ކޮޕާ އެމެރިކާ ފުޓްބޯޅަ މުބާރާތުގެ ގްރޫޕް އޭގައި ކޮންކާކަފް ސަރަހައްދަށް ނިސްބަތްވާ ކެނެޑާ އަތުން ޕެރޫ ބަލިވެއްޖެއެވެ.
ކެންސަސް ސިޓީގެ ޗިލްޑްރެންސް މާސީ ޕާކް ސްޓޭޑިއަމްގައި ކުޅުނު މި މެޗު ކެނެޑާއިން ކާމިޔާބު ކޮށްފައިވަނީ 1-0 އިންނެވެ.
މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. ނަމަވެސް، ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބިގެންދިޔަކަން ފާހަގަކޮށްލެވެވުނެވެ.
މެޗުގައި ލަނޑެއް ޖެހުމަށް ޕެރޫއިން ކުރަމުންދިޔަ މަސައްކަތަށް ހުރަސް އެޅިގެންދިޔައީ މެޗުގެ 54 ވަނަ މިނެޓުގައި މިގުއެލް އަރައުހޯ ކެނެޑާގެ ޖޭކޮބް ޝަފެލްބާގްއަށް ކުރި ފައުލަކާ ގުޅިގެންނެވެ. މި ފައުލާ ގުޅިގެން މެޗުގެ ރެފްރީ އެންމެ ފުރަތަމަ އަރައުހޯއަށް ރީނދޫ ކާޑު ދެއްކި ނަމަވެސް ވީއޭއާރުން ބެލުމަށް ފަހު އެ ކާޑުވަނީ ރަތް ކާޑަކަށް ބަދަލުކޮށްފައެވެ. އެހެންވެ. މެޗުގެ ބާކީ އޮތް ބައި ޕެރޫއަށް ކުޅެއް ޖެހުނީ އެއް ކުޅުންތެރިއެއް މަދުކޮށެވެ.
އެ ކަމުގެ ފައިދާ ނަގައި ކެނެޑާއިން ވަނީ 74 ވަނަ މިނެޓުގައި ލަނޑެއް ޖަހާ މެޗުގެ ލީޑު އެ ޓީމުން ނެގުމެވެ. މި ލަނޑު އެ ޓީމަށް ޖަހައިދިނީ ޖޮނަތަން ޑޭވިޑެވެ. މި ލަނޑާ އެކު ކެނެޑާއިން ހަމަޖެހިލިއިރު ޕެރޫއިން ވަނީ ލަނޑެއް ޖެހޭތޯ ކުރަމުންދިޔަ މަސައްކަތް އިތުރުކޮށްފައެވެ.
ނަމަވެސް، މެޗު ނިމިގެންދިޔައީ އެ ޓީމަށް އެކަން ކާމިޔާބު ކުރެވޭގޮތްނުވެ، މެޗުން ކެނެޑާ ކުރި ހޯދައިގެންނެވެ.
މި ކާމިޔާބީގެ ސަބަބުން ކެނެޑާއަށް މިހާރު ވަނީ ގްރޫޕް އޭގައި މިހާތަނަށް ކުޅުނު ދެ މެޗުން ލިބުނު ތިން ޕޮއިންޓާ އެކު ގްރޫޕްގެ ދެވަނައަށް ކުރިއަށް ޖެހިލައިފައެވެ. ޕެރޫ އުޅެނީ ފުރަތަމަ މެޗުގައި ޗިލީއާއި ކުޅެ އެއްވަރުވި މެޗުން ލިބުނު އެއް ޕޮއިންޓާ އެކު ގްރޫޕްގެ އެންމެ ފުލުގައެވެ.