މ. ވޭވަށު ފަރަށް އެރި "މައިނާ އެކެއް" ނަމަކަށް ކިޔާ ސަފާރީ ފުން ނުކުރެވި ގިނައިރުވެ، ސަފާރީގެ ތެރެއަށް ވަދެގެން އޭގެ ތެރޭގައި ހުރި ތަކެތި ހަލާކުވެއްޖެއެވެ.
މިދިޔަ ބުރާސްފަތި ދުވަހުގެ ރޭ ސަފާރީ ފަރަށް އެރިއިރު، 18 ފަތުރުވެރިންނާއި ނުވަ ފަޅުވެރިން އުޅަނދުގައި ތިއްބެވެ.
މައިނާ އެކެއް ސަފާރީގެ މެނޭޖަރު މުހައްމަދު ނާސިރު "ސަން"އަށް ބުނީ ސަފާރީގެ ދެ ތަނެއް ފަޅައިގެންގޮސްފައިވާ ކަމަށާއި، ސަފާރީ އަރިވުމުގެ ސަބަބުން އޭގެ ތެރޭގައި ހުރި ހުރިހާ އެއްޗެއް ހަލާކުވެފައިވާ ކަމަށެވެ.
އޭނާ ބުނީ ސަފާރީ ފަރަށް އެރުމުން އުޅަނދުގައި ތިބި ފަޅުވެރިން ޑައިވިން ލޯންޗުގެއި ވޭވަށަށް ގެންގޮސްފައިވާ ކަމަށެވެ. އަދި ސަފާރީގައި ތިބި ހުރިހާ ފަތުރުވެރިން ރިސޯޓެއްގައި ބޭތިއްބުމަށް ފަހު، ރޭގެ ވަގުތެއްގައި ހުޅުމާލެ ފަޅުގައި އޮތް ސަފާރީއަަކަށް ގެންގޮސްފައިވާ ކަމަށް އޭނާ ބުންޏެވެ.
ނާސިރު ބުނީ ސަފާރީ އަދިވެސް އޮތީ ފަރުގައި ކަމަށާއި، ސަފާރީ ފުން ކުރަން އިތުރު ދެ ދުވަސް ނަގާނެ ކަމަށް ބެލެވޭ ކަމަށެވެ.
މިކަމާ ގުޅިގެން ވޭވަށު ކައުންސިލްގެ ރައީސް މަމްދޫހު ވަހީދު 'ސަން' އަށް ވިދާޅުވީ، އެ ސަފާރީ ފަރަށް އެރީ އެރަށު ބޭރު ފަޅުގައި އަޅާފައި އޮތްވައި ރޭ އައި ވިލާގަނޑެއްގައި ސަފާރީގެ ނަގިލި ކަހާލައިގެން ކަމަށެވެ.
އެ މައްސަލައާ ގުޅިގެން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވަނީ، އެ ހާދިސާއާ ގުޅޭ ގޮތުން އިތުރަށް ހޯދަން ޖެހޭ މައުލޫމާތު ހޯދާނެ ކަމަށް ވިދާޅުވެފައެވެ.