އިންސާނީ ވަގުފާރި ނުވަތަ ހިއުމަން ޓްރެފިކިން މައްސަލަތަކުގެ ޝަރީއަތްތައް އަވަސްކުރުމަށްޓަކައި ގާނޫނަށް އިސްލާހު ގެންނަންޖެހޭ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
މިނިސްޓަރު އިހުސާން މިފަދައިން ވިދާޅުވީ އިންސާނީ ވަގުފާރިއާ ދެކޮޅަށް މަސައްކަތްކުރާ ބައިނަލްއަގުވާމީ ދުވަސް ފާހަގަކުރުމަށް މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުންނެވެ.
އިހުސާން ވިދާޅުވީ، ރާއްޖޭގައި މީހުން ޓްރެފިކް ކުރުމަށް ކުރެވޭ މަސައްކަތްތައް ހުއްޓުވުމުގެ ގޮތުން ހަތަރު ސިޔާސަތެއް އެކުލަވާލާފައިވާނެ ކަމަށާއި މިހާރު އެ ސިޔާސަތުތަކާ އެއްގޮތަށް މަސައްކަތްކުރުމަށް ފަށައިފައިވާނެ ކަމަށެވެ.
އެގޮތުން މީހުން ޓްރެފިކްކުރުން ހުއްޓުވުމަށްޓަކައި ހުށަހަޅާ ސިޔާސަތުގައި އެންމެ ބޮޑަށް އަލިއަޅުވާލާފައިވާނީ ލާމަރުކަޒީ އުސޫލުން ކަންކަންކުރަން ހުރި މުއައްސަސާތަކުގެ މެދުގައި މަސައްކަތަށް ގާބިލު މީހުން ބިނާކުރުމަށް ކަމަށް އިހުސާން ވިދާޅުވިއެވެ. އަދި އެފަރާތްތަކުގެ ބައިވެރިވުން އިތުރުކޮށް، ރާއްޖޭގައި މީހުން ޓްރެފިކް ކުރާގޮތާ ގުޅިގެން އާއްމު މައުލޫމާތުތަކަށް މީހުން އަހުލުވެރިކުރުވުމުގެ މަސައްކަތް ވެސް މި ސިޔާސަތުގެ ދަށުން ކުރާނެ ކަމަށް މިނިސްޓަރު ވިދާޅުވިއެވެ.
ބައިނަލްއަގުވާމީ އިންސާނީ ވަގުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް މިއަދު ބޭއްވި ރަސްމިއްޔާތުގެ ތެރެއިން: މިނިސްޓަރު އިހުސާނާއެކު ރަސްމިއްޔާތުގެ ބައިވެރިން ފެންނަ ފޮޓޯއެއް -- ފޮޓޯ/ ހޯމް މިނިސްޓްރީ
ހަމައެއާއެކު ނޭޝަނަލް އެންޓި ޓްރެފިކިން ސްޓިއަރިން ކޮމިޓީ މެދުވެރިކޮށް ޕޮލިސީ ފެންވަރުގައި ނިންމަންޖެހޭ ސިޔާސަތުތައް ނިންމުމާއި އެ ނިންމުންތައް ވީހާވެސް އަވަހަށް ތަންފީޒުކުރުމުގެ މަސައްކަތް ކުރައްވާނެ ކަމަށް އިހުސާން ވަނީ ވިދާޅުވެފައެވެ.
އިހުސާން ވިދާޅުވީ، އިންސާނީ ވަގުފާރި ހުއްޓުވުމަށްޓަކައި ތަހުގީގުތަކާ ދައުވާތައް އަވަސްކުރުމަކީ، މި ސަރުކާރުން ވަރަށް އިސްކަންދީގެން ކުރެވިދާނެ ކަމެއް ކަމަށެވެ.
