ހެއްވާ މަޖާ ފިލްމުތައް ބެލުންތެރިންނަށް ގެނެސްދީފައިވާ ޕްރޮޑިއުސަރު ސާޖިދު ނަދިއަދުވާލާގެ ކާމިޔާބު ފްރެންޗައިސް "ހައުސްފުލް"ގެ ފަސްވަނަ ފިލްމަށް އެކްޓަރު ސަންޖޭ ދަތު ސޮއިކޮށްފައިވާކަން އިއުލާނުކޮށްފިއެވެ.
މަޝްހޫރު ގިނަ ފިލްމީ ތަރިންތަކެއް ފެންނާނެ ކޮމެޑީ ފިލްމު "ހައުސްފުލް 5"އިން ސަންޖޭއާ އެކު ފެންނާނެ މުހިއްމު ތަރިންގެ ތެރޭގައި އަކްޝޭ ކުމާރު، ރިތޭޝް ދޭޝްމުކް އަދި އަބީޝެކް ބައްޗަން ހިމެނެއެވެ.
މި ފިލްމުގެ މުހިންމު ރޯލެއް މީގެ ކުރިން އެކްޓަރު އަނިލް ކަޕޫރަށް ހުށަހެޅި ނަމަވެސް އަނިލް ކަޕޫރު ވަނީ ފަހުން ފިލްމުން ވަކިވެފައެވެ. ރިޕޯޓުތައް ބުނާ ގޮތުން ސަންޖޭއަށް ހުށަހެޅި ރޯލަކީ ކުރިން އަނިލް ކަޕޫރު ކުޅެން އެއްބަސްވި ރޯލެވެ.
ސަންޖޭ ދަތު ފިލްމަށް ގެންނަން ނިންމި ނިންމުމާ ބެހޭގޮތުން ޕްރޮޑިއުސަރު ސާޖިދު ނަދިއަދުވާލާ ބުނެފައިވަނީ، ސަންޖޭއަކީ އާއިލާ މެންބަރެއްހާ ގާތް މީހެއް ކަމަށާއި މީގެ ކުރިން ވެސް ސަންޖޭއާ އެކު ފިލްމެއްގެ މަސައްކަތް ކުރަން ވަރަށް މަސައްކަތް ކުރި ކަމަށެވެ.
ނަމަވެސް، އެކިއެކި ސަބަބުތަކާ ހެދި ސަންޖޭއާ އެކު މަސައްކަތް ނުކުރެވި އޮތުމަށް ފަހު ފިލްމު "ހައުސްފުލް5"އިން އެ ހުވަފެން ހަގީގަތަކަށްވާނެ ކަމަށެވެ.
ސަންޖޭ ދަތު ޕްރޮޑިއުސަރު ސާޖިދު ނަދިއަދުވާލާއާ އެކު--ފޮޓޯ/ބޮލީވުޑްހަންގާމާ
މި ފިލްމުގައި ހިމެނޭ ފިރިހެން އެކްޓަރުންގެ ނަންތައް ހާމަކޮށްފައިވީ ނަމަވެސް ފިލްމުގައި ފެންނާނެ ބަތަލާއިންނަކީ ކޮބައިކަން އަދި ކަށަވަރެއް ނުވެއެވެ. އަންނަ އަހަރުގެ ޖޫން މަހުގެ 6ގައި ފިލްމު ރިލީޒް ކުރާނެކަން އިއުލާނުކޮށްފައިވާއިރު މި ފިލްމުގެ މަސައްކަތް ކުރިޔަށް އޮތް އޮގަސްޓް މަހުތެރޭ ފެށުމަށް އަންނަނީ ތައްޔާރުވަމުންނެވެ.
މިދިޔަ އަހަރު ފިލްމު "ޖަވާން" އަދި ތެލުގޫ ފިލްމު "ލިއޯ"ގެ ރޯލަކުން ސަންޖޭ ފެނިފައިވާއިރު ތެލުގޫ ސައިންސް ފިކްޝަން އެކްޝަން ފިލްމު "ޑަބަލް އައިސްމާޓް"އިން އަންނަ މަހު ސަންޖޭދަތު ބެލުންތެރިންނަށް ފެންނާނެއެވެ. މި ފިލްމު ރިލީޒްކުރުމަށް ތާވަލުކުރެވިފައިވަނީ އޮގަސްޓް މަހުގެ 15ގައެވެ.