ޑިންގީއެއްގައި ސޯމާލީއާ ތިން މީހުން ނ. އަތޮޅުގެ ރަށަކަށް މިއަދު ލައްގައިފިއެވެ.
އެ މީހުން ލެއްގީ ނ. ވަވަތި ކިޔާ ފަޅުރަށަކަށެވެ.
ފުލުހުން މިއަދު ބުނީ، ވަވައްޗަށް ޑިންގީއެއް ލައްގާފައިވާ ކަމަށާއި އޭގައި ސޯމާލިއާއަށް ނިސްބަތްވާ ތިން މީހުން ތިބި ކަމަށް މައުލޫމާތު ލިބިފައިވާ ކަމަށެވެ.
އެކަމަކު، އޭގެ އިތުރަށް ފުލުހުން އެއްވެސް ތަފުސީލެއް ދީފައެއް ނުވެއެވެ.
ސޯމާލިއާ މީހުން ދަތުރުކުރި ކަމަށް ބުނާ ޑިންގީ: ޑިންގީގައި ތިން މީހުން ތިބި -- ފޮޓޯ/ ފުލުހުން
ފުލުހުން ހިއްސާކުރި ފޮޓޯއިން ފެންނަނީ އިންޖީނެއް އަޅާފައި އިން ކުޑަ ޑިންގީއެކެވެ.
އެ ތިން މީހުންގެ ހާލާ ގުޅޭ ގޮތުން ފުލުހުން ވަކި އެއްޗެއް ނުބުނި ނަމަވެސް އެ މީހުން ބެންޗެއްގައި ތިބި ފޮޓޯއެއް ހިއްސާކުރިއެވެ. ފޮޓޯއިން ފެންނަ ފެނުމަށް އެ ތިން މީހުންގެ ހާލު ވެސް ރަނގަޅެވެ.
އެ މީހުން ތިބީ ފުލުހުންގެ ބެލުމުގެ ދަށުގައެވެ. ފުލުހުން އަންނަނީ އެ ރަށުގައި ހަރަކާތްތެރިވަމުންނެވެ.
ސޯމާލިއާގެ އިރަށް އެންމެ ގާތުގައި އޮންނަނީ ރާއްޖެއެވެ. އެހެންވެ، އެ ތިން މީހުން ދަތުރުކުރި ޑިންގީއާ އެކު ބެހިގެން ރާއްޖެއަށް ލެއްގީ ކަމަށް ލަފާކުރެވެއެވެ. އެކަމަކު، އެ މީހުން ރާއްޖެއަށް ލައްގަން މެދުވެރިވީ ސަބަބާ ގުޅޭ ރަސްމީ ބަހެއް އަދި ނުލިބެއެވެ.