ޔޫރޯ ފުޓުބޯޅަ މުބާރާތުގެ ގްރޫޕް އޭގައި ސްވިޒަލަންޑުން ހަންގޭރީ ބަލިކޮށް ފެށުން ރަނގަޅުކޮށްފިއެވެ.
ޖަރުމަނުގެ ކޮލޯންގައި ކުޅުނު މި މެޗު ސްވިޒަލަންޑުން ކާމިޔާބުކޮށްފައިވަނީ 3-1ގެ ނަތީޖާއަކުންނެވެ.
މި ގްރޫޕުގައި ދެން ހިމެނެނީ މުބާރާތް ބާއްވާ ޖަރުމަނާއި ސްކޮޓްލަންޑެވެ. މި ދެޓީމުގެ ކުރިމަތިލުން ޖަރުމަނުން ވަނީ ފަސޭހަކަމާއެކު ކާމިޔާބުކޮށްފައެވެ.
މެޗު ރަނގަޅަށް ފެށީ ސްވިޒަލަންޑުންނެވެ. ގިނަ ވަގުތު ބޯޅަ ހިފަހައްޓައިގެން މޮޅަށް ކުޅުމުގެ ނަތީޖާއެއްގެ ގޮތުން މެޗުގެ 14 ވަނަ މިނެޓުގައި އެ ޓީމު ލީޑުވެސް ނެގިއެވެ. މިޝެލް އަބިޝާ ދިން ރީތި ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ ފޮނުވާލި ހަމަލާއަކުން ސްވިޒަލެންޑަށް އެ ގޯލު ކާމިޔާބުކޮށްދިނީ ކުވަޑްކޯ ޑުއާއެވެ. މި ބޯޅަ ގޯލެއްގެ ގޮތުގައި ނިންމީ ވީއޭއާރު ބެލުމަށްފަހު އެވެ.
ސްވިޒަލަންޑުން މެޗުގައި ޖެހި ދެވަނަ ލަނޑު ޖެހީ ފުރަތަމަ ހާފު ނިމެން މިނެޓަކަށްވެފައި ވަނިކޮށެވެ. ޕެނަލްޓީ އޭރިއާ ބޭރުން ފޮނުވާލި ހަމަލާއަކުން ސްވިޒަލަންޑަށް އެ ގޯލު ކާމިޔާބުކޮށްދިނީ މިޝެލް އެބިޝާއެވެ. މިއީ ގައުމީ ޖާޒީގައި އޭނާ ކާމިޔާބުކުރި ފުރަތަމަ ގޯލެވެ.
ސްވިޒަލަންޑުން ދެވަނަ ހާފުގައި ވެސް ގިނަ ހަމަލާތަކެއް އުފެއްދިއެވެ. ނަމަވެސް އެ ޓީމުގެ ހަމަލާތަކަށް މަޑުޖެހުމެއް އައީ ހަންގޭރީން ލަނޑެއް ޖެހުމުންނެވެ. މެޗުގެ 66 ވަނަ މިނެޓުގައި ހަންގޭރީއަށް މި ލަނޑު ކާމިޔާބުކޮށްދިނީ ބާނަބަދް ވާގާ އެވެ. ނަމަވެސް ސްވިޒަލަންޑުން ވަނީ މެޗުގެ ފަހުކޮޅު ލަނޑެެއް ޖަހައި އެ ޓީމަށް އުއްމީދު ގެނެސްދީފައެވެ. ސްވިޒަލަންޑަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ބްރީލް އެމްބޯލޯއެވެ.
މި ނަތީޖާއާއެކު ގްރޫޕް އޭގެ އެއްވަނައިގައި އޮތީ ޖަރުމަނެވެ. އެއީ ސްކޮޓްލަންޑު ކޮޅަށް ޖެހި ލަނޑުގެ އަދަދު ގިނަވުމާއެކު އެވެ. ދެވަނައިގައި އޮތީ ސްވިޒަލަންޑެވެ.