އޭޑީކޭ ހޮސްޕިޓަލްގެ ސީނިއާ ނިއުރޯސާޖަނެއްގެ ގޮތުގައި މަސައްކަތްކުރެއްވި، ރާއްޖޭގައި މި ވަގުތު ހުރި އެ ދާއިރާގެ އެންމެ ތަޖުރިބާކާރު ޑޮކްޓަރު، އަލީ ނިޔާފް މިއަދު އޭޑީކޭއިން ވަކިވެވަޑައިގެންފިއެވެ.
ނުވަ އަހަރާއި 10 މަހަށް ފަހު އޭނާ އޭޑީކޭއިން ވަކިވެވަޑައިގެންކަން އޭޑީކޭއިން ވަނީ ހާމަކޮށްފައެވެ.
އަލީ ނިޔާފަކީ ރާއްޖޭގެ ފުރަތަމަ ނިއުރޯސާޖަންއެވެ.
އޭނާ ވަނީ އެމެރިކާ، ރަޝިއާ، އިންޑިއާ، ބްރެޒިލް، ނޭޕާލް އަދި އެހެން ގިނަ ގައުމުތަކަކުން ވެސް ތައުލީމާއި ތަމުރީނު ހާސިލުކުރައްވައިފައެވެ. އަދި، 2،000 އަށްވުރެ ގިނަ ނިއުރޯސާޖަރީ ކާމިޔާބުކަމާ އެކު ފުރިހަމަކުރައްވާފައިވެއެވެ.
ނިޔާފް، އޭޑީކޭއިން ވަކިވެވަޑައިގެން ސަބަބެއް ނޭނގުނު ނަމަވެސް އޭޑީކޭއިންވަނީ އޭނާގެ ޚިދުމަތަށް ޝުކުރު އަދާކުރައްވައިފައެވެ.
އޭޑީކޭގެ ކުޑަކުދިންގެ ޑޮކްޓަރު، ނިޔާފުގެ ބޭބެ ޑރ. އަބްދުﷲ ނިޔާފު ވަނީ ނިޔުރޯސާޖަން ނިޔާފާ އެކު އައިޖީއެމްއެޗުގެ ނިޔުރޯސާޖަރީ ޑިޕާޓުމެންޓަށް ކުރިއެރުން އަންނާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.
އެކަމަކު، އައިޖީއެމްއެޗުގައި ނިޔާފު ބަލިމީހުން ބައްލަވަން ފައްޓަވާނެ ދުވަހެއް ނޭނގެއެވެ.
ފާހަގަކޮށްލެވޭ ގޮތުގައި ޑރ. ނިޔާފް، މޯލްޑިވްސް ނިއުރޯ އެންޑޮކްރައިން މެޑިކަލް ފެސިލިޓީގައި ވެސް ބައްލަވާނެއެވެ.
އެ ފެސިލިޓީން މީސްމީޑިއާގައި ކުރި ޕޯސްޓެއްގައި ބުނީ، މިއަދުން ފެށިގެން އެ ތަނުގައި ނިޔާފް ބަލިމީހުން ބައްލަވަމުން ގެންދަވާނެ ކަމަށެވެ. އަދި، އެޕޮއިންޓްމަންޓު ހަދަން ބޭނުންވާ މީހުން 7744515 ނަންބަރަށް ގުޅަން ވަނީ އެދިފައެވެ.