ރާއްޖޭގެ މަޝްހޫރު މިޔުޒިކް ބޭންޑް "ސްކައިރޮކް" ގެ ލަވަތައް ހިމެނޭގޮތުން ރޭ އޮލިމްޕަހުގައި ބޭއްވި "ސަމުގާ" ތިއެޓްރިކަލް ހުށަހެޅުމަކީ މިފަހުން ދިވެހި މިޔުޒިކް ބޭންޑަކުން ބޭއްވި އެންމެ ފެންވަރު ރަނގަޅު އެއް މިޔުޒިކް ޝޯއެވެ.
ތިންކް އާއި ސްކައިރޮކް ގުޅިގެން ހުށަހެޅި މި ޝޯގައި ކުޅުނު ސްކައިރޮކްގެ 10 ލަވައިން ކިޔައިދިން ވާހަކަޔަށް އިތުރު ފުރިހަމަކަން ގެނެސްދިނީ ކުޅަދާނަ ފަންނާނު މުންކޮ ތައްޔާރުކޮށްފައިވާ ތިއޭޓާ ޙަރަކާތްތަކުންނެވެ. މުންކޮގެ ޒުވާން ފަންނުވެރީންގެ ހުށަހެޅުންތަކުން ސްކައިރޮކްގެ ލަވަތައް މެދުވެރިކޮށް ކިޔައިދެމުންދިޔަ ވާހަކަ ވަރަށް ފުރިހަމައަށް ސިފަކޮށްދިނެވެ.
ސްކައިރޮކް ބޭންޑަކީ މިހާރު ޒުވާނުންގެ މެދުގައި ވަރަށް މަޤްބޫލު ބޭންޑެކެވެ. އެ ބޭންޑްގެ ހުނަރުވެރި މެމްބަރުން ކަމުގައިވާ ހުސެން، އިނާން، ފައި، އިންޝާ، ޒަޔާން އަދި ފައްފު ގުޅިގެން ސަމުގާ އަލްބަމް އުފެއްދުމުގެ މަސައްކަތް 2018 ގައި ވަނީ ފަށާފައެވެ. ފާއިތުވި ފަސް އަހަރުގެ ތެރޭގައި އެ ބޭންޑުން ސަމުގާ އަލްބަމަށް އުފައްދާފައިވާ އަމިއްލަ ލަވަތަކުގެ ތެރޭގައި އިރު، ހޭވައްލާ ތައްޔާރު، ރޭވަ، ބަރަވެލި ބަބުރު، މަޅި، ސަމުގާ، ރައްކަލެއް، ވާރޭގާ، އަދި ސިކުންތު ހިމެނެއެވެ.
މީގެތެރެއިން ހޭވައްލާ ތައްޔާރު އާއި ރޭވަ ވަނީ ސިންގަލްސްގެ ގޮތުގައި މީގެ ކުރިން ރިލީސްކޮށްފައެވެ. އަދި ސްކައިރޮކްގެ ޝޯތަކުގައި މި ލަވަތަކަށް ބޮޑު ތަރުޙީބެއް ވަނީ ލިބިފައެވެ. ރޭ ބޭއްވި ސަމުގާ ޝޯގައި މި ހުރިހާ ލަވައެއް، ބޮޑު އެއްވާހަކައިގެ ގޮތުގައި ލައިވްކޮށް ހުށަހަޅައިދިނެވެ.
ޓިކެޓް ވިއްކައިގެން ބޭއްވި މި ޝޯގެ އޯޕަނިންގް އެކްޓުގެ ގޮތުގައި މަޝްހޫރު ލޫޕް މިޔުޒީޝަން ޔޫސުފްގެ ސޯލޯ ލަވަތައް ހުށަހެޅިއެވެ. އެއަށްފަހު ސްކައިރޮކްގެ ސަމުގާ އަލްބަމްގެ ލަވަތައް ގަޑިއެއްހާއިރަށް ކުރިއަށް ދިޔައެވެ. ހައުސްފުލް މި ޝޯ ބެލުމަށް ދިޔަ މީހުންގެ ފަރާތުން ހުށަހެޅުންތަކަށް ބޮޑު ތަރުޙީބެއް ލިބުނެވެ.
ސްކައިރޮކްގެ ސަމުގާ އަލްބަމްގެ ހުރިހާ ލަވަތަކެއް މިއަދުން ފެށިގެން ހުރިހާ މިޔުޒިކް ޕްލެޓްފޯމްތަކުން އަޑުއެހޭނެކަމަށް ސްކައިރޮކް ބޭންޑުން ބުނެއެވެ.