ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) މަޖިލިސް ކެމްޕެއިނަށް ހޯއްދެވި ފައިސާއިން ބާކީވި ފައިސާ، ޓައިނީ ހާޓްސް ޖަމިއްޔާއަށް ހަދިޔާކުރައްވައިފިއެވެ.
ކުޑޫ މިއަދު އެކްސްގައި ހިއްސާކުރެއްވި ޕޯސްޓެއްގައި ވަނީ، ކެމްޕެއިންގެ ޚަރަދުތައް އޮޑިޓްކުރުމަށް ފަހު ބާކީވި 19،888.61 ރުފިޔާ މިހާރު ޓައިނީ ހާޓްސްއަށް ހަދިޔާކޮށްފައިވާ ކަމަށެވެ.
އިދިކޮޅު އެމްޑީޕީގެ މެންބަރު ކުޑޫ ކެމްޕެއިން ފެއްޓެވީ، އާންމުންގެ އެހީއާއެކު ކެމްޕެއިން ޚަރަދަށް ފައިސާ ހޯއްދަވައިގެން ބާކީވާ ފައިސާ ދިވެހި ޗެރިޓީއަކަށް ހަދިޔާ ކުރައްވާނެ ކަމަށް ވިދާޅުވެއެވެ.
މިދިޔަ އޭޕްރިލް މަހުގެ 21ގައި އޮތް މަޖިލިސް އިންތިޚާބުގައި ކުޑޫ ގަލޮޅު އުތުރު ދާއިރާގެ ގޮނޑި ކާމިޔާބުކުރެއްވީ ތިން ދައުރަށް އެ ދާއިރާގެ މެންބަރުކަން ކުރެއްވި އީވާ އަބްދުﷲއާ ބަލިކުރުމަށް ފަހުގައެވެ.
އެ އިންތިޚާބުގައި ކުޑޫއަށް 582 ވޯޓު ލިބުނުއިރު، އީވާއަށް ލިބުނީ 439 ވޯޓެވެ.
ޓައިނީ ހާޓްސްއަކީ އުފެދުމުގައި ހިތުގެ ބަލިތައް ހުންނަ ކުދިންނަށް އެހީވުމަށް, 2009ގައި އުފައްދާފައިވާ ޖަމްއިއްޔާއެކެވެ.