޝްކަރުތަކުގެ ވެރިޔާވެސް ހިމެނެއެވެ.
މީގެކުރިންވެސް އީރާންވަނީ އިސްރާއީލުން ސޫރިޔާގައިވާ އީރާނުގެ ކޮންސިއުލޭޓަކަށް އިސްރާއީލުން ހަމަލާދިނުމުން އޭގެ ރައްދުގައި ތިން ހާހަށްވުރެ ގިނަ ބަލިސްޓިކް މިސައިލާއި ޑްރޯން އަދި ކްރޫޒް މިސައިލުން އިސްރާއީލަށް ހަމަލާދީފައެވެ.