ކިޔަވައިގެން ނުކުންނަ ކުދީންނަށް ޚާއްޞަކޮށް ގެދޮރުވެރިކަމާއި، އާމްދަނީ ހޯދޭނެ ފުރުސަތުތައް ފަހިކޮށްދެއްވުމަށް މަސައްކަތްޕުޅު ކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ މިއަދު ހެނދުނު ސެންޓާ ފޯ ހަޔާ އެޑިއުކޭޝަން (ސީއެޗްއެސްއީ)އަށް 45 އަހަރު ފުރުން ފާހަގަ ކުރުމަށް އެ ސެންޓަރުގައި ކުރިއަށް ގެންދިޔަ ޚާއްސަ އެސެމްބްލީގައި ބައިވެރިވެ ވަޑައިގެން ވާހަކަފުޅު ދައްކަވަމުންނެވެ.
ހުޅުމާލޭގައި ހުންނަ ސީއެޗްއެސްއީ އިމާރާތުގައި ބޭއްވި މި އެސެމްބްލީގައި ރައީސް ވިދާޅުވީ ކިޔަވާ ކުދިންނަށް ވެސް ދިމާވެފައިވާ ގެދޮރުގެ ދަތިކަން ވަރަށް ރަނގަޅަށް އެ މަނިކުފާނަށް އެނގިވަޑައިގަންނަވާ ކަމަށެވެ. މި ހުރިހާ ދަތިތަކެއްގެ ތެރެއިން ވެސް އަމިއްލަ ނަފުސުގެ މައްޗަށް އިތުބާރު އޮވެ، ކުރިޔަށްދިއުމުގެ އަޒުމުގައި ގަދައަޅައި މަސައްކަތް ކުރަންޖެހޭނެ ކަމަށް ރައީސް ވިދާޅުވިއެވެ. އަދި އެ މަސައްކަތް އެ ގޮތަށް ކުރަންވާނީ ކެތްތެރިކަމާ އެކުގައި ކަމަށް ވެސް އެ މަނިކުފާނު ވަނީ ވިދާޅުވެފައެވެ.
ރައީސް ޑރ. މުޙައްމަދު މުއިއްޒު: ސީއެޗްއެސްއީއަށް 45 އަހަރު ފުރުން ފާހަގަކުރުމަށް ބޭއްވި އެސެމްބްލީ -- ފޮޓޯ/ ރައީސް އޮފީސް
ކިޔަވައިގެން ނުކުންނަ ކުދީންނަށް ޚާއްޞަކޮށް ގެދޮރުވެރިކަމާއި، އާމްދަނީ ހޯދޭނެ ފުރުސަތުތައް ފަހިކޮށްދެއްވުމަށް މަސައްކަތްޕުޅު ކުރައްވާނެކަމަށް އެމަނިކުފާނު ވަނީ ވިދާޅުވެފައެވެ.
"ތިމަންނާއަކަށް ނުވާނޭ، ތިމަންނާއަކީ އެހާ މޮޅު ކުއްޖެއް ނޫނޭ ކިޔާފައި ގިވްއަޕް ކުރުމަކީ އެއްވެސް ކަމެއް ހާސިލްވާނެ ކަމެއް ނޫން. ގިވްއަޕް ނުކުރާތި، އެއްވެސް އިރަކު، އެއްވެސް ކަމެއްގައި އުންމީދު ކަނޑާލައިގެން ނުވާނެ" ރައީސް ވިދާޅުވިއެވެ.
ރައީސް ވިދާޅުވި ގޮތުގައި ކާމިބީއާއި ނާކާމިޔާބީގެ ދެމެދުގައިވާ ތަފާތަކީ ލިބޭ ފުރުސަތުގެ ބޭނުން ހިފުމެވެ. އަމިއްލަ ނަފުސަށް އިތުބާރުކޮށް، ވަރުގަދަ އަޒުމަކާ އެކު، ލިބޭ ފުރުސަތުގެ ބޭނުން ހެޔޮ ގޮތުގައި ހިފުމަށް ރައީސްވަނީ ދަރިވަރުންނަށް ނަސޭހަތްތެރިވެ ވަޑައިގެންފައެވެ.
"ތިމަންނާގެ ކިބައިގައި އެބަހުއްޓޭ އެ ކަމެއް ހާސިލް ކުރުމުގެ ފެންވަރު. އެ ގެރެންޓީ، އެ ކޮންފިޑެންސް އަމިއްލަ ނަފުސަށް އޮންނަން ޖެހޭނެ. އެއީ ކުޑަކުޑަ ކަމެއް ވިޔަސް. ހަޔާތުގައިި އަންނާނެ ވަރަށް ގިނަ ކަންތައްތައް. އެހެން ނަމަވެސް އެއިން ކޮންމެ ކަމެއް ވެސް ހާސިލްވާނީ އަމިއްލަ ނަފުސު ދެކެ އިތުބާރު ކުރެވިގެން،" ރައީސް ވިދާޅުވިއެވެ.
ބޭނުންވާ ނަތީޖާ ހާސިލްނުވެ، މާޔޫސްވާ ވަގުތު ވެސް އަންނާނެ ކަމަށާއި، އެހެން ނަމަވެސް އެ ވަގުތުގައި އުންމީދު ކަނޑާލައިގެން ނުވާނެކަން ރައީސް ފާހަގަ ކުރެއްވިއެވެ. ރައިސް ވިދާޅުވި ގޮތުގައި މި ކަންތައްތަކާ އެކު ދިރިއުޅުން ކުރިޔަށް ގެންދިއުމުގެ މަސައްކަތް ކޮށްފިނަމަ، ﷲ މަތިވެރި ކަންތައްތައް މިންވަރު ކުރައްވަވާނެއެވެ.
އަޅުންނަށް އޮތީ މަސައްކަތްކުރުމާއެކު ﷲއަށް ދުޢާ ދެންނެވުންކަން ފާހަގަ ކުރައްވައި ރައީސް ވިދާޅުވީ އެ ގޮތަށް ކަންކުރާނަމަ، އިރާދަ ކުރެއްވިއްޔާ ކޮންމެ ކަމެއްގައި ވެސް ކާމިޔާބީ ލިބޭނެ ކަމަށެވެ.
ރައީސްގެ ވާހަކަފުޅުގައިވަނީ ގަދައަޅައި މަސައްކަތް ކުރުމަށް ދަރިވަރުންނަށް އަގުހުރި ނަސޭހަތްތަކެއް ދެއްވާފައެވެ.