ރާއްޖެއިން އެހެން ގައުމުތަކާއެކު އަސްކަރީ ދާއިރާތަކުން ގުޅުން ބަދަހިކުރި ނަމަވެސް އެއްވެސް ގައުމެއްގެ ސިފައިން ދާއިމަށް ރާއްޖޭގައި ގާއިމްވެ ތިބުމަކީ ކަން ހިނގައިގެންގެން ވާނެ ގޮތް ނޫންކަމަށާއި ދިވެހި ސަރުކާރުން އެ ކަމާ ދެކޮޅުވާނެ ކަމަށް ޑިފެންސް މިނިސްޓަރު މުޙައްމަދު ޣައްސާން މައުމޫނު ވިދާޅުވެއްޖެއެވެ.
ޝަންގްރިލާ ޑައިލޮގްގައި ވާހަކަދައްކަވަމުން ޣައްސާން ވިދާޅުވީ ރައީސް ޑރ. މުޙައްމަދު މުއިއްޒަކީ ބައިނަލްއަގްވާމީ ގޮތުން، ޚާއްސަކޮށް އަސްކަރީ ގުޅުން ވަރުގަދަކުރެއްވުމަށް ވަރަށް އިސްކަން ދެއްވާ ބޭފުޅެއް ކަމަށެވެ.
އެގޮތުން ވެރިކަމާ ހަވާލުވެ، ޒަމާނުއްސުރެ އިންޑިއާއާއި އެމެރިކާއާއެކު އޮތް އަސްކަރީ ގުޅުންތައް ދަމަހައްޓަން އަންނަކަމަށް ވިދާޅުވިއެވެ.
"ރައީސް ޑރ. މުޙައްމަދު މުއިއްޒުގެ އަސްކަރީ އަސާސްތަކުގައި އެންމެ އިސްކަން ދެއްވަނީ އަޅުގަނޑުމެންގެ އަމިއްލަ ދިފާއީ ބާރުތައް ވަރުގަދަކޮށް، ހަމަޖެހުމާއި އަމާންކަމާއި ސުލަހަވެރިކަން ދަމަހައްޓައި ކަނޑުމަގުން ވެސް އެ ކަން ކަށަވަރުކުރަން،" ޣައްސާން ވިދާޅުވިއެވެ.
އެ މަގްސަދަށް ޓަކައި ދިވެހި އަސްކަރިއްޔާގެ ބާރު ވަރުގަދަ ކުރުމަށް އެހެން ގައުމުތަކާ ވެސް ގުޅުން ބަދަހިކުރަމުން އަންނަކަމަށް ވިދާޅުވިއެވެ.
އެހެން ނަމަވެސް އެއީ އެއްވެސް ގައުމެއްގެ އަސްކަރިއްޔާ ރާއްޖޭގައި ދާއިމަށް ބައިތިއްބަން ޖެހޭނެ ކަމަށް ރާއްޖެއިން ގަބޫލުކުރާ ސަބަބެއް ނޫންކަމަށާއި އެހެން ގައުމުތަކުން ވެސް ރާއްޖޭގެ އެ ނިންމުމަށް އިހްތިރާމް ކުރާނެކަމަށް ގަބޫލުކުރައްވާކަމަށް ވިދާޅުވިއެވެ.
މީގެ އިތުރުން ޣައްސާން ވިދާޅުވީީ ކުދި ގައުމުތަކުގެ ސަލާމަތާއި ރައްކާތެރިކަން ކަށަވަރުކުރުމަކީ އަބަދުވެސް ދަތިތައް ހުރި ކަމެއް ކަމަށެވެ.
އެގޮތުން ގާތްގަނޑަކަށް މީގެ އަށް ދަހަރު ކުރީއްސުރެ ރާއްޖެ ފަދަ ގައުމުތަކުން އަމިއްލަ މިނިވަންކަން ކަށަވަރުކުރުމަށް ބަރޯސާވެފައި އޮތީ ބައިނަލްއަގްވާމީ ގާނޫނުތަކަށް ކަމަށް ވިދާޅުވިއެވެ.
އެހެން ނަމަވެސް ބައެއް ގައުމުތަކުން ބައިނަލްއަގްވާމީ އުސޫލުތަކާއި ގަބޫލުކުރުންތަކުގެ މަތިން ހަނދާން ނައްތައިލައި، ޗެލެންޖުކުރަމުން އަންނަކަމަށާއި މިއީ ކުދި ގައުމުތަކަށް ކުރިމަތިވާ ނުރައްކަލެއް ކަމަށް މިނިސްޓަރު ވިދާޅުވިއެވެ.
އެހެންވެ އެކަމުން ސަލާމަތްވުމަށް ޓަކައި އެ ފަދަ ގައުމުތަކަށް އެހެން ގައުމުތަކާއި، ނުވަތަ އެހެން ފަރާތްތަކާ ގުޅުން ބަދަހިކޮށް މަސައްކަތް ކުރަން ޖެހޭކަމަށް ފާހަގަކުރެއްވިއެވެ.
"އަޅުގަނޑުމެން ވެސް ގަބޫލުކުރާ ހަގީގަތަކީ އަޅުގަނޑުމެންގެ އަމިއްލަ ބާރު ގައުމީ ފެންވަރުގައި އާއި ބައިނަލްއަގްވާމީ ފެންވަރުގައި ވަރުގަދަކޮށްގެން ނޫނީ ކުރިއަށް ނުދާނަމަ ހައްތަހާ ވެސް ވާނީ ބަލިކަށި ކަން،" ޣައްސާން ވިދާޅުވިއެވެ.