ތައިލޭންޑުގެ ވެރިކަންކުރާ ބެންކޮކްގެ ލަގްޒަރީ ހޮޓަލެއްގެ ކޮޓަރިއެއްގައި މަރުވެފައި ތިބި ހަ މީހުން ފެނިއްޖެއެވެ.
ތައި ފުލުހުން ޝައްކުކުރާ ގޮތުގައި އެމީ ހުން މަރުވީ ވިހައެއް ބޭނުންކުރުމުންނެވެ.
ބެންކޮކްގެ މެޓްރޮޕޮލިޓަން ޕޮލިސް ކޮމިޝަނަރު ތީޓީ ސައެންގްސަވަންގް ވިދާޅުވި ގޮތުގައި އެ މީހުން މަރުވެފައި ތިއްބައި ފެނުނީ ގްރޭންޑް ހަޔަޓް ހޮޓަލުގެ ފަސްވަނަ ފަންގިފިލާގެ ކޮޓަރިއަކުންނެވެ. އެ މީހުން މަރުވިކަން އެނގުނީ ޗެކްއައުޓް ވާންޖެހޭ ގަޑިއަށް ޗެކްއައުޓްނުވެ، 24 ގަޑިއިރަށްވުރެ ގިނައިރުވުމުން މުވައްޒަފަކު އެ ކޮޓަރިއަށް ގޮސް ބެލި ބެލުމުންނެވެ.
ފުލުހުން ބުނީ، އެ ހާދިސާއަކީ ފޭރުމުގެ ހަދިސާއެއް ކަމަށް ނުފެންނަ ކަމަށާއި، އެއްވެސް ހަށިގަނޑަކުން ޖިސްމާނީ އަނިޔާއެއް ލިބިފައިވާކަމުގެ އެއްވެސް އަލާމާތެއް ވެސް ނުފެންނަ ކަމަށެވެ. އަދި، އެ މީހުން އަމިއްލައަށް ހަށިގަނޑަށް ގެއްލުމެއް ދިފައިވާކަމުގެ ނިޝާނެއް ވެސް ފެންނަން ނެތް ކަމަށް ފުލުހުން ބުނެއެވެ.
ނަމަވެސް، ސައެންގްސަވަންގް ވިދާޅުވި ގޮތުގައި އެ ކޮޓަރީގައި ހުދު ކުލައިގައި ހުރި ފުށެއްގެ އަސަރު ހުރި ތަށިތަކެއް ހުރި ކަމަށާއި އޭގެ އިތުރުން އޯޑަރުކޮށްފައި ހުރި ކާނާ ވެސް ހުއްޓެވެ. އެހެންވެ، އެ މީހުން މަރުވީ ވިހައެއް ބޭނުންކޮށްގެން ކަމަށް ވަރަށް ބޮޑަށް ބެލެވޭ ކަމަށް ކޮމިޝަނަރު ސައެގްސަވަންގް ވިދާޅުވިއެވެ.
ކަމާބެހޭ ފަރާތްތަކުން މިހާރު ދަނީ ހޮޓަލުގެ ބުކިންގް ހެދި ހަތްވަނަ މީހާ ހޯދުމުގެ މަސައްކަތް ކުރަމުންނެވެ. އެ މީހުން މަރާލީ އޭނާ ކަމަށް ޝައްކު ކުރެވޭ ކަމަށް އެ ފަރާތްތަކުން ބުނެއެވެ.
އެ ހާދިސާގައި ހަތަރު ވިއެޓްނާމް މީހުން މަރުވެފައިވާ ކަމަށް ފުލުހުން ބުނެފައިވާއިރު، މަރުވި އަނެއް ދެ މީހުންނަކީ އެމެރިކާ ދެ މީހުން ކަމަށް އެމެރިކާގެ ސްޓޭޓް ޑިޕާޓްމަންޓުން ވަނީ ބުނެފައެވެ.