މަޝްހޫރު ޑައިރެކްޓަރު މަދުރު ބަންޑާރުކަރު 2008ވަނަ އަހަރު ގެނެސްދިން ކާމިޔާބު ފިލްމު "ފެޝަން"ގެ ސީކުއަލްއެއް އުފައްދަން ނިންމާފައިވާ ކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ގެނެސްދޭ ނޫސްތަކުގައި ބުނެފައިވާ ގޮތުން މަދުރު ބަންޑާރުކަރު އަންނަނީ މި ފިލްމުގެ ސީކުއަލްގެ ސްކްރިޕްޓް އެކުލަވާލުމުގެ މަސައްކަތް ކުރަމުންނެވެ. ރިޕޯޓުތައް ބުނާގޮތުން "ފެޝަން"ގެ ސީކުއަލް ބިނާކުރުމަށް ނިންމާފައިވަނީ މިހާރުގެ ފެޝަން ދުނިޔެއަށް ކަމަށާއި ފެޝަން އިންޑަސްޓްރީގެ މިހާރުގެ ހާލަތު ދައްކުވައިދޭ ގިނަ ހާދިސާތަކެއް ފެންނާނެ ކަމަށެވެ.
މީގެ 16 އަހަރު ކުރިން މަދުރު ގެނެސްދިން ފިލްމު ވެސް މައިގެނަޑުގޮތެއްގައި ބިނާކޮށްފައިވަނީ ފެޝަން އިންޑަސްޓްރީއަށެވެ. ނަމަވެސް, އޭގެ 16 އަހަރު ފަހުން އައިސްފައިވާ ބަދަލުތަކާ އެކު މި ޒަމާނުގެ ގޮތްގަނޑު ސީކުއަލްއިން ތަޖުރިބާކޮށްލެވޭނެ ކަމަށް ފިލްމީ ޚަބަރުތައް ބުނެއެވެ.
ފިލްމު "ފެޝަން"ގެ ޕޯސްޓަރެއްގައި ބަތަލާ ޕްރިޔަންކާ އަދި ކަންގަނާ--ފޮޓޯ/ބޮލީވުޑްހަންގާމާ
މި ފަހަރުގެ ސީކުއަލްއާ ބެހޭ މާ ގިނަ މައުލޫމާތު ރަސްމީކޮށް ހާމަކޮށްފައިނުވާއިރު މި ސީކުއަލް އުފައްދާނީ ފިލްމެއްގެ ގޮތުގައި ތޯ ނޫނީ ވެބް ސީރީޒްއެއްގެ ގޮތުގައިތޯ ނިންމުމަށް މަޝްވަރާތަކެއް އަންނަނީ ކުރެވެމުންނެވެ. ހަމައެއާއެކު ފިލްމު ސިނަމާތަކުގައި ރިލީޒްކުރުމާ މެދު ވެސް ވަރަށް ގިނަ ފަރާތްތަކާ އެކު މަޝްވަރާތައް ކުރިއަށްދާއިރު ޑިޖިޓަލް ޕްލެޓްފޯމަކުން ފިލްމު ޕްރިމިއާކުރުމުގެ ޝައުގުވެރިކަން ފާޅުކޮށްފައިވާ ކަމަށް ވެސް ރިޕޯޓުތައް ބުނެއެވެ.
ދެ ކެޓެގަރީއަކުން ޤައުމީ އެވޯޑު ލިބުނު ފިލްމު "ފެޝަން"ގެ މުހިއްމު ތަރިންނަކީ ބަތަލާ ޕްރިޔަންކާ ޗޯޕްރާ އަދި ކަންގަނާ ރަނާވަތުއެވެ. ފިލްމުގެ ވާހަކަ ގެނެސްދިން ގޮތުން ވަރަށް ގިނަ ބަޔަކަށް މި ފިލްމު ކަމުދިޔައެވެ. ހަމައެއާއެކު ފިލްމުގެ މިއުޒިކަށް ވެސް އާއްމުންގެ ވަރަށް ބޮޑު މަގުބޫލުކަމެއް ވަނީ ލިބިފައެވެ.