ޔޫރޯ 2024ގައި ސްވިޒަލެންޑާއި ސްކޮޓްލެންޑު ބައްދަލުކުރި މެޗު 1-1ގެ ނަތީޖާއަކުން އެއްވަރުވުމުން ދެވަނަ ބުރަށް ދެ ޓީމުވެސް އިތުރު އިންތިޒާރެއް ކުރަން ޖެހިއްޖެއެވެ.
މި މެޗުން މޮޅުވި ނަމަ ސްވިޒަލެންޑަށް ދެވަނަ ބުރު ކަށަވަރުވާނެއެވެ. ނަމަވެސް ފޯރިގަދަ މި މެޗު އެއްވަރުވުމާއެކު ދެވަނަ ބުރު ކަށަވަރުކުރަން ދެ ޓީމަށްވެސް ވަނީ ގްރޫޕުގެ ފަހު މެޗަށް އިންތިޒާރުކުރަން ޖެހިފައެވެ.
މެޗުގައި ފުރަތަމަ ލަނޑު ޖެހީ ސްކޮޓްލެންޑުންނެވެ. މެޗުގެ 13 ވަނަ މިނިޓްގައި އެ ޓީމަށް ލީޑު ނަގައިދިނީ ސްކޮޓް މެކްޓޮމިނޭ އެވެ. އޭނާ ފޮނުވާލި ބޯޅަ ގޯލަށް ވަދެފައިވަނީ ސްވިޒަލެންޑުގެ ފަބިއަން ޝާ ގައިގައި ޖެހިފައެވެ.
ސްވިޒަލެންޑުން ނަތީޖާ ހަމަހަމަކޮށްފައިވަނީ މެޗުގެ 26 ވަނަ މިނިޓްގައެވެ. މި ލަނޑު ކާމިޔާބުކުރީ އެ ޓީމުގެ ތަޖުރިބާކާރު ކުޅުންތެރިޔާ ޝަގީރީއެވެ. އޭނާ ލަނޑު ޖެހީ ސްކޮޑްލެންޑް ކުޅުންތެރިން ފަހަތަށް ދިން ބޯޅައެއް ހޯދައިގެން އޭރިޔާ ބޭރުން ފޮނުވާލައިގެންނެވެ.
މެޗުން މޮޅުވާން ދެޓީމަށްވެސް ފުރުސަތުތަކެއް ލިބުނެވެ. އެގޮތުން ކޯނަރަކުން ތަނަވަސްވި ފުރުސަތަކުން ސްވިޒަލެންޑުން ލަނޑެއް ޖެހި ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.
މީގެ އިތުރުން މެޗުގެ 66 ވަނަ މިނިޓްގައި އޭރިޔާ ބޭރުން އަރިމަތިން ލިބުނު ހިލޭ ޖެހުން ގޯލް އޭރިޔާ ތެރެއިން ސްކޮޓްލެންޑް ކުޅުންތެރިން ފޮނުވާލުމުން ކުޅުމުގެ ތެރެއަށް އައީ އަރިމަތީ ދަނޑީގައި ޖެހިފައެވެ.
އަދި މެޗުގެ ފަހުކޮޅު ސްވިޒަލެންޑުގެ ބަދަލު ކުޅުންތެރިޔާ އެމްބޯލޯ ލަނޑެއް ޖެހި ނަމަވެސް ރެފްރީ ނިންމީ އެއީ އޮފްސައިޑު ލަނޑެއްގެ ގޮތުގައެވެ.
ސްކޮޓްލެންޑަށް ކުރިއަށް އޮތީ ހަންގޭރީއާ ވާދަކުރާ މެޗެވެ. ސްވިޒަލެންޑް ވާދަކުރަން ޖެހޭނީ ޖަރުމަނާ އެވެ. މި ދެ މެޗުވެސް ކުޅޭނީ އެއް ގަޑިއެއްގައެވެ.