އިންޑިއާގެ އެންމެ މުއްސަނދި މީހާގެ މަގާމުގައި ހުރި ރިލަޔަންސް އިންޑަސްޓްރީގެ ޗެއާމަން މުކޭޝް އަމްބާނީ ފަހަތަށް ޖައްސައިލުމަށްފަހު އެ މަގާމު ގޯތަމް އަދާނީ ހޯދައިފިއެވެ.
ބްލޫމްބާގް ބިލިއަނާސް އިންޑެކްސްގެ 11 ވަނައިގައި އޮތް އަދާނީ އަކީ މިހާރު މުޅި އޭޝިއާގެ ވެސް އެންމެ މުއްސަނދި މީހާއެވެ.
އަދާނީ ގްރޫޕްގެ ޗެއާމަންގެ މަގާމުގައި ވެސް ހުރި ގޯތަމްގެ މިލްކިޔާތުގައި މިދިޔަ ހޮނިހިރު ދުވަހުގެ ނިޔަލަށް ހުރި މުދަލުގެ އަގު 111 ބިލިއަން ޑޮލަރަށް އަރައެވެ.
އަމްބާނީގެ މިލިކިއްޔާތުގައި ހުރީ 109 ބިލިއަން ޑޮލަރެވެ. އެ ބަދަލު އައިސްފައިވަނީ އަދާނީ ގްރޫޕްގެ ހުރިހާ ކުންފުންޏެއްގެ ހިއްސާގެ އަގު އުފުލުމުންނެވެ.
އަދާނީ ގްރޫޕްގެ ގާބިލުކަން ހުރިކަމަށާއި ކުރިއަށް އޮތް ތަނުގައި ގްރޫޕަށް ވަރަށް ފައިދާވާނެ ކަމުގެ ޔަގީންކަން އެބައޮތް ކަމަށް މިދިޔަ ހަފްތާ ގޯތަމް ވަނީ ވިދާޅުވެފައެވެ.
ދުނިޔޭގެ އިގްތިސާދީ ކުރިއެރުން ދަށްވި ނަމަވެސް އަމިއްލަ މުއްސަނދިކަން އިތުރުވުމުގެ ސަބަބުން 2022 ވަނަ އަހަރު ވެސް އޭޝިއާގެ އެންމެ މުއްސަނދި މީހާގެ މަގާމު ގޯތަމް ވަނީ ހޯދައިފައެވެ.
ނަމަވެސް 2023 ވަނަ އަހަރުގެ ޖެނުއަރީ މަހު އޭނާއަށް ގެއްލުން ލިބުނީ އިންވެސްޓްމެންޓް ކުންފުނި، ހިންޑެންބާގް ރިސާޗުން ނެރުނު ރިޕޯޓަކާ ގުޅިގެންނެވެ.
ގޯތަމް އެންމެ ފުރަތަމަ ފެށީ ޑައިމަންޑް ވިޔަފާރިއެވެ.
ނަވާރަސަތޭކަ އަށްޑިހައަށްވަނަ ވަނަ އަހަރު އޭނާގެ އަމިއްލަ ކުންފުންޏެއް އުފައްދަވައި، އިމްޕޯޓް، އެކްސްޕޯޓް ވިޔަފާރި ފަށައި އެ ވިޔަފާރި ވަރަށް ބޮޑަށް ކުރިއެރިއެވެ.
ބްލޫމްބާގް ބިލިއަނާސް އިންޑެކްސް އަކީ ދުނިޔޭގެ އެންމެ މުއްސަނދި މީހުން ރޭންކިން ކޮންމެ ދުވަހަކު ވެސް ހަދާ އިންޑެކްސްއެކެވެ.