ޝަރީއަތުގެ ހުރިހާ މަރުހަލާއެއްގައި ޝިކާރައަކަށްވާ މީހާގެ ހައްގުތައް ހިމާޔަތްކޮށް، މިކަމުން މީހާ އިތުރަށް ޕްރިވެންޓްކުރުމަކީ، އަދި ފަރުވާ ދިނުމުގައި ގާނޫނު ތަންފީޒުކުރާ މީހުންނާއި ޝަރުއީ ދާއިރާގެ ދައުރު ފުޅާކޮށް އެކަންކަން މީހުންނަށް އޮޅުންފިލުވައިދިނުމަކީ މީގެ ތެރޭގައި ހިމެނޭ ވަރަށް މުހިންމު ސިޔާސަތެއް، ހޯމް މިނިސްޓަރު އަލީ އިހުސާން
އިހުސާން ވިދާޅުވީ މި މައްސަލައަށް އެންމެ ބޮޑަށް ހުށަހެޅެމުންދަނީ ކުޑަކުދިން ކަމަށެވެ. އެގޮތުން ތަފާސްހިސާބުތަކުން ދައްކާގޮތުގައި މީހުން ޓްރެފިކްކުރުމުގެ ޝިކާރައަކަށްވާ ކޮންމެ ތިން މީހުންގެ ތެރެއިން އެކަކީ ކުޑަކުއްޖެއް ކަމަށް އޭނާ ވިދާޅުވިއެވެ. އަދި އެއީ ކަންބޮޑުވެ، ވިސްނަންޖެހޭ މައްސަލައެއް ކަމަށް ވެސް އިހުސާން ވިދާޅުވިއެވެ.
ބައިނަލްއަގުވާމީ އިންސާނީ ވަގުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް މިއަދު ބޭއްވި ރަސްމިއްޔާތުގެ ތެރެއިން: ރަސްމިއްޔާތުގެ ބައިވެރިން ފެންނަ ފޮޓޯއެއް -- ފޮޓޯ/ ހޯމް މިނިސްޓްރީ
ކުޑަކުދިންނަކީ ގައުމުގެ މުސްތަގުބަލުކަން ފާހަގަކުރައްވާ އިހުސާން ވިދާޅުވީ އެކުދިންނަށް ހައްގުވެގެން ވަނީ ރައްކާތެރިކަމާ، އޯގާތެރިކަމުގެ އިތުރުން ބިރުވެރިކަމުން އެއްކިބާވެފައިވާ މުޖުތަމައުއެއް ފޯރުކޮށްދިނުން ކަމަށެވެ.
މީގެ ތެރޭގައި މަޖުބޫރުން މަސައްކަތްކުރުމާއި، އެކި ބާވަތުގެ ކުށްކުށުގައި ކުޑަކުދިން ބައިވެރިކުރުމާއި، ގާނޫނާ ޚިލާފަށް އެޑޮޕްޓުކުރުމަށް ކުޑަކުދިން ޓްރެފިކް ކުރުމާއި، ޖިންސީ އަނިޔާގެ ޝިކާރައަކަށް ކުޑަކުދިން ހެދުން ހިމެނޭ، ހޯމް މިނިސްޓަރު އަލީ އިހުސާން
މިއަދުގެ ރަސްމިއްޔާތުގައި އިންސާނީ ވަގުފާރި ނުވަތަ ހިއުމަން ޓްރެފިކިން ރިޕޯޓުކުރެވޭނެ ޚާއްސަ ފޯން ލައިނެއް ވަނީ އިފުތިތާހުކޮށްފައެވެ. މި ފޯން ލައިންގެ ނަންބަރަކީ 9193939 އެވެ.
ދުވަހާ ގުޅިގެން މިއަހަރު ކަނޑައަޅާފައިވާ ޝިއާރަކީ "މީހުން އިންސާނީ ވަގުފާރިކުރުން ހުއްޓުވުމަށްކުރާ މަސައްކަތުގައި އެއްވެސް ކުޑަކުއްޖަކު އިސްތިސްނާ ނުކުރުން" އެވެ.