ދިރާގުގެ ބްރޭންޑް އެމްބެސެޑަރަކަށް އޮލިމްޕިކްސްއަށް ކޮލިފައިވުމުގެ ޝަރަފު ރާއްޖޭން ފުރަތަމަ ފަހަރަށް ހޯދި ޓޭބަލް ޓެނިސް ތަރި ފާތިމަތު ދީމާ ޢަލީ ހަމަޖައްސައިފިއެވެ.
މި ކަމަށް ޚާއްސަކޮށްގެން ދިރާގުގެ ހެޑް އޮފީހުގައި ބޭއްވި ރަސްމިއްޔާތުގައި އެ ކުންފުނީގެ ރަސްމީ އެމްބެސެޑަރުކަން ދީމާއާ ހަވާލުކޮށްދެއްވީ ދިރާގުގެ މެނޭޖިން ޑިރެކްޓަރު އަދި ސީއީއޯ، އިސްމާއީލް ރަޝީދެވެ.
މި ހަފްލާގައި ވާހަކަދައްކަވަމުން ދިރާގުގެ ބްރޭންޑް އެންޑް މާކެޓިން ކޮމިއުނިކޭޝަންސް ޑިރެކްޓަރު، މުޙައްމަދު މިރްޝާންވަނީ ދިރާގުގެ އެމްބެސެޑަރުކަމަށް ދީމާ ހަމަޖެއްސުމަކީ ލިބިގެންދިޔަ ވަރަށް ބޮޑު ފަޚުރެއްކަމަށް ވިދާޅުވެފައެވެ.
ދީމާއަކީ ހަމައެކަނި ރާއްޖެއަށް ފަޚުރެއް ނޫން ކަމަށާއި، ރާއްޖެ ފަދަ ކުޑަ މުޖުތަމައުތަކުގެ ޒުވާނުންނަށް ވެސް ނަމޫނާއެއް ކަމަށް އޭނާ ވިދާޅުވިއެވެ. އަދި ކުރިއަށް އޮތްތަނުގައި ވެސް ދީމާއަށް ކާމިޔާބަށް ވަނީ އެދިފައެވެ.
ދިރާގުގެ އެމްބެސެޑަރު، ރާއްޖޭގެ ޓޭބަލް ޓެނިސް ކުޅުންތެރިޔާ ފާތިމަތު ދީމާ ޢަލީ --
މި ހަފްލާގައި ދީމާ ބުނެފައިވަނީ އޭނާގެ ފުރަތަމަ އެމްބެސެޑާޝިޕް ދިރާގުން ހަމަޖެހިގެން ދިއުމަކީ ލިބުނު ޝަރަފެއް ކަމަށެވެ. ދިރާގުގެ ފަރާތުން އެ ހުށަހެޅި ހުށަހެޅުމާއި، އެ ކުންފުނީގެ ފަރާތުން ލިބުނު ހުރިހާ އެއްބާރުލުމަކާއި ހިތްވަރެއް ދީމާވަނީ ފާހަގަކޮށްފައެވެ.
ކުރިއަށް އޮތްތަނުގައި ގައުމީ އަދި ބައިނަލްއަޤްވާމީ ޕްލެޓްފޯމްތަކުގައި ދިރާގު ތަމްސީލު ކުރުމަށް އުންމީދު ކުރާ ކަމަށް ދީމާ ބުންޏެވެ.
ދިރާގުން އެ ކުންފުނީގެ ބްރޭންޑް އެމްބެސެޑާޝިޕް ޕްރޮގްރާމް ކުރިއަށް ގެންދާތާވަނީ ގިނަ އަހަރުތަކެއް ވެފައެވެ.
ދިރާގުގެ އެމްބެސެޑަރުންގެ ތެރޭގައި އަޙްމަދު ނާޝިދު (ޒީރޯ ޑިގްރީ)، ރާޅާއެޅުންތެރިޔާ އިބްރާހިމް އަރީފް، އަބްދުލް ގަފޫރު އަލީ (ގައްބެ) އަދި ރާއްޖޭގެ އެތުލީޓު ހަސަން ސާއިދުގެ އިތުރުން ޑައިވަރު، ޒޫނާ ނަސީމް (ޒޫންޓީ) ވެސް ހިމެނެއެވެ.