ޓޫރިސްޓު ވިސާގައި ރާއްޖެ އައިސް، މަސްވެރިކަން ކުރަން އުޅުނު ނޯވޭ މީހަކު ޑީޕޯޓުކޮށްލައިފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައިވަނީ، އެ ފަތުރުވެރިޔާ ރާއްޖެ އައީ މިދިޔަ އަހަރުގެ ޑިސެމްބަރު 20ގައި ކަމަށެވެ. އޭނާ ވިސާގެ މުއްދަތު ހަމަވުމުން ވެސް އަނބުރާ ގައުމަށް ނުގޮސް، ރާއްޖޭގެ ބޯޓެއްގައި މަސްވެރިކަމުގެ މަސައްކަތްކޮށް، ދިރިއުޅެމުންދާ ކަމަށް އެ އިދާރާއަށް މައުލޫމާތު ލިބިފައިވާ ކަމަށް އިމިގްރޭޝަނުން ބުންޏެވެ.
އެހެންވެ، މިދިޔަ މަހުގެ 25ގައި ފުލުހުންގެ އެހީތެރިކަމާއެކު އޭނާ އިމިގްރޭޝަން ބެލުމުގެ ދަށަށް ގެންގޮސް، އިމިގްރޭޝަންގެ ގާނޫނާ ޚިލާފުވެފައި ވާތީ އޭނާ މިހާރު ޑީޕޯޓްކޮށްފައިވާ ކަމަށް އެ އިދާރާއިން ބުންޏެވެ.
ރާއްޖޭގައި ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ބޮޑުވެ، ސަރުކާރުން އަންނަނީ ރާއްޖޭގައި އުޅޭ ބިދޭސީންގެ މައުލޫމާތު އެއްކުރުމުގެ މަސައްކަތް ކުރަމުންނެވެ.
މީގެ އިތުރުން ރާއްޖޭގައި ގަވައިދާ ޚިލާފަށް މަސައްކަތް ކުރާ ބިދޭސީން ހޯދައި ފިޔަވަޅު އެޅުމުގެ މަސައްކަތް އިމިގްރޭޝަނުން އަންނަނީ ކުރަމުންނެވެ.