މަޖީދިއްޔާ ސްކޫލްގެ ދަރިވަރަކު ޓީބީއަށް ޕޮޒިޓިވްވެ، އެހެން ދަރިވަރުން ޓެސްޓު ކުރަން ފަށައިފިއެވެ.
"ސަން" އަށް މައުލޫމާތު ދިން ފަރާތުން ބުނީ މަޖީދިއްޔާ ސްކޫލުގެ ދަރިވަރަކު ޓީބީ ޖެހިގެން، އެ ގްރޭޑްގެ ބައެއް ކުދީން މިހާރު ޓެސްޓުކުރަމުން ދާކަމުގައެވެ.
މިކަމާއި ގުޅިގެން ސްކޫލުގެ ރަސްމީ ބަހެއް އަދި ލިބިފައި ނުވާއިރު މައުލޫމާތު ލިބޭގޮތުގައި ޓީބީއަށް ޕޮޒިޓިވްވެފައި ވަނީ އެ ސްކޫލުގެ ގުރޭޑް ނުވައެއްގައި ކިޔަވަމުން އަންނަ ދަރިވަރެކެވެ.
ޓީބީ އަކީ ޖަރާސީމަކުން ޖެހޭ ގައިން ގަޔަށް އަރާ ބައްޔެކެވެ.
ޓީބީ ޖެހެނީ ބަލިޖެހިފައިވާ މީހަކު ކެއްސައި ކިނބިހިއަޅައި ވާހަކަ ދެއްކުމުގެ ތެރޭގައި ޓީބީ ޖައްސާ ޖަރާސީމް ވައިގެ ތެރެއަށް ފެތުރުމުން، އެ ބަލި ނުޖެހި ހުރި މީހާ ނޭވާ އެތެރެއަށް ލާއިރު ޓީބީގެ ޖަރާސީމު ވަނުމުންނެވެ.
ރާއްޖޭގެ ސްކޫލަކުން އެންމެ ފަހުން ޓީބީ ފެނިފައި ވަނީ 2022 ވަނަ އަހަރު ސެންޓަ ފޯ ހަޔާ ސެކަންޑަރީ އެޑިއުކޭޝަން (ސީއެޗްއެސްއީ) އިންނެވެ.