ހުރިހާ އުމުރަކަށް ހުޅުވާލައިގެން އެލީޓް ރަނާސްއިން މި މަހު 28 ގައި ބާއްވާ 'ހުޅުމާލެ ރަން'ގައި އަދިވެސް ބައިވެރިވެވޭނެ ކަމަށް އެލީޓް ރަނާސްއިން މިއަދު ބުނެފިއެވެ.
މި ދުވުން އޮންނާނީ މި މަހު 28ވާ ހުކުރު ދުވަހު ހުޅުމާލޭ ސެންޓްރަލް ޕާކުގައި ހެނދުނު 6:00 ގައެވެ.
އެލީޓް ރަނާސްއިން ބުނީ، މި ދުވުމަކީ ހުރިހާ ގިންތިއެއްގެ އަދި އުމުރެއްގެ ދުވުންތެރިންނަށް ވެސް ހުޅުވާލައިގެން ބާއްވާ ދުވުމެއް ކަމަށެވެ.
އެލީޓް ރަނާސްއިން ބުނީ، މީގެ ހަތަރު މަސް ކުރިން ފެށިގެން މި ދުވުމުގައި ބައިވެރިވާން ހުޅުވާލައިފައިވާ ކަމަށެވެ. އަދިވެސް އޮންލައިންކޮށް ދުވުމުގައި ބައިވެރިވެވޭނެ ކަމަށް އެލީޓް ރަނާސްއިން ބުންޏެވެ.
މި ދުވުން ފުރަތަމަ ބާއްވަން ހަމަޖެހިފައި އޮތީ މޭ 17 ގައެވެ. އެކަމަކު، ދުވުމަށް ލިބޭ ތަރުހީބުގެ ސަބަބުން ވީހާ ވެސް ގިނަ މީހުންނަށް ދުވުމުގައި ބައިވެރިވުމުގެ ފުރުސަތު ދިނުމުގެ ގޮތުން އެ ދުވުން އޭރު މި މަހަށް ފަސްކުރަން ނިންމީއެވެ.
މި ރޭހާ ގުޅޭ އެކްސްޕޯއެއް މި މަހު 26 ވަނަ ދުވަހުން ފެށީގެން 27 ވަނަ ދުވަހަށް ސޯޝަލް ސެންޓަރުގައި ބާއްވަން ވެސް ވަނީ ނިންމައިފައެވެ.
އެކްސްޕޯގެ ތެރެއިން ރޭހުގައި ބައިވެރިވާ ދުވުންތެރިންނަށް ހިލޭ ޓީޝާޓާއި ދަބަސް ލިބޭނެ ކަމަށާއި ބައިވެރިވާ ކޮންމެ ދުވުންތެރިއަކަށް މެޑަލް ހަވާލުކުރެވޭނެ ކަމަށް ވެސް އެލީޓް ރަނާސްއިން ބުންޏެވެ. މި ދުވުމުގައި، އެއްވަނަ، ދެވަނަ، އަދި ތިންވަނަ ހޮވާނީ ފަސް ކިލޯމީޓަރާއި 10 ކިލޯމީޓަރު ކެޓަރީންނެވެ.
ހުރިހާ އުމުރުފުރައަކަށް ހުޅުވާލައިގެން ކުރިއަށްގެންދާ މި ރޭސް އޮންނާނީ ދެ ކެޓަގަރީއަކަށް ބަހާލައިގެންނެވެ. އެއީ، 12 އަހަރުން ދަށުގެ ކުޑަކުދިންނަށް ޚާއްސަ "ކިޑްސް މައިލް" އަދި 12 އަހަރުން މަތީގެ މީހުންނަށް ފަސް ކިލޯމީޓަރާއި 10 ކިލޯމީޓަރަށް ދުވާ ކެޓަގަރިީއެވެ.
ރެޖިސްޓާ ވާނަމަ ރެޖިސްޓާ ވެވޭނެ އަގުތަކަކީ:
- އެއް މޭލު - 199 ރުފިޔާ
- ފަސް ކިލޯމީޓަރު- 450 ރުފިޔާ
- 10 ކިލޯމީޓަރު- 600 ރުފިޔާ
އެ ދުވުމުން ވަނަތަކަށްދާ ފަރާތްތަކަށް ފައިސާގެ އިނާމު ދިނުމަށް ހަމަޖެހިފައިވެއެވެ. އެގޮތުން 10 ކިލޯމީޓަރުގެ ދުވުމުން އޮވަރޯލް އެއް ވަނައަށް 7500 ރުފިޔާ، ދެވަނައަށް 5000 ރުފިޔާ އަދި ތިން ވަނައަށް 3500 ރުފިޔާ ދިނުމަށް ހަމަޖެހިފައިވެއެވެ.
ފަސް ކިލޯމީޓަރުގެ ދުވުމުން އޮވަރޯލް އެއް ވަނައަށް 5000 ރުފިޔާ، ދެވަނައަށް 3500 ރުފިޔާ އަދި ތިން ވަނައަށް 2500 ރުފިޔާ ދިނުމަށް ހަމަޖެހިފައިވެއެވެ.
ދުވުމުގެ ވަނަތައް އަންހެން، ފިރިހެން އަދި އޮފިސް ކެޓަގަރީން ދޭނެއެވެ.
މި ދުވުމުގެ މެއިން ޕާޓްނަރެއްގެ ގޮތުގައި މަސައްކަތްކުރާނީ ހައުސިން ޑިވޮލޮޕްމަންޓު ކޯޕަރޭޝަން (އެޗްޑީސީ)އާއި މަމްސް އެއިޑް ޖަމިއްޔާއިންނެވެ. ދުވުމުގެ އިތުރު ސްޕޮންސަރުންގެ ތެރޭގައި، ސްޓޭޓް ބޭންކް އޮފް އިންޑިއާ (އެސްބީއައި) ކޮކަކޯލާ ހިމެނެއެވެ.
އެލީޓް ރަނާސްއިން ބުނީ، މި ދުވުން ކޮންމެ އަހަރަކު ވެސް ބާއްވަން ނިންމާފައިވާ ކަމަށާއި ދުވުމުގައި އިލެކްޓްރޯނިކް ޓައިމިންއާއި ރޭސް ރޫޓް މެޕް މެޝާކުރާނެ ކަމަށެވެ. ރޭސް ރޫޓް މެޝާކުރަނީ އެތުލެޓިކްސް އެސޯސިއޭޝަނުންނެވެ.
މިއީ ދުވުންތެރިންނަށް ވަރަށް ރަނގަޅު ދުވުމަކަށްވާނެ ކަމަށް އެލީޓް ރަނާސްއިން ބުންޏެވެ.
އެލީޓް ރަނާސްއަކީ ދުވުންތެރިންނަށް ތަމްރީނު ދިނުމަށް، 2019 ވަނަ އަހަރު އުފައްދާފައިވާ އެސޯސިއޭޝަނެކެވެ.