އެމެރިކާގެ ކުރީގެ ރައީސް ބަރަކް އޮބާމާގެ އަނބިކަނބަލުން މިޝެލް އޮބާމާގެ މަންމަ މާރިއަން ރޮބިންސަން މަރުވެއްޖެއެވެ.
މާރިއަން މަރުވީ އުމުރުން 86 އަހަރުގައި ކަމަށް އާއިލާއިން ނެރުނު ބަޔާނެއްގައި ބުނެފައިވެއެވެ. ނަމަވެސް، އެކަމުގެ އިތުރު ތަފުސީލެއް ހާމަކޮށްފައެއްނުވެއެވެ.
މައިދައިތަގެ ވަކިވުމާ ގުޅިގެން އޮބާމާ ސޯޝަލް މީޑިއާގައި ޕޯސްޓެއްގައި ވިދާޅުވީ މާރިއަންއަކީ އާއިލާގެ ވަރަށް މުހިއްމު މީހެއް ކަމަށާއި އޭނާ ނެތް ތަން އެހެން މީހަކަށް ފޫބައްދައިނުދެވޭނެ ކަމަށެވެ. އަދި، މައިދައިތަ އާއިލާގެ ތެރޭގައި ދެއްކި ނަމޫނާ އަބަދު ވެސް ދަމަހައްޓަވަން އާއިލާއިން މަސައްކަތްކުރައްވާނެ ކަމަށް އޮބާމާ ވިދާޅުވިއެވެ.
މަންމަ މަރުވުމާ ގުޅިގެން މިޝެލް އާންމުކޮށްފައިވާ ވީޑިއޯއެއްގައި ބުނީ، އޭނާއަކީ ކާކުކަން ދެނެގަނެ އަމިއްލަ ނަފުސަށް އިތުބާރު ކުރަން ދަސްކޮށްދިނީ މަންމަ ކަމަށެވެ.
އެެމެރިކާގެ ކުރީގެ ރައީސް ބަރަކް އޮބާމާ (ކ) އާއި މައިދައިތަ މާރިއަން ރޮބިންސަން (ވ). ފޮޓޯ/ބީބީސީ
އޮބާމާ ދެ ދައުރަކަށް އެމެރިކާގެ ރައީސްކަން ކުރެއްވި ދުވަސްވަރު، ފަސްޓްލޭޑީ މިޝެލް އޮބާމާ ވެސް ރަސްމީ ކަންކަމުގައި ވަރަށް ބިޒީކޮށް އުޅުއްވަން ޖެހިވަޑައިގަތްއިރު، އެ ބޭފުޅުންގެ ދެ ދަރިކަނބަލުންގެ ޒިންމާތަކާ އިސްކޮށް ހަވާލުވެވަޑައިގެން ހުރީ މާރިއަންއެވެ.
މާރިއަން އުފަންވީ 1937 ވަނަ އަހަރުއެވެ. އޮބާމާއަށް ވެރިކަން ލިބިވަޑައިގަތުމަށް ފަހު، ވޮޝިންޓަން ޑީސީއަށް ދިރިއުޅުން ބަދަލުކުރި ނަމަވެސް އުމުރުގެ ބޮޑު ބައެއް މާރިއަން ހޭދަކުރި ޗިކާގޯއެވެ.