ފަލަސްތީނުގެ ރައްޔިތުންނަށް އެހީވުމަށްޓަކައި ގައުމީ ފެންވަރުގައި ކުރިއަށްގެންދިޔަ 'ފަލަސްތީނާއެކު ދިވެހީން' ޓެލެތޯނަށް ލިބުނު 19 މިލިއަނަށް ވުރެ ގިނަ ރުފިޔާ ޕީއެސްއެމްއިން ފޮރިން މިނިސްޓްރީއާ މިއަދު ހަވާލުކޮށްފިއެވެ.
'ފަލަސްތީނާއެކު ދިވެހީން' ޓެލެތޯނަށް ލިބުނު ފައިސާ ހަވާލުކުރުމަށް ބޭއްވުނު ނޫސްވެރިންގެ ބައްދަލުވުމުގައި ޕީއެސްއެމްގެ އެމްޑީ ޒީނާ ޒާހިރު ވަނީ ޓެލެތޯނުން ލިބުނު 19 މިލިއަނަށް ވުރެ ގިނަ ރުފިޔާގެ ޗެކު ފޮރިން މިނިސްޓަރު މޫސާ ޒަމީރާ ހަވާލުކުރައްވާފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޒީނާ ވިދާޅުވީ ޓެލެތޯނަށް ލިބުނީ މުޅި ޖުމުލަ 19,186,851.50 (ނަވާރަ މިލިއަން އެއްލައްކަ އަށްޑިހަ ހަ ހާސް އަށް ސަތޭކަ ފަންސާސް އެއް ރުފިޔާ ފަންސާސް އެއް ލާރި) ކަމަށެވެ.
ޓެލެތޯން އަށް ޖުމުލަ 19 މިލިއަން އަށްވުރެ ގިނަ ރުފިޔާ، މިނިސްޓަރީއާ ހަވާލުކޮށްފި-- މޫސާ ނަދީމް
ޒީނާ ވިދާޅުވީ ފައިސާ ގުނުމުގެ މަސައްކަތް ކުރިއަށް ގެންދިޔައީ ޓެެލެތޯންގެ އިންޑިޕެންޑެންޓް އެޑިޓަރު ސީއެސްއާރު ކްރޯ މޯލްޑިވްސް، ބީއެމްއެލް އަދި ޕީއެސްއެމްގެ މުވައްޒަފުންގެ އެހީތެރިކަމާއެކުގައި ކަމަށެވެ.
ޓެލެތޯންގެ ކަންކަން ހިނގައިދިޔަ ގޮތާ ގުޅޭގޮތުން ކްރޯ މޯލްޑިވްސްގެ މެނޭޖިން ޑިރެކްޓަރު ޙަސަން މުޙައްމަދު ވިދާޅުވީ ޓެލެތޯން މިހާރު އެއްކޮށް ރިވިއުކޮށް ނިމިފައިވާ ކަމަށެެވެ.
އޭނާ ވިދާޅުވީ މި މަސައްކަތަކީ ވަރަށް ދެފުށްފެންނަ ގޮތަކަށް، އެކިއުރޭޓްކޮށް ކުރިއަަށް ގެންދިޔަ މަސައްކަތެއް ކަމަށެވެ.
އޭނާ ވިދާޅުވީ ޕީއެސްއެމް އެކައުންޓަށް ޓްރާންސްފާގެ ގޮތުގައި ހަމައެކަނި 15 މިލިއަނަށް ވުރެ ގިނަ ރުފިޔާ ލިބުނު ކަމަށާއި، ފަންޑުފޮށިތަކަށް އެއް މިލިއަން ރުފިޔާއަށް ވުރެ ގިނަ ރުފިޔާ ޖަމާވިކަމަށެވެ.
ޓެލެތޯނަށް ލިބުނު ފައިސާގެ ތެރޭގައި 49,800 ޑޮލަރު ހިމެނެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފޮރިން މިނިސްޓަރު މޫސާ ޒަމީރު ވިދާޅުވީ މި ޓެލެތޯނަކީ ރައީސް ޑރ. މުހައްމަދު މުއިއްޒުގެ އިސް ނެންގެވުމަކަށް ބޭއްވި ޓެލެތޯނެއް ކަމަށެވެ.
ފޮރިން މިނިސްޓަރު މޫސާ ޒަމީރު-- ފޮޓޯ: މޫސާ ނަދީމް
"ދިވެހި ރައްޔިތުންނަކީ ފަލަސްތީނުގެ ރައްޔިތުންނާ، ހިތާހިތުން ގުޅިފައި ތިބޭ ބައެއް. ކޮންމެ ދުވަހަކު ވެސް އަޅުގަނޑުމެން ވެސް، އަޅުގަނޑުމެންގެ ދަރިން ވެސް ފަލަސްތީނަށް ލިބޭ އަނިޔާތަކާ، އެ ކެކުޅުންތައް އަބަދު ވެސް އިޙުސާސްކުރެވޭ،" ޒަމީރު ވިދާޅުވިއެެވެ.
މި ޓެލެތޯނުން ލިބޭ ފައިސާ ފަލަސްތީނަށް ދިނުމަށް ހަމަޖެހިފައިވަނީ ފޮރިން މިނިސްޓަރީ އާއި ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުވާ) މެދުވެރިކޮށެވެ.