ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލި ރ. މީދޫ, ފެންފިޔާޒުގޭ, މުހައްމަދު އަނަސްއަށް އިންސާފު ނުލިބި ހަތް އަހަރު ފުރުމުގެ ހިތާމައިގައި މުޅި މީދޫ އަނދިރިކޮށް، އިންސާފަށް އެދި އަޑު އުފުލައިފިއެވެ.
މީދޫ މީހަކު "ސަން"އަސް ބުނި ގޮތުގައި، އަނަސް މަރާލި ވަގުތާ އެއްވަގުތެއްގައިހެން މިރޭ 15 މިނެޓަށް މީދޫގެ ހުރިހާ މަގު ބައްތިތަކެއް ނިއްވާލައި މުޅި ރަށް ވަނީ އަނދިރިކޮށްލައިފައެވެ. އެއީ މިރޭ 09:15އިން 09:30 އަށެވެ.
އިންސާފު ނުލިބި އަނަސްގެ މަރަށް ހަތް އަހަރު ފުރިފައިވާތީ، ގިނަ ބަޔަކު އަންނަނީ ސޯޝަލް މީޑިއާގައި ވެސް ކަންބޮޑުވުން ފާޅުކުރަމުންނެވެ.
ސޯޝަލްމީޑިއާގެ އެރަށުގެ ރައްޔިތެެއް ހިއްސާކުރި ޕޯސްޓެއްގައި ބުނީ މި ހަރަކާތުން ދައްކުވައިދިނީ އަނަސްގެ މަރުގެ ޚަބަރާއެކު މީގެ ހަތް އަހަރު ކުރިން، އެރޭ އެރަށަށް ކުރިމަތިވި ބަނަކަމާއި އަނދިރިކަން ކަމަށެވެ.
މީދޫގައި މަގުބައްތިތައް ނިއްވާލުން: މީދޫގެ ރައްޔިތުން ވަނީ އަނަސްގެ މަރަށް އިންސާފު ހޯދައި ދިނުމަށް ގޮވާލާފައި -- ފޮޓޯ/ ފައިނު އޮންލައިން
އޭނާ ބުނީ މިއަދުވެސް އިންސާފު ނުލިބި ރައްޔިތުން ތިބީ އެ އަނދިރިކަމުގައި ކަމަށެވެ.
އެރަށުގެ ރައްޔިތުން ދަނީ ހަތް އަހަރު ވީއިރުވެސް ރައްޔިތުންގެ ހިތްތަކުން އެ ބިރުވެރި ހިތާމަވެރި ހިނދުކޮޅު ފިލައިގެން ނުދާކަން ހާމަކޮށް އަނަސްގެ ހަނދާނުގައި ޝުއޫރު ފާޅުކުރަމުންނެވެ.
ލިޓަސް ސާވިސް ސެންޓަރު ތެރޭގައި އަނަސްއަށް ހަމަލާދީ މަރާލާފައިވަނީ ޖުލައި 31، 2017ގައެވެ.
ސައިކަލުތަކެއްގައި އައި ބަޔަކު އަނަސްއަށް ހަމަލާދޭ ވީޑިއޯ ވެސް މީސްމީޑިއާގައި އާންމުވިއިރު އެ މައްސަލައިގައި މިދިޔަ ފެބްރުއަރީ މަހު 25ގައި ކްރިމިނަލް ކޯޓުން ހުކުމްކުރީ އެކަށިގެންވާ ވަރަށް ހެކި ނެތުމުން ތުހުމަތުވާ އެންމެން މިނިވަން ކުރުމަށެވެ.
ރ. މީދޫ ފެންފިޔާޒުގޭ މުހައްމަދު އަނަސް -- ސަން ފޮޓޯ
އެ މައްސަލައިގައި ދައުވާކޮށްފައި ވަނީ ލ. ގަން، ނަންނާރިގެ ޖުނައިހު އަބްދުﷲ އާއި ސ. ފޭދޫ ވެސްޓަންވިލާ ހަސަން މަހްފޫޒާއި ދަފްތަރު ނަމްބަރު 1746 ސިމާހު މޫސާއާއި ޅ. ކުރެންދޫ އަސަރުމާގެ އަހުމަދު ޒަޔާނާއި މ. ދިމިޝްގު އުސްމާން ޝަރީފާއި މ. ލޮނުމިދިލިގެ އަފްރާހު އަބްދުއްރައްޒާގު އަދި ތ. ކިނބިދޫ ގުލްފާމްގެ މުހައްމަދު ސާޒްގެ މައްޗަށެވެ.
އަނަސް މަރާލިތާ ހަތް އަހަރު ފަހުން ކޯޓުން އިއްވި ހުކުމުގައި ބުނީ މައްސަލައިގައި ދައުލަތުން ހުށަހަޅާފައިވާ ހެއްކާއި ގަރީނާތަކަށް ރިއާޔަތްކޮށް، އެ ހަތް މީހުން ކުށުގައި ބައިވެރިވާ ކަމަށް އެކަށީގެންވާ ޝައްކެތް ނެތް މިންވަރަށް ސާބިތުވާ ކަމަށް ކަނޑައެޅެން ނެތް ކަމަށެވެ.
މިދިޔަ މެއި މަހު އެ މައްސަލަ ވަނީ ހައިކޯޓުގައި އިސްތިއުނާފުކޮށްފައެވެ.